Deepika
ADVERTISEMENT
International
വത്തിക്കാൻ സിറ്റി: ജോൺ പോൾ രണ്ടാമൻ മാർപാപ്പ തുടക്കം കുറിച്ച ചരിത്രപ്രസിദ്ധമായ അന്താരാഷ്‌ട്ര മതസൗഹാർദ സമാധാന പ്രാർഥനയുടെ 40-ാം വാർഷികാഘോഷങ്ങളിൽ പങ്കെടുക്കാൻ ലെയോ പതിനാലാമൻ മാർപാപ്പ അസീസി സന്ദർശിക്കും. ഈമാസം 25 മുതൽ 27 വരെയാണ് അസീസിയിൽ വാർഷികസമ്മേളനം സംഘടിപ്പിക്കുന്നത്.
1986 ഒക്ടോബർ 27നാണ് ആഗോള സമാധാനത്തിനായി ലോകത്തിലെ വിവിധ മതനേതാക്കളെ ഒരുമിച്ചുകൂട്ടി ജോൺ പോൾ രണ്ടാമൻ മാർപാപ്പ ആദ്യമായി അസീസിയിൽ പ്രാർഥനായോഗം വിളിച്ചുചേർത്തത്.
ഇതിന്‍റെ ഓർമ പുതുക്കി ‘ആയുധമുക്തവും നിരായുധീകരണത്തിലൂന്നിയതുമായ സമാധാനം’ എന്ന പ്രമേയത്തിലാണ് ഈ വർഷത്തെ സമ്മേളനം നടക്കുന്നത്.
സാന്ത എജീദിയോ എന്ന കത്തോലിക്കാകൂട്ടായ്മയുടെ നേതൃത്വത്തിൽ നടക്കുന്ന പരിപാടിയിൽ 53 രാജ്യങ്ങളിൽനിന്നായി 384 മത, സാംസ്കാരിക പ്രതിനിധികൾ പങ്കെടുക്കും.
സമ്മേളനത്തിന്‍റെ അവസാനദിനമായ 27ന് ലെയോ പതിനാലാമൻ മാർപാപ്പ അസീസിയിലെത്തി സമാധാനസന്ദേശം നൽകും.
International
പാരീസ്: ഫ്രാൻസ് സന്ദർശനത്തിനിടെ, ഭിന്നശേഷിക്കാരിയായ മരീ ഗാരൻസ് എന്ന പത്തുവയസുകാരിയെ ലെയോ പതിനാലാമൻ മാർപാപ്പ നേരിട്ടെത്തി ചേർത്തണയ്ക്കുകയും ആശീർവദിക്കുകയും ചെയ്ത ചിത്രം വൈറലാകുന്നു.
പാരീസിലെ പ്ലാസ് ദെ ലാ കോൺകോർഡിനു സമീപം ശനിയാഴ്ച‌യായിരുന്നു ലോകത്തിന്‍റെ മുഴുവൻ ഹൃദയം കവർന്ന ഈ വൈകാരിക സംഭവം. ചക്രക്കസേര ഉപയോഗിക്കുന്നവർക്കായി വേർതിരിച്ച സ്ഥലത്ത് വളർത്തമ്മ ക്ലോത്തില്‍ഡെ നോയലിനും അനിയത്തി പെപ്പ യ്ക്കുമൊപ്പം മാർപാപ്പയെ കാണാൻ കാത്തുനിൽക്കുകയായിരുന്നു മരീ ഗാരൻസ്.
തെരുവോരത്ത് തടിച്ചുകൂടിയ വൻ ജനക്കൂട്ടത്തിനിടയിൽനിന്നു പെൺകുട്ടിയെ മാർപാപ്പയുടെ ശ്രദ്ധയിൽപ്പെടുത്താനായി ചുറ്റുമുള്ള വിശ്വാസികൾ ചേർന്ന് മുൻനിരയിലേക്ക് ഉയർത്തിക്കാണിക്കുകയായിരുന്നു. ജനക്കൂട്ടത്തിന്‍റെ സ്‌നേഹവായ്പു കണ്ട വത്തിക്കാൻ സുരക്ഷാ ഉദ്യോഗസ്ഥർ കുട്ടിയെ ശ്രദ്ധയോടെ വാങ്ങി മാർപാപ്പയ്ക്ക് അരികിലേക്കു നൽകി. വാത്സല്യത്തോടെ കുഞ്ഞിനെ തഴുകിയ മാർപാപ്പ, അവളുടെ നെറ്റിയിൽ സ്നേഹപൂർവം കുരിശടയാളം വരച്ച് പ്രാർഥിക്കുകയും ആശീർവദിക്കുകയും ചെയ്തു. ഒപ്പമുണ്ടായിരുന്ന സഹോദരി പെപ്പ യെയും അദ്ദേഹം അനുഗ്രഹിച്ചു.
ഏതൊരു അവസ്ഥയിലുമുള്ള മനുഷ്യജീവന്‍റെ മൂല്യത്തെയും മാന്യതയെയും ഉയർത്തിക്കാട്ടുന്ന ഈ അപൂർവനിമിഷത്തെ ‘യെസ് ടു ലൈഫ്’(ജീവനുവേണ്ടിയുള്ള നിലപാട്) എന്ന ആശയത്തിന്‍റെ വലിയൊരു പ്രതീകമായാണ് ഫ്രഞ്ച് മാധ്യമങ്ങൾ വിശേഷിപ്പിച്ചത്. ലോകമെമ്പാടുമുള്ള മാധ്യമങ്ങളിലും സമൂഹമാധ്യമങ്ങളിലും ആഗോളതലത്തിൽ ഈ ചിത്രം വൻ പ്രചാരം നേടി.
വിദ്വേഷങ്ങളും ആശങ്കകളും നിറഞ്ഞ ലോകത്തിനു സ്നേഹത്തിന്‍റെയും കാരുണ്യത്തിന്‍റെയും വലിയൊരു സന്ദേശം നൽകാൻ ഈ ഒറ്റ നിമിഷത്തിലൂടെ മാർപാപ്പയ്ക്കു സാധിച്ചുവെന്നാണ് ആഗോള മാധ്യമങ്ങൾ വിലയിരുത്തുന്നത്.
ജീവകാരുണ്യരംഗത്തു ശ്രദ്ധേയരായി നോയൽ കുടുംബം
ഫ്രാൻസിൽ ഏറെ പ്രശസ്തമാണ് മരീ ഗാരൻസിന്‍റെയും അവരെ ദത്തെടുത്ത നോയൽ കുടുംബത്തിന്‍റെയും കഥ. പ്രത്യേക പരിഗണന അർഹിക്കുന്ന കുട്ടികളെ ദത്തെടുത്ത് സംരക്ഷിക്കുന്നതിലും ഭിന്നശേഷിക്കാരുടെ അവകാശങ്ങൾക്കും ആത്മാഭിമാനത്തോടെയുള്ള ജീവിതത്തിനുമായി പ്രവർത്തിക്കുന്നതിലും ഫ്രാൻസിൽ ഏറെ മാതൃകയായ ദമ്പതികളാണ് ക്ലോത്തില്‍ഡെയും നിക്കോളാസ് നോയലും.
2016ൽ വെറും 16 മാസം മാത്രം പ്രായമുള്ളപ്പോഴാണ് ഇവർ മരീ ഗാരൻസിനെ ദത്തെടുക്കുന്നത്. ദത്തെടുത്ത ഭിന്നശേഷിക്കാരായ നാലുപേരുൾപ്പടെ പത്തു മക്കളാണ് ദന്പതികൾക്കുള്ളത്.
International
വത്തിക്കാൻ സിറ്റി: തന്‍റെ ഫ്രാൻസ് സന്ദർശനം രാജ്യത്തിനും സഭയ്ക്കും ഒരു വലിയ നവീകരണത്തിന്‍റെ അടയാളമായിരുന്നുവെന്ന് ലെയോ പതിനാലാമൻ മാർപാപ്പ. സെന്‍റ് പീറ്റേഴ്സ് ചത്വരത്തിൽ ഇന്നലെ നടന്ന പൊതുകൂടിക്കാഴ്ചയിൽ സംസാരിക്കുകയായിരുന്നു മാർപാപ്പ.
2019 ലെ വിനാശകരമായ തീപിടിത്തത്തിനുശേഷം അതിവേഗം പുനർനിർമിച്ച് 2024 ഡിസംബറിൽ തുറന്നുകൊടുത്ത പാരീസിലെ നോത്ര്‌ദാം കത്തീഡ്രലിന്‍റെ ഉയിർത്തെഴുന്നേൽപ്പ് തന്‍റെ മുഴുവൻ ഫ്രഞ്ച് പര്യടനത്തിന്‍റെയും പ്രതീകാത്മകമായ സന്ദേശമാണെന്ന് മാർപാപ്പ ചൂണ്ടിക്കാട്ടി.
സഭയും ഭരണകൂടവും പൊതുസമൂഹവും ഒന്നിച്ച് കൈകോർത്തപ്പോൾ സാധ്യമായ ഈ പുനർനിർമാണം, പൊതുനന്മയ്ക്കായി എല്ലാവരും ഒന്നിച്ചു പ്രവർത്തിക്കേണ്ടതിന്‍റെ ആവശ്യകതയാണ് കാണിക്കുന്നതെന്നും മാർപാപ്പ ഓർമിപ്പിച്ചു.
പര്യടനത്തിനിടയിൽ പാരീസിലെ സ്റ്റാഡ് ദെ ഫ്രാൻസ് സ്റ്റേഡിയത്തിൽ 80,000ത്തോളം യുവാക്കൾ പങ്കെടുത്ത പ്രാർഥനാസംഗമം മാർപാപ്പ പ്രത്യേകമായി പരാമർശിച്ചു. കേവലം പ്രായത്തിന്‍റെ അടിസ്ഥാനത്തിലല്ല, മറിച്ച് ക്രിസ്തുവിലുള്ള ആഴമായ വിശ്വാസവും ആത്മാർഥതയും കൊണ്ടാണ് പുതിയ തലമുറ പ്രതീക്ഷയുടെ അടയാളമാകുന്നതെന്ന് മാർപാപ്പ പറഞ്ഞു.
ഫ്ലാസ് ദെ ലാ കോൺകോർഡ് ചത്വരത്തിൽ നടന്ന വിശുദ്ധ കുർബാനയിൽ ഏഴു ലക്ഷം വിശ്വാസികളാണു പങ്കെടുത്തത്. കൂടാതെ, ഫ്രാൻസിൽ അടുത്തകാലത്തായി കത്തോലിക്കാസഭയിലേക്ക് എത്തുന്നവരുടെ എണ്ണത്തിൽ വലിയ വർധനവുണ്ടായിട്ടുണ്ടെന്നും ഇത് ദൈവത്തിന്‍റെ മനോഹരമായ ഇടപെടലാണെന്നും മാർപാപ്പ കൂട്ടിച്ചേർത്തു.
ലൂർദ് തീർഥാടന കേന്ദ്രത്തിലെ അനുഭവങ്ങളും മാർപാപ്പ പങ്കുവച്ചു. ‘ലോകത്തിനു ജീവൻ ഉണ്ടാകേണ്ടതിന്’ എന്നതായിരുന്നു തന്‍റെ സന്ദർശനത്തിന്‍റെ പ്രമേയമെന്ന് ഓർമിപ്പിച്ച മാർപാപ്പ, ഫ്രാൻസിലെ വിശ്വാസികളുടെ പരസ്യമായ സാക്ഷ്യം ലോകമെമ്പാടുമുള്ള സഭയ്ക്ക് പ്രേരണയാകട്ടേയെന്നും, നമുക്ക് നമ്മുടെ വിശ്വാസത്തെ ഒളിച്ചുവയ്ക്കാതിരിക്കാമെന്നും പറഞ്ഞു.
ഒക്‌ടോബറിൽ ലോകസമാധാനത്തിനായി എല്ലാവരും ജപമാല ചൊല്ലണമെന്നും മാർപാപ്പ ആഹ്വാനം ചെയ്തു.
International
മെറ്റ്സ് (ഫ്രാൻസ്): ഭൗമശാസ്ത്രപരമായ അതിരുകൾക്കപ്പുറം ചരിത്രപരവും സാംസ്കാരികവുമായ അടിത്തറയിൽ കെട്ടിപ്പടുത്തതാണു യൂറോപ്പിന്‍റെ സ്വത്വമെന്നും നിലവിലെ ബഹുസാംസ്കാരിക പശ്ചാത്തലത്തിൽ യൂറോപ്പ് സ്വന്തം വേരുകൾ വീണ്ടെടുത്ത് സംഭാഷണങ്ങൾക്ക് തുറന്ന മനസ് കാട്ടണമെന്നും ലെയോ പതിനാലാമൻ മാർപാപ്പ. ഫ്രാൻസിലെ മെറ്റ്സ് നഗരത്തിലുള്ള റോബർട്ട് ഷൂമാൻ സെന്‍ററിൽ സംഘടിപ്പിച്ച ‘യൂറോപ്പിന്‍റെ വേരുകളിലേക്ക്, സമാധാനത്തിനും ഐക്യത്തിനും’ എന്ന സമ്മേളനത്തിൽ സന്ദേശം നൽകുകയായിരുന്നു അദ്ദേഹം.
യൂറോപ്യൻ ഐക്യത്തിന് അടിത്തറയിട്ട റോബർട്ട് ഷുമാൻ, അൾചിദേ ദെ ഗാസ്പാരി, യൂറോപ്പിന്‍റെ മധ്യസ്ഥനായ വിശുദ്ധ ബെനഡിക്‌ട് എന്നിവരുടെ സംഭാവനകളെ മാർപാപ്പ അനുസ്മരിച്ചു. ഭരണകൂടങ്ങളുടെ മതേതരത്വം എന്നാൽ കേവലം നിഷ്പക്ഷത പാലിക്കലല്ല, മറിച്ച് വിവിധ വിഭാഗങ്ങൾ തമ്മിലുള്ള സഹകരണവും സഭകളുടെ സ്വാതന്ത്ര്യത്തെ ആദരിക്കലുമാണെന്ന് അദ്ദേഹം വ്യക്തമാക്കി.
യുദ്ധങ്ങളിൽനിന്നും പീഡനങ്ങളിൽനിന്നും രക്ഷപ്പെട്ട് യൂറോപ്പിലെത്തുന്ന അഭയാർഥികൾക്ക് നിയമപരമായ സുരക്ഷിത മാർഗങ്ങളും സംരക്ഷണവും ഉറപ്പാക്കണം. മനുഷ്യക്കടത്തുകാർക്കെതിരേ കർശന നടപടി സ്വീകരിക്കുന്നതോടൊപ്പം, എത്തുന്നവരെ കുടുംബാംഗങ്ങളെപ്പോലെ ഉൾക്കൊള്ളാനും അവരുടെ കഴിവുകൾ വളർത്താനും സാധിക്കണം. ലോകസമാധാനത്തിനായി ആയുധങ്ങൾ സംഭരിച്ച് വരാനിരിക്കുന്ന യുദ്ധങ്ങൾക്ക് തയാറെടുക്കുകയാണോ അതോ സർഗാത്മകമായി എന്തെങ്കിലും ചെയ്യുന്നുണ്ടോയെന്ന് നാം ആത്മപരിശോധന നടത്തണം.
ആയുധപോരാട്ടങ്ങൾക്കു പകരം ക്ഷമയോടെയുള്ള സംഭാഷണങ്ങൾക്കും വിഭവങ്ങൾ പങ്കുവയ്ക്കുന്നതിനും യൂറോപ്പ് മുൻഗണന നൽകണമെന്നും മാർപാപ്പ ആവശ്യപ്പെട്ടു. ഭാവിയെ ഭയപ്പെടാതെ കുടുംബങ്ങൾ ആരംഭിക്കാനും ഗർഭധാരണം മുതൽ മരണം വരെയുള്ള മനുഷ്യജീവന്‍റെ അന്തസ് ഉയർത്തിപ്പിടിച്ച് നന്മയുടെ ശില്പികളാകാനും ആഹ്വാനം ചെയ്തുകൊണ്ടാണ് മാർപാപ്പ സന്ദേശം അവസാനിപ്പിച്ചത്.
ഫ്രഞ്ച് പ്രസിഡന്‍റ് ഇമ്മാനുവൽ മാക്രോൺ, മൊണാക്കോയിലെ ആൽബർട്ട് രണ്ടാമൻ രാജകുമാരൻ, ചാർലീൻ രാജകുമാരി, ലക്സംബർഗ് ഗ്രാൻഡ് ഡ്യൂക്ക് ഗിയ്യോം എന്നിവരുൾപ്പടെ യൂറോപ്പിലെ പ്രമുഖ ഭരണാധികാരികളും സഭാ തലവന്മാരും സമ്മേളനത്തിൽ പങ്കെടുത്തു.
നേരത്തേ ലൂർദിലെ സന്ദർശനം പൂർത്തിയാക്കി വടക്കുകിഴക്കൻ ഫ്രാൻസിലെ മെറ്റ്സിലേക്കു പോകവേ മാർപാപ്പയുടെ വിമാനത്തെ ആദരസൂചകമായി ഫ്രഞ്ച് യുദ്ധവിമാനങ്ങൾ അകന്പടി സേവിച്ചു. മെറ്റ്സ് നഗരത്തിലും മാർപാപ്പയെ കാണാൻ ജനലക്ഷങ്ങളാണ് ഒഴുകിയെത്തിയത്. നാലുദിവസത്തെ ഫ്രാൻസ് സന്ദർശനം പൂർത്തിയാക്കി ഇന്നലെ രാത്രി മാർപാപ്പ വത്തിക്കാനിൽ മടങ്ങിയെത്തി.
International
ലൂർദ്: ലൂർദിന്‍റെ പുണ്യഭൂമിയിലെത്തിയ മാർപാപ്പയ്ക്കു മുന്നിൽ വിശുദ്ധ ബർണദീത്തയുടെ വേഷത്തിലെത്തി ഗാനം ആലാപിച്ച് 13കാരി ഏവ മൊളൻമേക്കർ ഏവരുടെയും മനം കവർന്നു.‘ബർണദീത്ത് ദെ ലൂർദ് ’ എന്ന സംഗീതനാടകത്തിലെ രണ്ടു പ്രധാന ഗാനങ്ങളാണ് ഏവ പാടിയത്.
1858ൽ മാസബിയേൽ ഗുഹയിൽ പരിശുദ്ധ കന്യക മറിയത്തിന്‍റെ ദർശനം ലഭിച്ച വിശുദ്ധ ബർണദീത്തയുടെ ജീവിതത്തെ ആസ്പദമാക്കിയുള്ളതാണ് ഈ നാടകം. ഫ്രാൻസിലെ എക്സ് ഓൺ പ്രവിശ്യയിലെ ഫുവോ സ്വദേശിനിയായ ഏവയാണ് നാടകാവിഷ്കാരത്തിൽ പ്രധാന കഥാപാത്രത്തെ അവതരിപ്പിക്കുന്നത്.
വാക്കുകൾക്കതീതമായ, വിശ്വസിക്കാനാകാത്ത നിമിഷമാണിതെന്നും മാർപാപ്പയ്ക്കു മുന്നിൽ പാടാൻ കഴിഞ്ഞത് ജീവിതത്തിലെ ഏറ്റവും വലിയ ഭാഗ്യമായി കരുതുന്നുവെന്നും ഏവ വികാരഭരിതയായി പ്രതികരിച്ചു.
നിർമലമായ ശബ്‌ദത്തിൽ ഉയർന്നുവന്ന ഗാനം മാർപാപ്പയെയും സദസിനെയും ഒരേപോലെ കോരിത്തരിപ്പിച്ചു. ഭക്തിസാന്ദ്രമായ ഈ അവിസ്മരണീയ നിമിഷത്തിന്‍റെ വീഡിയോ ദൃശ്യങ്ങൾ ഇപ്പോൾ സമൂഹമാധ്യമങ്ങളിൽ തരംഗമായിരിക്കുകയാണ്.
International
ലൂർദ് (ഫ്രാൻസ്): മനസിൽ പ്രത്യാശയുടെ പ്രകാശവും കൈകളിൽ തെളിച്ച മെഴുകുതിരികളുമായി ഒഴുകിയെത്തിയ തീർഥാടകരെ സാക്ഷിനിർത്തി, ലെയോ പതിനാലാമൻ മാർപാപ്പയുടെ നേതൃത്വത്തിൽ നടന്ന ജപമാലപ്രദക്ഷിണം ലൂർദിന്‍റെ പുണ്യഭൂമിയെ ഭക്തിസാന്ദ്രമാക്കി. ഞായറാഴ്ച രാത്രി നടന്ന ജപമാല ്രദക്ഷിണത്തിൽ ലോകത്തിന്‍റെ വിവിധ ഭാഗങ്ങളിൽനിന്ന് എത്തിയ രണ്ടു ലക്ഷത്തോളം വിശ്വാസികളാണു പങ്കെടുത്തത്.
വലതുകൈയിൽ വലിയ മെഴുകുതിരിയും ഇടതുകൈയിൽ ജപമാലയുമേന്തി, പരിശുദ്ധ അമ്മയുടെ അലങ്കരിച്ച തിരുസ്വരൂപത്തിനു പിന്നാലെ നടന്നുനീങ്ങിയ മാർപാപ്പ വിശ്വാസികൾക്ക് ആത്മീയാനുഭൂതി പകർന്നു. വിവിധ ഭാഷകളിൽ ‘മഹിമയുടെ രഹസ്യങ്ങൾ’ പ്രാർഥിച്ചപ്പോൾ, റോസറി ബസിലിക്കയ്ക്കു മുന്നിലെ ചത്വരത്തിൽ തടിച്ചുകൂടിയ പതിനായിരക്കണക്കിന് തീർഥാടകർ തങ്ങളുടെ മെഴുകുതിരികൾ ഉയർത്തിപ്പിടിച്ച് ‘ആവേ മരിയ’ ഗീതങ്ങൾ ആലപിച്ചു. ലൂർദിന്‍റെ പുണ്യഭൂമിയിൽ ഇതു വെളിച്ചത്തിന്‍റെ വലിയൊരു സമുദ്രംതന്നെ തീർത്തു.
‘നമ്മെ മുന്നോട്ട് നയിക്കുന്ന പ്രകാശം പ്രതീക്ഷയുടേതാണ്. കഷ്‌ടപ്പാടുകളും പരീക്ഷണങ്ങളും നിറഞ്ഞ ഈ ജീവിതത്തിലും നമ്മൾ ദൈവത്തിന്‍റെ പ്രിയപ്പെട്ട മക്കളാണെന്ന സന്തോഷം ആ പ്രകാശം നമുക്ക് നൽകുന്നു,’ - സന്ദേശത്തിൽ മാർപാപ്പ ഓർമിപ്പിച്ചു.
ഒക്‌ടോബറിൽ സമാധാനത്തിനായുള്ള ജപമാലപ്രാർഥനയ്ക്ക് ആഹ്വാനം
ലോകമെമ്പാടും സമാധാനം പുലരുന്നതിനും യുദ്ധങ്ങൾ അവസാനിക്കുന്നതിനുമായി ഒക്ടോബർ മാസത്തിൽ ജപമാല ചൊല്ലി പ്രാർഥിക്കാൻ കത്തോലിക്ക വിശ്വാസികളോട് മാർപാപ്പ ആഹ്വാനം ചെയ്തു. ലൂർദിലെ വിശുദ്ധ കുർബാനയ്ക്കുശേഷം ‘ത്രികാലപ്രാർഥന’ നയിച്ചു സംസാരിക്കുകയായിരുന്നു അദ്ദേഹം.
ലൂർദിൽ പരിശുദ്ധ കന്യക മറിയം വിശുദ്ധ ബർണദീത്തയ്ക്കു പ്രത്യക്ഷപ്പെട്ടപ്പോൾ കൈകളിൽ ജപമാലയേന്തി പ്രാർഥിക്കാൻ പഠിപ്പിച്ച കാര്യം ഓർമിപ്പിച്ച മാർപാപ്പ, പ്രാർഥനയോടൊപ്പം പശ്ചാത്താപത്തിന്‍റെയും കരുണയുടെയും പ്രവൃത്തികൾ ചെയ്യാനും, സംഭാഷണങ്ങളിലൂടെ അനുരഞ്ജനത്തിനായി നിലകൊള്ളാനും ആഹ്വാനം ചെയ്തു.
International
വത്തിക്കാൻ സിറ്റി: ‘എയ്ഡ് ടു ദ ചർച്ച് ഇൻ നീഡ്’സംഘടിപ്പിക്കുന്ന ‘ഒരു ദശലക്ഷം കുട്ടികൾ ചൊല്ലുന്ന ജപമാല’എന്ന ആഗോള പ്രാർഥനാദൗത്യത്തിന്‍റെ ഭാഗമായി ഒക്ടോബർ ഒന്നിന് വൈകുന്നേരം അഞ്ചിന് വത്തിക്കാൻ ഗാർഡനിലുള്ള ലൂർദ് ഗ്രോട്ടോയിൽ എഴുനൂറോളം കുട്ടികൾ ലെയോ പതിനാലാമൻ മാർപാപ്പയോടൊപ്പം ജപമാല ചൊല്ലി പ്രാർഥിക്കും.
റോമിലെ വിവിധ സ്കൂളുകളിൽനിന്നും ഇടവകകളിൽനിന്നുമുള്ള കുട്ടികളാണ് ഇതിൽ പങ്കാളികളാകുന്നത്.
ഒക്ടോബർ ഏഴിലെ ജപമാല റാണിയുടെ തിരുനാൾ വരെ നീളുന്ന ആഗോള പ്രാർഥനാവാരത്തിന് ഇതോടെ തുടക്കമാകും.
International
പാരീസ്: പാരീസിലെ ദേശീയ ഫുട്ബോൾ സ്റ്റേഡിയമായ ‘സ്റ്റാഡ് ദെ ഫ്രാൻസി’ൽ വെള്ളിയാഴ്ച രാത്രി നടന്ന പ്രാർഥനാസംഗമത്തിൽ ഒരു ലക്ഷത്തോളം കത്തോലിക്ക യുവതീ-യുവാക്കളാണു പങ്കെടുത്തത്.
സംഗീതവും ആത്മീയപ്രഭയും നിറഞ്ഞ ചടങ്ങിൽ, തിന്മകളെ ഉപേക്ഷിച്ച് നന്മയുടെയും സ്നേഹത്തിന്‍റെയും പാത തെരഞ്ഞെടുക്കാൻ മാർപാപ്പ യുവതയോട് ആഹ്വാനം ചെയ്തു.
പ്രാർഥനാഗാനങ്ങൾ ആലപിച്ചും വിശുദ്ധരുടെ തിരുശേഷിപ്പുകളോടും പാരീസിൽ നൂറ്റാണ്ടു കളായി വണങ്ങിപ്പോരുന്ന ഈശോമിശിഹായുടെ വിശുദ്ധ വസ്ത്രത്തോടും (ട്യൂണിക്കാ ക്രിസ്തി) ഭക്തിയോടെ പ്രണാമമർപ്പിച്ചുമുള്ള ഒന്നര മണിക്കൂറോളം നീണ്ട പ്രാർഥനാചടങ്ങുകൾ പാരീസ് നഗരത്തെ ഭക്തിദീപ്തിയിലാക്കി.
ഒരു റോക്ക് സ്റ്റാറിനെയെന്നപോലെ യുവാക്കൾ മാർപാപ്പയെ ഹർഷാരവത്തോടെ സ്വീകരിച്ചു. റോക്ക് സംഗീത പരിപാടികളെ ഓർമിപ്പിക്കുന്ന തരത്തിലുള്ള ആവേശമാണു സ്റ്റേഡിയത്തിൽ ദൃശ്യമായത്.
മാർപാപ്പയുടെ വരവിനുപിന്നാലെ ഫ്രഞ്ച് വിശുദ്ധരെയും ഫ്രാൻസിലെ സഭയുടെ ചരിത്രത്തെയും ആവിഷ്കരിക്കുന്ന കലാപരിപാടികളും കുതിരകളെ അണിനിരത്തിയുള്ള ദൃശ്യാവിഷ്കാരവും അതിമനോഹരമായ വെടിക്കെട്ടും അരങ്ങേറി.
International
പാരീസ്: ഫ്രാൻസ് സന്ദർശനത്തിന്‍റെ രണ്ടാം ദിനത്തിൽ പാരീസിനെ ജനസമുദ്രമാക്കി ലെയോ പതിനാലാമൻ മാർപാപ്പയുടെ വിശുദ്ധ കുർബാനയർപ്പണം.
പാരീസിലെ പ്ലാസ് ദെ ലാ കോൺകോർഡിലും ചരിത്രപ്രസിദ്ധമായ ഷാമ്പ്സ് എലിസേ തെരുവുകളിലുമായി തടിച്ചുകൂടിയ ഏഴു ലക്ഷത്തിലധികം വിശ്വാസികളെ സാക്ഷിനിർത്തിയാണ് മാർപാപ്പ വിശുദ്ധ കുർബാന അർപ്പിച്ചത്. റോഡിനിരുവശവും തിങ്ങിനിറഞ്ഞ പതിനായിരങ്ങളുടെ ഹർഷാരവങ്ങൾക്കിടയിലൂടെയാണ് വിശുദ്ധ കുർബാനയ്ക്കായി മാർപാപ്പ പോപ്പ് മൊബീലിൽ എത്തിയത്.
രാജ്യത്തിന്‍റെ കത്തോലിക്കാവിശ്വാസ പാരമ്പര്യത്തിന്‍റെ ആഴവും വീര്യവും വിളിച്ചോതുന്നതായിരുന്നു മാർപാപ്പയുടെ വിശുദ്ധ കുർബാനയർപ്പണം.
മനുഷ്യഹൃദയങ്ങളിലെ ദാഹം ശമിപ്പിക്കുന്ന ജീവന്‍റെ ഉറവ ഈശോമിശിഹയാണെന്ന് വിശുദ്ധകുർബാന മധ്യേ നൽകിയ സന്ദേശത്തിൽ മാർപാപ്പ ഓർമിപ്പിച്ചു. വിശുദ്ധ അഗസ്റ്റിന്‍റെ വാക്കുകൾ ഉദ്ധരിച്ചുകൊണ്ട്, അശാന്തമായ നമ്മുടെ ഹൃദയങ്ങൾക്ക് സന്തോഷവും സമാധാനവും നൽകുന്നത് ഈശോമിശിഹയാണെന്നും അദ്ദേഹം പറഞ്ഞു.
തങ്ങളുടെ വിശ്വാസം സ്വന്തമായി മാത്രം സൂക്ഷിക്കാതെ ചുറ്റുമുള്ള എല്ലാവരുമായും പങ്കുവയ്ക്കാൻ ഫ്രഞ്ച് കത്തോലിക്കരോട് ആഹ്വാനം ചെയ്ത മാർപാപ്പ, ഐറേനിയസ്, മാർട്ടിൻ, ഫ്രാൻസിസ് ഡി സെയിൽസ് തുടങ്ങിയ ഫ്രഞ്ച് വിശുദ്ധരെ സ്മരിക്കുകയും ചെയ്തു. പാരീസിൽനിന്ന് പരിശുദ്ധാത്മാവിന്‍റെ ജീവജലം ഫ്രാൻസിലുടനീളം ഒഴുകട്ടെയെന്നു പ്രാർഥിക്കുന്നതായി മാർപാപ്പ കൂട്ടിച്ചേർത്തു.
വിശുദ്ധ കുർബാനയ്ക്കുശേഷം കാത്തലിക് ഇൻസ്റ്റിറ്റ്യൂട്ട് ഓഫ് പാരീസിൽ പുതിയ വിശ്വാസികളെയും സഭാ നേതാക്കളെയും അഭിസംബോധന ചെയ്യവെ, ഫ്രാൻസിലെ കത്തോലിക്കാ സഭയിൽ ഉണ്ടാകുന്ന അദ്ഭുതകരമായ വളർച്ചയെയും നവവിശ്വാസികളുടെ പ്രവാഹത്തെയും മാർപാപ്പ പ്രകീർത്തിച്ചു.
പാരീസിൽ മാർപാപ്പ പങ്കെടുത്ത വെള്ളിയാഴ്ച രാത്രിയിലെ പ്രാർഥനാസംഗമത്തിലും ഇന്നലെ നടന്ന വിശുദ്ധ കുർബാനയിലുമുള്ള ചരിത്രപരമായ ജനപങ്കാളിത്തവും യുവാക്കളുടെ വലിയതോതിലുള്ള സാന്നിധ്യവും ഫ്രാൻസിലെ സഭയ്ക്ക് പുതിയ പ്രതീക്ഷ നൽകുന്നതാണ്.
പാരീസിലെ സന്ദർശനം പൂർത്തിയാക്കി മാർപാപ്പ ആഗോള മരിയൻ തീർഥാടനകേന്ദ്രമായ ലൂർദിലേക്ക് തിരിച്ചു. മാർപാപ്പയുടെ നേതൃത്വത്തിൽ ഇന്നു നടക്കുന്ന മരിയൻ പ്രദക്ഷിണത്തിലും വിശുദ്ധ കുർബാനയിലും പങ്കെടുക്കാനായി ലൂർദ് നഗരം തീർഥാടകരാൽ നിറഞ്ഞിരിക്കുകയാണ്. ഹോട്ടലുകളിലെല്ലാം ആഴ്ചകൾക്കു മുന്പേ ബുക്കിംഗ് പൂർത്തിയായിരുന്നു.
International
പാരീസ്: നാലു ദിവസത്തെ ഔദ്യോഗിക സന്ദർശനത്തിനായി ഫ്രാൻസിലെത്തിയ ലെയോ പതിനാലാമൻ മാർപാപ്പയ്ക്ക് പാരീസിൽ പ്രൗഢഗംഭീര വരവേല്പ്. 2008ൽ ബെനഡിക്‌ട് പതിനാറാമൻ മാർപാപ്പ നടത്തിയ സന്ദർശനത്തിനുശേഷം, നീണ്ട 18 വർഷങ്ങൾക്കുശേഷമാണ് ഒരു മാർപാപ്പ ഫ്രാൻസിൽ ഔദ്യോഗിക സന്ദർശനം നടത്തുന്നത്.
പാരീസ് ഓർലി വിമാനത്താവളത്തിൽ പ്രാദേശികസമയം ഇന്നലെ രാവിലെ പത്തിന് എത്തിയ മാർപാപ്പയെ ഫ്രഞ്ച് പ്രസിഡന്‍റ് ഇമ്മാനുവൽ മാക്രോണിന്‍റെ നേതൃത്വത്തിൽ ഔദ്യോഗിക സൈനിക ബഹുമതികളോടെയാണു സ്വീകരിച്ചത്. സ്വീകരണച്ചടങ്ങ് നടക്കുന്പോൾ ഫ്രാൻസിലെ എല്ലാ കത്തോലിക്കാ പള്ളികളിലും ഏഴു മിനിറ്റ് നേരം മണികൾ മുഴക്കി മാർപാപ്പയ്ക്ക് സ്വാഗതമോതി.
സ്വീകരണത്തിനുശേഷം പ്രസിഡന്‍റിന്‍റെ ഔദ്യോഗിക വസതിയായ എലീസി കൊട്ടാരത്തിൽ പ്രസിഡന്‍റ് ഇമ്മാനുവൽ മാക്രോണുമായി മാർപാപ്പ കൂടിക്കാഴ്ച നടത്തി. തുടർന്ന് രാഷ്‌ട്രീയ-സാമൂഹിക നയതന്ത്ര പ്രമുഖരെ അഭിസംബോധന ചെയ്ത മാർപാപ്പ, ആഗോള സമാധാനത്തിലും സാങ്കേതികവിദ്യയുടെ ഉപയോഗത്തിലും കാത്തുസൂക്ഷിക്കേണ്ട ധാർമികതയെക്കുറിച്ച് ശക്തമായ സന്ദേശം നൽകി.
ഇന്നലെ വൈകുന്നേരം യുനെസ്കോ ആസ്ഥാനം, നോത്ര് ദാം കത്തീഡ്രൽ എന്നിവിടങ്ങൾ മാർപാപ്പ സന്ദർശിച്ചു. വൈകുന്നേരം നാലിന് നഗരത്തിലെ പ്രധാന വീഥികളിലൂടെ നോത്ര് ദാം കത്തീഡ്രലിലേക്കു പോപ്പ് മൊബീലിൽ യാത്ര ചെയ്ത മാർപാപ്പയെ ഒരുനോക്കു കാണാൻ ജനലക്ഷങ്ങളാണ് റോഡിനിരുവശവും തടിച്ചുകൂടിയത്. ഈ സമയത്ത് പാരീസ് നഗരത്തിലെ എല്ലാ പള്ളികളിലും മണികൾ മുഴങ്ങി.
വൈകുന്നേരം 5.15ന് നോത്ര് ദാം കത്തീഡ്രലിൽ വൈദികർക്കും സന്യസ്തർക്കുമൊപ്പം സായാഹ്ന നമസ്കാരത്തിൽ പങ്കെടുത്ത മാർപാപ്പ, തുടർന്ന് കത്തീഡ്രലിനു മുന്നിൽ ജനങ്ങളെ അഭിസംബോധന ചെയ്തു. രാത്രി 7.30 മുതൽ 11 വരെ സെന്‍റ് ഡെനിസിലെ ‘സ്റ്റാഡ് ഡി ഫ്രാൻസ്’ സ്റ്റേഡിയത്തിൽ നടന്ന യുവജന പ്രാർഥനാസംഗമത്തിലും മാർപാപ്പ പങ്കെടുത്തു. ഒരു ലക്ഷത്തോളം യുവജനങ്ങളാണ് പ്രാർഥനാസംഗമത്തിൽ പങ്കെടുത്തത്.
ഇന്നു തിരക്കിട്ട പരിപാടികളാണു മാർപാപ്പയ്ക്കുള്ളത്. രാവിലെ ഒന്പതിന് പാരീസിലെ കത്തോലിക്കാ സന്നദ്ധ സംഘടന സംഘടിപ്പിക്കുന്ന ചടങ്ങിൽ അഭയാർഥികളും കുടിയേറ്റക്കാരുമായും മാർപാപ്പ സംവദിക്കും. ഉച്ചകഴിഞ്ഞ് നഗരത്തിലെ കോൺകോർഡ് ചത്വരത്തിൽ വിശുദ്ധ കുർബാന അർപ്പിക്കും. ആറു ലക്ഷത്തോളം ആളുകളാണ് വിശുദ്ധ കുർബാനയ്ക്കായി രജിസ്റ്റർ ചെയ്തിട്ടുള്ളത്.
International
സെന്‍റ് ലൂയിസ് (അമേരിക്ക): റേഡിയോ, ടെലിവിഷൻ പരിപാടികളിലൂടെയും ഗ്രന്ഥരചനയിലൂടെയും ദശലക്ഷക്കണക്കിന് ആളുകളിലേക്ക് സുവിശേഷ സന്ദേശമെത്തിച്ച ആർച്ച്ബിഷപ് ഫുൾട്ടൺ ജെ. ഷീൻ ഇനി വാഴ്ത്തപ്പെട്ടവൻ.
അമേരിക്കയിലെ മിസോറി സംസ്ഥാനത്തിൽപ്പെട്ട സെന്‍റ് ലൂയിസ് നഗരത്തിലെ ‘ദ ഡോം അറ്റ് അമേരിക്കാസ് സെന്‍ററിൽ’ നടന്ന ഭക്തിനിർഭരവും പ്രൗഢഗംഭീരവുമായ ചടങ്ങിലായിരുന്നു ചരിത്രപ്രധാനമായ പ്രഖ്യാപനം.
തിരുക്കർമങ്ങളിൽ മാർപാപ്പയുടെ പ്രത്യേക പ്രതിനിധിയായി സുവിശേഷവത്കരണത്തിനായുള്ള വത്തിക്കാൻ കാര്യാലയം പ്രോ-പ്രീഫെക്‌ട് കർദിനാൾ ലൂയിസ് അന്‍റോണിയോ ടാഗ്ലെ മുഖ്യകാർമികത്വം വഹിച്ചു. മാർപാപ്പയുടെ സന്ദേശം അദ്ദേഹം ലത്തീൻ ഭാഷയിൽ വായിച്ചു. തുടർന്ന് പിയോറിയ ബിഷപ് ലൂയിസ് റ്റിൽക്ക ഇത് ഇംഗ്ലീഷിൽ വായിച്ചു. അമേരിക്കയിലെയും വിവിധ വിദേശരാജ്യങ്ങളിലെയും എൺപതോളം ബിഷപ്പുമാരും ആയിരത്തിലധികം വൈദികരും 80,000ത്തോളം വിശ്വാസികളും ചടങ്ങിൽ പങ്കെടുത്തു.
ആർച്ച്ബിഷപ് ഷീന്‍റെ ചരമവാർഷിക ദിനമായ ഡിസംബർ ഒന്പത് അദ്ദേഹത്തിന്‍റെ തിരുനാൾദിനമായി മാർപാപ്പ പ്രഖ്യാപിച്ചു.
ജനനസമയത്ത് ഹൃദയമിടിപ്പ് നിലയ്ക്കുകയും 61 മിനിറ്റുകളോളം ജീവന്‍റെ ലക്ഷണങ്ങളില്ലാതിരിക്കുകയും ചെയ്ത അമേരിക്കയിലെ ഇല്ലിനോയ് സ്വദേശിയായ ജയിംസ് ഫുൾട്ടൺ എൻഗ്സ്ട്രോം എന്ന കുഞ്ഞിന് ആർച്ച്ബിഷപ് ഷീന്‍റെ മധ്യസ്ഥതയാൽ ജീവൻ തിരിച്ചുകിട്ടിയത് അദ്ഭുത രോഗശാന്തിയായി വത്തിക്കാൻ ഔദ്യോഗികമായി അംഗീകരിക്കുകയായിരുന്നു. പൂർണ ആരോഗ്യവാനായ ജയിംസ് എൻഗ്സ്ട്രോമും കുടുംബവുമാണ് തിരുക്കർമങ്ങളിൽ വാഴ്ത്തപ്പെട്ട ഷീന്‍റെ തിരുശേഷിപ്പ് അൾത്താരയിലേക്കു സംവഹിച്ചത്.
വെറുമൊരു പ്രശസ്തനായ പ്രസംഗകനോ ടെലിവിഷൻ വ്യക്തിത്വമോ ആയതുകൊണ്ടല്ല ഫുൾട്ടൺ ഷീൻ വിശുദ്ധിയുടെ പദവിയിലേക്ക് ഉയർന്നതെന്നും ഈശോമിശിഹായുമായുള്ള അഗാധമായ ബന്ധവും വിശുദ്ധ കുർബാനയോടുള്ള ഭക്തിയും എളിയവരോടുള്ള കരുണയുമാണ് അദ്ദേഹത്തെ നയിച്ചതെന്നും കർദിനാൾ ടാഗ്ലെ വചനസന്ദേശത്തിൽ പറഞ്ഞു.
തന്‍റെ പ്രസംഗങ്ങൾ വഴി എത്രപേർ കത്തോലിക്കാസഭയിലേക്ക് കടന്നുവന്നുവെന്ന് പന്ത്രണ്ടാം പീയൂസ് മാർപാപ്പ ചോദിച്ചപ്പോൾ, “ആ കണക്കുകൾ ഞാൻ സൂക്ഷിക്കാറില്ല, അത് എന്‍റെ കഴിവുകൊണ്ടാണെന്ന അഹങ്കാരം എനിക്കുണ്ടാകാതിരിക്കാൻ” എന്നു മറുപടി നൽകിയ ഫുൾട്ടൺ ഷീന്‍റെ ലാളിത്യത്തെക്കുറിച്ച് കർദിനാൾ ഓർമിപ്പിച്ചു.
എമ്മി പുരസ്കാരം നേടിയ ‘ലൈഫ് ഈസ് വർത്ത് ലിവിംഗ്’ എന്ന ടെലിവിഷൻ പരിപാടിയിലൂടെയും റേഡിയോ സന്ദേശങ്ങളിലൂടെയും ദശലക്ഷക്കണക്കിന് ആളുകളെ സ്വാധീനിച്ച ആർച്ച്ബിഷപ് ഷീൻ, ആധുനിക മാധ്യമ സാങ്കേതികവിദ്യകളെ ദൈവവചന പ്രഘോഷണത്തിനായി എങ്ങനെ ഫലപ്രദമായി ഉപയോഗിക്കാമെന്നു ലോകത്തിനു കാണിച്ചുകൊടുത്തു.
റഫറൻസുകളോ ടെലിപ്രോംപ്റ്ററോ ഇല്ലാതെ, ഒരു ചോക്ക്ബോർഡ് മാത്രം ഉപയോഗിച്ച് സങ്കീർണമായ തത്വചിന്തകളും ദൈവവചനവും ലളിതമായി അവതരിപ്പിക്കാനുള്ള അദ്ദേഹത്തിന്‍റെ കഴിവ് ലോകശ്രദ്ധ നേടിയിരുന്നു.
International
പാരീസ്: ശാസ്ത്രത്തെയും നിർമിതബുദ്ധിയെയും ലാഭത്തിനുവേണ്ടി മാത്രം ഉപയോഗിക്കുന്ന പ്രവണത ആശങ്കാജനകമാണെന്ന് ലെയോ പതിനാലാമൻ മാർപാപ്പ. നാലു ദിവസത്തെ ഫ്രാൻസ് സന്ദർശനത്തിനായി പാരീസിലെത്തിയ മാർപാപ്പ എലീസി കൊട്ടാരത്തിൽ ഭരണാധികാരികളെയും നയതന്ത്ര പ്രതിനിധികളെയും സിവിൽ സമൂഹത്തെയും അഭിസംബോധന ചെയ്തു സംസാരിക്കുകയായിരുന്നു.
ജീനുകളിലെ മാറ്റങ്ങൾ, വാടകഗർഭധാരണം, അവയവക്കച്ചവടം, സ്വന്തം മരണം സ്വയം നിശ്ചയിക്കാനുള്ള അവസരമൊരുക്കൽ എന്നിവ പ്രോത്സാഹിപ്പിക്കുന്നതിലേക്ക് സാങ്കേതികവിദ്യ വഴിമാറരുതെന്ന് മാർപാപ്പ മുന്നറിയിപ്പ് നൽകി. യന്ത്രങ്ങളുടെ ലോകത്ത് മാനവികത നഷ്‌ടപ്പെടാതിരിക്കാൻ ധാർമികമായ തിരിച്ചറിവ് വളർത്തുന്ന വിദ്യാഭ്യാസം അത്യന്താപേക്ഷിതമാണെന്നും മാർപാപ്പ പറഞ്ഞു. മനുഷ്യജീവനെ പരസ്പര ബഹുമാനത്തോടെ സംരക്ഷിക്കുക എന്നത് ഏവരുടെയും കടമയാണെന്നും അദ്ദേഹം ഉദ്ബോ ധിപ്പിച്ചു.
സമീപകാലത്തു ഫ്രാൻസ് ദയാവധവും അപരസഹായ ത്തോടെയുള്ള സ്വയംഹത്യയും നിയമവിധേയമാക്കിയിരുന്നു. ബെൽജിയം, നെതർലാൻഡ്സ്, ലക്സംബർഗ്, സ്പെയിൻ എന്നിവയ്ക്കുശേഷം ഇതു നടപ്പിലാക്കുന്ന അഞ്ചാമത്തെ യൂറോപ്യൻ രാജ്യമാണ് ഫ്രാൻസ്. ഈ പശ്ചാത്തലത്തിലാണ് ജീവന്‍റെ സംരക്ഷണത്തിനായുള്ള മാർപാപ്പയുടെ ആഹ്വാനം.
ശക്തിയുടെ സന്തുലിതാവസ്ഥയല്ല സമാധാനമെന്നും അതു നീതിയിലൂടെയും സംവാദത്തിലൂടെയും നിർമിച്ചെടുക്കേണ്ടതാണെന്നും പറഞ്ഞ മാർപാപ്പ, ആണവായുധങ്ങൾ നിരോധിക്കണമെന്നും പശ്ചിമേഷ്യയിലെ യുദ്ധങ്ങൾ അവസാനിപ്പിക്കാൻ ഫ്രാൻസ് മുന്നിൽ നിൽക്കണമെന്നും അഭ്യർഥിച്ചു.
ഫ്രാൻസിലെ കടുത്ത മതനിരപേക്ഷതയെക്കുറിച്ച് പരാമർശിക്കവെ, യഥാർഥ മതനിരപേക്ഷത എന്നതു പൊതുമണ്ഡലത്തിൽനിന്ന് മതത്തെ ഒഴിവാക്കലല്ലെന്നും പൊതുനന്മയ്ക്കായി ഭരണകൂടവും മതസ്ഥാപനങ്ങളും തമ്മിൽ തുറന്ന സംവാദത്തിലേർപ്പെടുകയാണു വേണ്ടതെന്നും മാർപാപ്പ ചൂണ്ടിക്കാട്ടി. വിശുദ്ധ വിൻസെന്‍റ് ഡി പോളിന്‍റെ ജീവകാരുണ്യ പാരമ്പര്യം പിന്തുടർന്ന് ഫ്രഞ്ച് കത്തോലിക്കാ സമൂഹം നടത്തുന്ന സാമൂഹിക സേവനങ്ങളെ മാർപാപ്പ അഭിനന്ദിച്ചു.
നൂറ്റാണ്ടുകളായി ലോകത്തിന്‍റെ സംസ്കാരത്തിനും കലയ്ക്കും ചിന്തകൾക്കും വെളിച്ചം വീശിയ ഫ്രഞ്ച് പാരമ്പര്യത്തെ അദ്ദേഹം പ്രകീർത്തിച്ചു. ഫ്രഞ്ച് വിപ്ലവത്തിന്‍റെ പ്രഖ്യാപിത മുദ്രാവാക്യമായ ‘സ്വാതന്ത്ര്യം, സമത്വം, സാഹോദര്യം’ എന്നത് സുവിശേഷ സന്ദേശങ്ങളിൽനിന്ന് പ്രചോദനം ഉൾക്കൊള്ളുന്ന സാർവത്രിക ധാർമിക മൂല്യങ്ങളാണെന്ന് മാർപാപ്പ അനുസ്മരിച്ചു.
2019ലെ തീപിടിത്തത്തിൽ തകർന്ന നോത്ര് ദാം കത്തീഡ്രലിന്‍റെ പുനർനിർമാണം അദ്ഭുതകരമായ സാങ്കേതിക നേട്ടമാണെന്നു വിശേഷിപ്പിച്ച മാർപാപ്പ, അതിനായി പ്രവർത്തിച്ച ശില്പികളെയും വിദഗ്ധരെയും പ്രത്യേകം അഭിനന്ദിച്ചു. ‘തകർന്നുപോയെന്നു കരുതുന്ന ഒന്ന് പരസ്പര സഹകരണത്തിലൂടെ എങ്ങനെയെല്ലാം പുനർജനിക്കാം എന്നതിന്‍റെ തെളിവാണ് നോത്ര് ദാമിന്‍റെ പുനരുത്ഥാനം’ -മാർപാപ്പ കൂട്ടിച്ചേർത്തു.
International
പാരീസ്: ഫ്രാൻസ് സന്ദർശനത്തിന്‍റെ ഭാഗമായി പാരീസിൽ ലെയോ പതിനാലാമൻ മാർപാപ്പ അർപ്പിക്കുന്ന വിശുദ്ധ കുർബാനയിൽ പങ്കെടുക്കാൻ റിക്കാർഡ് രജിസ്ട്രേഷൻ.
പാരീസിലെ പ്ലേസ് ഡി ലാ കോൺകോർഡിലും ഷാംപ്സ് എലിസേയിലുമായി നടക്കുന്ന വിശുദ്ധ കുർബാനയിലേക്ക് ഇതുവരെ ആറുലക്ഷത്തോളം വിശ്വാസികൾ രജിസ്റ്റർ ചെയ്തതായി സംഘാടകർ അറിയിച്ചു.
തീർഥാടകരുടെ എണ്ണം പ്രതീക്ഷിച്ചതിലും വളരെ ഉയർന്നതോടെ തിരക്ക് നിയന്ത്രിക്കുന്നതിനായി സ്ഥലവിസ്തൃതി കൂട്ടാനും പ്രവേശനമേഖലകൾ വിപുലീകരിക്കാനും പാരീസ് രൂപതയും സുരക്ഷാ വിഭാഗവും തീരുമാനിച്ചു.
പ്ലേസ് ഡി ലാ കോൺകോർഡിനും ഷാംപ്സ് എലിസേയ്ക്കും പുറമെ സമീപ പ്രദേശങ്ങളിലേക്കും പ്രവേശന സോണുകൾ വികസിപ്പിച്ചാണ് സുരക്ഷാ ക്രമീകരണങ്ങൾ ശക്തമാക്കുന്നത്. ഈ മാസം 25 മുതൽ 28 വരെയാണു മാർപാപ്പയുടെ ഫ്രാൻസ് സന്ദർശനം. 26നാണ് മാർപാപ്പ പാരീസിൽ വിശുദ്ധ കുർബാന അർപ്പിക്കുന്നത്. 18 വർഷത്തിനുശേഷമാണ് ഒരു മാർപാപ്പ ഫ്രഞ്ച് മണ്ണിലെത്തുന്നത്.
അതിനാൽത്തന്നെ വലിയ ആവേശത്തോടെയാണ് സർക്കാരും രാജ്യത്തെ ജനതയും ഈ സന്ദർശനത്തെ കാണുന്നത്. പാരീസിനുപുറമെ ലൂർദ്, മെറ്റ്സ് നഗരങ്ങളും മാർപാപ്പ സന്ദർശിക്കും. മരിയൻ തീർഥാടനകേന്ദ്രമായ ലൂർദിൽ നടക്കുന്ന വിശുദ്ധ കുർബാനയിലേക്കും കനത്ത രജിസ്ട്രേഷനാണു രേഖപ്പെടുത്തുന്നത്.
International
വത്തിക്കാൻ സിറ്റി: ലെയോ പതിനാലാമൻ മാർപാപ്പയുടെ സ്വകാര്യ കുറിപ്പുകളും പ്രസംഗങ്ങളും അടങ്ങിയ "ഫ്രീഡം അണ്ടർ ഗ്രേസ്: റിഫ്ലക്‌ഷൻസ് ഓൺ ദ സ്പിരിച്വൽ ട്രഡിഷൻ ദാറ്റ് ഫോംഡ് മീ' എന്ന പുസ്തകത്തിന്‍റെ ഇംഗ്ലീഷ് പതിപ്പ് പുറത്തിറങ്ങി.
യുഎസ്, യുകെ, ഓസ്‌ട്രേലിയ ഉൾപ്പടെയുള്ള രാജ്യങ്ങളിൽ പുസ്തകം വില്പനയ്‌ക്കെത്തി. വത്തിക്കാൻ പബ്ലിഷിംഗ് ഹൗസ് "ലീബെരി സൊത്തോ ലാ ഗ്രാസിയ' എന്നപേരിൽ മുന്പ് പ്രസിദ്ധീകരിച്ച ഇറ്റാലിയൻ പതിപ്പിന്‍റെ ഇംഗ്ലീഷ് പരിഭാഷയാണിത്.
തന്‍റെ ആത്മീയജീവിതത്തെയും ലോകവീക്ഷണത്തെയും സ്വാധീനിച്ച വിശുദ്ധ അഗസ്റ്റിന്‍റെ പാരമ്പര്യത്തെക്കുറിച്ചുള്ള മാർപാപ്പയുടെ ചിന്തകളാണ് പുസ്തകത്തിന്‍റെ പ്രധാന പ്രമേയം.
അഗസ്റ്റീനിയൻ സന്യാസസമൂഹത്തിന്‍റെ പ്രിയോർ ജനറലായിരുന്ന കാലത്തെ ധ്യാനങ്ങൾ, പ്രസംഗങ്ങൾ, വ്യക്തിഗത കുറിപ്പുകൾ എന്നിവയാണ് പുസ്തകത്തിലുള്ളത്. 9/11 ഭീകരാക്രമണം, രാഷ്‌ട്രീയ പ്രത്യയശാസ്ത്രങ്ങൾ, ദാരിദ്ര്യം, മനുഷ്യാവകാശ പ്രശ്നങ്ങൾ എന്നിവയോടുള്ള സഭയുടെ പ്രതികരണങ്ങൾ പുസ്തകത്തിൽ ചർച്ച ചെയ്യുന്നു.
പ്രശസ്ത ഹാസ്യനടൻ സ്റ്റീഫൻ കോൾബെർട്ട്, പ്രമുഖ നറേറ്റർ സ്‌കോട്ട് ബ്രിക്ക് എന്നിവരാണ് പുസ്തകത്തിന്‍റെ ഓഡിയോ പതിപ്പിന് ശബ്‌ദം നൽകിയിരിക്കുന്നത്.
International
വത്തിക്കാൻ സിറ്റി: സെപ്റ്റംബർ 11 ഭീകരാക്രമണത്തിന്‍റെ 25-ാം വാർഷികവേളയിൽ, ദുരന്തത്തിൽ ജീവൻ പൊലിഞ്ഞവർക്കായി പ്രാർഥിച്ചും ലോകസമാധാനത്തിനായി ആഹ്വാനം ചെയ്തും ലെയോ പതിനാലാമൻ മാർപാപ്പ.
വത്തിക്കാനിലെ സെന്‍റ് പീറ്റേഴ്സ് ചത്വരത്തിൽ നടന്ന ത്രികാല പ്രാർഥനയ്ക്കുശേഷം വിശ്വാസികളെ അഭിസംബോധന ചെയ്യുകയായിരുന്നു അദ്ദേഹം.
ദുരന്തത്തിൽ ജീവൻ നഷ്‌ടപ്പെട്ടവർക്കായും മുറിവുകൾ ഇപ്പോഴും പേറുന്നവർക്കായും തന്‍റെ പ്രാർഥനകൾ പുതുക്കുന്നുവെന്നും വ്യക്തമാക്കി. തുടർന്ന് ലോകസമാധാനത്തിനായി അടിയന്തര പ്രാർഥനാ ആഹ്വാനവും അദ്ദേഹം നടത്തി.
International
വത്തിക്കാൻ സിറ്റി: യുക്രെയ്നിൽ തുടരുന്ന ആക്രമണസംഭവങ്ങൾ അടിയന്തരമായി അവസാനിപ്പിക്കണമെന്ന് വീണ്ടും ആഹ്വാനം ചെയ്ത് ലെയോ പതിനാലാമൻ മാർപാപ്പ.
യുക്രേനിയൻ നഗരങ്ങൾക്കുനേരേ നടക്കുന്ന ശക്തമായ ആക്രമണങ്ങളെക്കുറിച്ചുള്ള വാർത്തകൾ ‘തകരുന്ന ഹൃദയത്തോടെയാണ്’താൻ കാണുന്നതെന്ന് ഇന്നലെ ത്രികാല പ്രാർഥനയ്ക്കുശേഷം തീർഥാടകരെ അഭിസംബോധന ചെയ്യവെ മാർപാപ്പ പറഞ്ഞു.
വർഷങ്ങളായി ഭയത്തിലും ഭീതിയിലും കഴിയുന്ന ആ ജനതയുടെ കഷ്‌ടപ്പാടുകൾ കാണുമ്പോൾ തന്‍റെ ഹൃദയം തകരുകയാണെന്നു പറഞ്ഞ മാർപാപ്പ, അക്രമവും നശീകരണവും അവസാനിപ്പിച്ച് സമാധാനത്തിന്‍റെ പാതയിലേക്ക് മനസ് തുറക്കണമെന്നും അഭ്യർഥിച്ചു.
International
വത്തിക്കാൻ സിറ്റി: മിന്നൽപ്രളയത്തിൽ കടുത്ത ദുരിതം നേരിടുന്ന നേപ്പാളിന് ആശ്വാസവുമായി ലെയോ പതിനാലാമൻ മാർപാപ്പ. ദുരന്തബാധിതരായ ജനങ്ങൾക്ക് ആവശ്യമായ അടിയന്തര സഹായങ്ങൾ മാർപാപ്പ കൈമാറി. വത്തിക്കാന്‍റെ കാരുണ്യ പ്രവർത്തനങ്ങൾക്കായുള്ള കാര്യാലയം വഴിയാണ് സാമ്പത്തികസഹായം എത്തിച്ചത്.
നേപ്പാളിലുണ്ടായ പ്രകൃതിദുരന്തത്തിൽ അതീവ ദുഃഖവും പ്രാർഥനകളും അറിയിച്ചുകൊണ്ട് മാർപാപ്പ ടെലിഗ്രാം സന്ദേശം അയച്ചിരുന്നു. ഇതിനുപിന്നാലെയാണ് അപ്പസ്തോലിക് നുൺഷ്യേച്ചറുമായി സഹകരിച്ച് ജനങ്ങളുടെ അടിയന്തര ആവശ്യങ്ങൾക്കായി സാമ്പത്തിക സഹായം നൽകിയത്. ദുരിതബാധിതർക്കു ഭക്ഷണം, താത്കാലിക പാർപ്പിടം, മറ്റ് അടിസ്ഥാന സൗകര്യങ്ങൾ എന്നിവ ഉറപ്പാക്കാൻ ഈ തുക വിനിയോഗിക്കും.
ഏറ്റവും ദുർബലരായ ജനങ്ങളോട് മാർപാപ്പയ്ക്കുള്ള സാമീപ്യത്തിന്‍റെയും സഭ അവരെ ചേർത്തുപിടിക്കുന്നു എന്നതിന്‍റെയും പ്രകടമായ തെളിവാണ് ഈ സഹായമെന്ന് കാരുണ്യ പ്രവർത്തനങ്ങൾക്കായുള്ള കാര്യാലയം അധ്യക്ഷൻ ആർച്ച്ബിഷപ് ലൂയിസ് മാരിൻ ഡി സാൻ മാർട്ടിൻ പറഞ്ഞു.
ഇറ്റാലിയൻ മെത്രാൻ സമിതിയും നേപ്പാളിന് സഹായവുമായി രംഗത്തെത്തിയിട്ടുണ്ട്. ദുരിതാശ്വാസ പ്രവർത്തനങ്ങൾക്കായി സമിതി അഞ്ചു ലക്ഷം യൂറോ അനുവദിച്ചു.
International
വത്തിക്കാൻ: പ്രാർഥനയും സാമൂഹിക നീതിക്കുവേണ്ടിയുള്ള പ്രവർത്തനങ്ങളും പരസ്പര പൂരകങ്ങളും വേർപിരിക്കാനാവാത്തതുമാണെന്ന വിശുദ്ധ വിൻസെന്‍റ് ഡി പോളിന്‍റെ പഠനങ്ങളെ അനുസ്മരിപ്പിച്ച് ലെയോ പതിനാലാമൻ മാർപാപ്പ.
അമേരിക്കയിലെ സെന്‍റ് വിൻസെന്‍റ് ഡി പോൾ സൊസൈറ്റിയിൽ നിന്നുള്ള പ്രതിനിധി സംഘവുമായി നടത്തിയ കൂടിക്കാഴ്ചയിലായിരുന്നു മാർപാപ്പ ഇക്കാര്യം അനുസ്മരിച്ചത്.
പാവപ്പെട്ടവരെ സംരക്ഷിക്കുന്നത് ക്രിസ്തുവിൽ അധിഷ്ഠിതമാണെന്നും അവരെ സേവിക്കുന്നവരോട് ദൈവം എപ്പോഴും ഉദാരമനസ്കനായിരിക്കുമെന്നുമുള്ള വിശുദ്ധ അഗസ്റ്റിന്‍റെ പഠനവും മാർപാപ്പ ഉദ്ധരിച്ചു.
പാവപ്പെട്ടവരിൽ ക്രിസ്തുവിനെ സേവിക്കുന്നതിലൂടെ, ദൈവകൃപ നിങ്ങളുടെ ഹൃദയങ്ങളെയും മനസുകളെയും ശുദ്ധീകരിക്കുമെന്നും മാർപാപ്പ പറഞ്ഞു.
International
വത്തിക്കാൻ സിറ്റി: പ്രാദേശിക പാരമ്പര്യങ്ങളുടെ അനുയോജ്യമായ കൂടിച്ചേരലുകൾ പ്രോത്സാഹിപ്പിക്കുന്നതോടൊപ്പം തന്നെ കത്തോലിക്കാസഭയുടെ പവിത്രമായ സംഗീതപാരമ്പര്യം വരുംതലമുറകൾക്കായി സംരക്ഷിക്കപ്പെടണമെന്നു ലെയോ പതിനാലാമൻ മാർപാപ്പ.
ആരാധനക്രമത്തിൽ വിശുദ്ധ സംഗീതത്തിന് വലിയ പ്രാധാന്യമുണ്ടെന്നും വത്തിക്കാനിലെ സെന്‍റ് പീറ്റേഴ്സ് ബസിലിക്കയിൽ നടന്ന പ്രതിവാര കൂടിക്കാഴ്ചയിൽ വിശ്വാസികളെ അഭിസംബോധന ചെയ്യവേ മാർപാപ്പ വ്യക്തമാക്കി.
രണ്ടാം വത്തിക്കാൻ കൗൺസിലിന്‍റെ ‘സാക്രോസാങ്തം കോൺസിലിയം’ എന്ന പ്രമാണരേഖയെ ആസ്പദമാക്കിയുള്ള പ്രബോധന പരമ്പരയുടെ ഭാഗമായാണ് മാർപാപ്പ വിശുദ്ധ സംഗീതത്തിന്‍റെ പ്രാധാന്യത്തെക്കുറിച്ച് വിശദീകരിച്ചത്.
"പാടുന്നത് സ്‌നേഹിക്കുന്നവരുടെ ലക്ഷണമാണ്'' എന്ന വിശുദ്ധ അഗസ്റ്റിന്‍റെ വാക്കുകൾ ഉദ്ധരിച്ച മാർപാപ്പ, സംഗീതം വിശ്വാസികൾക്കിടയിൽ ഐക്യവും ദൈവസ്തുതിയും വളർത്തുന്നുവെന്നും ചൂണ്ടിക്കാട്ടി.
സഭയുടെ സംഗീതപാരമ്പര്യത്തിന് വലിയ വിലയുണ്ട്. ഗ്രിഗോറിയൻ സംഗീതത്തിനും പൈപ്പ് ഓർഗനും ആരാധനക്രമത്തിൽ പ്രത്യേക സ്ഥാനമുണ്ട്. എങ്കിലും പ്രാദേശികവും അനുയോജ്യവുമായ മറ്റ് വാദ്യോപകരണങ്ങളും സംഗീതരൂപങ്ങളും ഉപയോഗിക്കാമെന്നും മാർപാപ്പ കൂട്ടിച്ചേർത്തു.
International
വത്തിക്കാൻ സിറ്റി: വെസ്റ്റ് ബാങ്കിലെ പലസ്തീൻ ജനതയ്‌ക്കെതിരേ തുടർച്ചയായുണ്ടാകുന്ന അക്രമങ്ങൾ ഉടനടി അവസാനിപ്പിക്കണമെന്ന് ലെയോ പതിനാലാമൻ മാർപാപ്പ. ഇന്നലെ സെന്‍റ് പീറ്റേഴ്സ് ചത്വരത്തിൽ ത്രികാല പ്രാർഥനയ്ക്കുശേഷം തീർഥാടകരെ അഭിസംബോധന ചെയ്യുകയായിരുന്നു മാർപാപ്പ.
മേഖലയിൽ ശാശ്വത സമാധാനം ഉറപ്പാക്കാൻ ‘ദ്വിരാഷ്‌ട്ര പരിഹാരം’നടപ്പിലാക്കുന്നതിന് അന്താരാഷ്‌ട്ര സമൂഹം മുൻകൈയെടുക്കണമെന്നും മാർപാപ്പ ആവശ്യപ്പെട്ടു.
ഇസ്രയേലും പലസ്തീനും അന്താരാഷ്‌ട്രതലത്തിൽ അംഗീകരിക്കപ്പെട്ട അതിർത്തികൾക്കുള്ളിൽ സമാധാനത്തിലും സുരക്ഷിതത്വത്തിലും കഴിയുന്ന ദ്വിരാഷ്‌ട്ര പരിഹാരമാണു മേഖലയിലെ പ്രശ്നങ്ങൾക്ക് ഏക പരിഹാരമെന്ന വത്തിക്കാന്‍റെ നിലപാട് മാർപാപ്പ വീണ്ടും വ്യക്തമാക്കിയിരിക്കുകയാണ്.
ബലപ്രയോഗത്തിലൂടെയല്ല, മറിച്ച് സംഭാഷണങ്ങളിലൂടെയും സഹകരണത്തിലൂടെയും മാത്രമേ ശാശ്വത സമാധാനം സാധ്യമാകൂവെന്നും മാർപാപ്പ ഓർമിപ്പിച്ചു.
International
വത്തിക്കാൻ സിറ്റി: സുഡാൻ, യുക്രെയ്ൻ, റഷ്യ എന്നിവിടങ്ങളിൽ തുടരുന്ന അക്രമങ്ങളിൽ കടുത്ത ആശങ്ക രേഖപ്പെടുത്തി ലെയോ പതിനാലാമൻ മാർപാപ്പ.
അക്രമങ്ങൾ വിതയ്ക്കുന്നവരുടെ മനസിന് മാറ്റമുണ്ടാകണമെന്നും നിരപരാധികളായ സാധാരണക്കാർ കൊല്ലപ്പെടുന്നത് അടിയന്തരമായി അവസാനിപ്പിക്കണമെന്നും ഇന്നലെ സെന്‍റ് പീറ്റേഴ്സ് ചത്വരത്തിൽ ത്രികാല ജപ പ്രാർഥനയ്ക്കുശേഷം തീർഥാടകരെ അഭിസംബോധന ചെയ്യവെ മാർപാപ്പ ആവശ്യപ്പെട്ടു.
‘യുദ്ധം കൂടുതൽ യുദ്ധങ്ങളെയല്ലാതെ മറ്റൊന്നും സൃഷ്‌ടിക്കില്ല. അത് അളവറ്റ ദുരിതങ്ങൾക്കു കാരണമാകുന്നു. അക്രമത്തിന്‍റെ ഈ ദുരന്തചക്രം അവസാനിപ്പിച്ച് സമാധാനത്തിനായി നയതന്ത്രത്തിനും സംഭാഷണങ്ങൾക്കും വഴിതുറക്കേണ്ട സമയമാണിത്-മാർപാപ്പ പറഞ്ഞു.
സുഡാനിൽ അടിയന്തര വെടിനിർത്തൽ പ്രാബല്യത്തിൽ വരുത്താനുള്ള പരിശ്രമങ്ങൾക്ക് പിന്തുണ നൽകാൻ രാജ്യാന്തരസമൂഹത്തോട് മാർപാപ്പ ആവശ്യപ്പെട്ടു.
യുക്രെയ്നിലും റഷ്യയിലും വർധിച്ചുവരുന്ന സാധാരണക്കാരുടെ മരണങ്ങളിൽ ആശങ്ക രേഖപ്പെടുത്തിയ മാർപാപ്പ, ഇരുവിഭാഗവും സാധാരണക്കാരെ ലക്ഷ്യമിട്ടുള്ള ആക്രമണങ്ങൾ അവസാനിപ്പിക്കണമെന്നും ആവശ്യപ്പെട്ടു.
International
അസീസി: സ്വാർഥതയും അക്രമവും നിറഞ്ഞ ലോകത്തു ഭയത്തെയും നിരാശയെയും അതിജീവിച്ചു സ്നേഹത്തിന്റെ പുതിയ സംസ്കാരം പടുത്തുയർത്താൻ ലെയോ മാർപാപ്പയുടെ ആഹ്വാനം.
ഇറ്റലിയിലെ അസീസിയിൽ സംഘടിപ്പിച്ച ‘ഗോ! 2026’ ഫ്രാൻസിസ്കൻ യുവജനസമ്മേളനത്തിന്‍റെ ഭാഗമായി സാന്താ മരിയ ദെല്ലി ആഞ്ചലി (മാലാഖമാരുടെ രാജ്ഞിയായ മറിയത്തിന്‍റെ) പള്ളിയിൽ വിശുദ്ധ കുർബാനമധ്യേ സന്ദേശം നൽകുകയായിരുന്നു മാർപാപ്പ.
സമൂഹത്തിലെ പാർശ്വവത്കരിക്കപ്പെട്ട മേഖലകളിലേക്ക് ഇറങ്ങിച്ചെല്ലാനും പീഡിപ്പിക്കപ്പെടുന്നവരുടെ മുറിവുകളിൽ ആശ്വാസമേകാനും അദ്ദേഹം യുവാക്കളോട് ആവശ്യപ്പെട്ടു.
“നീതിനിഷേധം മൂലം സാധാരണക്കാരുടെ സ്വപ്നങ്ങൾ തകർക്കപ്പെടുന്ന ഇടങ്ങളിലേക്ക് നിങ്ങൾ കടന്നുചെല്ലണം. ഭയവും നിരാശയും ഉപേക്ഷിച്ച്, ദൈവവചനത്തിൽ വിശ്വസിച്ച് ഈ യുഗത്തിലെ പുതിയ വിശുദ്ധരാകാൻ നിങ്ങൾ ധൈര്യം കാണിക്കണം. ഭയവും അജ്ഞതയുമാണ് മനുഷ്യർക്കിടയിൽ വേലിക്കെട്ടുകളും വർഗീയതയും സൃഷ്‌ടിക്കുന്നത്.
മതം രാഷ്‌ട്രീയലാഭങ്ങൾക്കായി ചൂഷണം ചെയ്യപ്പെടരുത്” -മാർപാപ്പ പറഞ്ഞു. ഫ്രാൻസിസ്കൻ സന്യാസ സമൂഹത്തിന്‍റെ ആത്മീയകേന്ദ്രമായ പോർസ്യുങ്കുളയിൽ നടന്ന പ്രാർഥനകൾക്കുശേഷമാണ് മാർപാപ്പ വത്തിക്കാനിലേക്കു മടങ്ങിയത്.
International
വത്തിക്കാൻ സിറ്റി: ലെയോ പതിനാലാമൻ മാർപാപ്പ നവംബർ മാസത്തിൽ ലാറ്റിൻ അമേരിക്കൻ രാജ്യങ്ങളായ ഉറുഗ്വേ, അർജന്‍റീന, പെറു എന്നിവിടങ്ങളിൽ സന്ദർശനം നടത്തും.
നവംബർ ആറു മുതൽ 17 വരെ 11 ദിവസം നടക്കുന്ന പര്യടനത്തിൽ 10 പ്രമുഖ നഗരങ്ങൾ മാർപാപ്പ സന്ദർശിക്കുമെന്ന് വത്തിക്കാൻ പ്രസ് ഓഫീസ് അറിയിച്ചു. സഭാധ്യക്ഷനായശേഷമുള്ള അദ്ദേഹത്തിന്‍റെ ആറാമത്തെ അന്താരാഷ്‌ട്ര പര്യടനമാണിത്.
നവംബർ ആറുമുതൽ എട്ടുവരെ ഉറുഗ്വെയിലെ മോന്തെവീദെയോ, പൈസാണ്ടു, ഫ്ലോറിഡ എന്നീ നഗരങ്ങൾ സന്ദർശിക്കും. എട്ടു മുതൽ 11 വരെയാണ് അർജന്‍റീനയിലെ സന്ദർശനം. ബുവേനോസ് ഐറിസ്, കോർഡോബ, ലുഹാൻ എന്നിവിടങ്ങൾ സന്ദർശിക്കും.
ദിവംഗതനായ ഫ്രാൻസിസ് മാർപാപ്പയുടെ ജന്മദേശമാണ് അർജന്‍റീന. അദ്ദേഹത്തിന് തന്‍റെ 13 വർഷത്തെ ഭരണകാലത്തിനിടയിൽ സ്വന്തം നാട് സന്ദർശിക്കാൻ സാധിച്ചിരുന്നില്ല. ഏകദേശം 40 വർഷങ്ങൾക്കു ശേഷമാണ് ഒരു മാർപാപ്പ അർജന്‍റീനയിലെത്തുന്നത്.
നവംബർ 11ന് പെറുവിലെത്തുന്ന ലെയോ മാർപാപ്പ ലിമ, ചിക്ലായോ, കുസ്കോ, പുക്കാൽപ എന്നീ നഗരങ്ങൾ സന്ദർശിക്കും. അമേരിക്കയിൽ ജനിച്ച ആദ്യ മാർപാപ്പയായ ലെയോ പതിനാലാമന് പെറുവുമായി ദീർഘകാലത്തെ അടുത്ത ബന്ധമുണ്ട്.
1985ൽ ഒരു മിഷനറിയായി പെറുവിലെത്തിയ അദ്ദേഹം പിന്നീട് ചിക്ലായോ രൂപതയുടെ ബിഷപ്പായി 2015 മുതൽ 2023 വരെ സേവനമനുഷ്ഠിച്ചിരുന്നു.
പെറുവിലെ പൗരത്വം കൂടിയുള്ള മാർപാപ്പ, നേരത്തേ അവിടെ ഭരണത്തിലിരുന്ന ആൽബർട്ടോ ഫുജിമോറിയുടെ കാലഘട്ടത്തിലെ മനുഷ്യാവകാശ ലംഘനങ്ങൾക്കെതിരേയും അദ്ദേഹത്തിനു നൽകിയ മാപ്പിനെതിരേയും ബിഷപ്പായിരിക്കെ പരസ്യമായി നിലപാടെടുത്തിരുന്നു.
ഈവർഷം സെപ്റ്റംബർ 25 മുതൽ 28 വരെ മാർപാപ്പ ഫ്രാൻസ് സന്ദർശിക്കും.
International
സരാജെവോ: താത്കാലിക സന്തോഷങ്ങളുടെ വ്യാമോഹങ്ങളിൽ വീണുപോകാതെ നമ്മെ സ്വതന്ത്രരാക്കുന്ന സത്യം ആത്മാർഥമായി അന്വേഷിക്കാൻ യുവജനങ്ങളോടു മാർപാപ്പയുടെ ആഹ്വാനം.
പെട്ടെന്നു ലഭിക്കുന്ന താത്കാലിക സന്തോഷങ്ങളുടെ വാഗ്ദാനങ്ങൾ ആകർഷകമായി തോന്നാമെങ്കിലും മനസിൽ ശാശ്വതമായ ഒരു മുദ്രയും പതിപ്പിക്കാതെ അവ പെട്ടെന്ന് അപ്രത്യക്ഷമാകുന്നുവെന്ന് മാർപാപ്പ ചൂണ്ടിക്കാട്ടി.
തെക്കുകിഴക്കൻ യൂറോപ്യൻ രാജ്യമായ ബോസ്നിയ ആൻഡ് ഹെർസഗോവിനയിലെ മരിയൻ തീർഥാടനകേന്ദ്രമായ മെഡ്ജുഗൊറെയിൽ സംഘടിപ്പിച്ച അന്താരാഷ്‌ട്ര യുവജനസമ്മേളനത്തിൽ സന്ദേശം നൽകുകയായിരുന്നു മാർപാപ്പ.
പരിശുദ്ധാത്മാവിനാൽ നയിക്കപ്പെടാൻ സ്വയം വിട്ടുകൊടുക്കാനും പരിശുദ്ധ അമ്മയുടെ മധ്യസ്ഥതയിൽ അഭയം തേടാനും ആഹ്വാനം ചെയ്തുകൊണ്ടാണ് മാർപാപ്പ സന്ദേശം അവസാനിപ്പിച്ചത്. അങ്ങനെ സുവിശേഷത്തിന്‍റെ പ്രകാശമാനമായ സാക്ഷികളാകാനും സാഹോദര്യത്തിന്‍റെ വക്താക്കളാകാനും സമൂഹത്തിൽ സമാധാനം കെട്ടിപ്പടുക്കുന്നവരാകാനും യുവാക്കൾക്ക് സാധിക്കട്ടേയെന്നും മാർപാപ്പ ആശംസിച്ചു.
വിശുദ്ധ കുർബാനയ്ക്കു മുന്നോടിയായി മെഡ്ജുഗൊറെ മരിയൻ തീർഥാടനകേന്ദ്രത്തിന്‍റെ പ്രത്യേക ചുമതലയുള്ള അപ്പോസ്തലിക് വിസിറ്റേറ്റർ ആർച്ച്ബിഷപ് അൽദോ കവല്ലിയാണ് മാർപാപ്പയുടെ സന്ദേശം വായിച്ചത്.
വിശുദ്ധ കുർബാനയ്ക്ക് ബോസ്നിയ-ഹെർസെഗോവിനയിലെയും മോണ്ടെനെഗ്രോയിലെയും അപ്പസ്തോലിക് നുൺഷ്യോ വരാപ്പുഴ അതിരൂപതാംഗമായ ആർച്ച്ബിഷപ് ഫ്രാൻസിസ് അസീസി ചുള്ളിക്കാട്ട് മുഖ്യകാർമികത്വം വഹിച്ചു.
1989ൽ ആരംഭിച്ച ഈ യുവജന സമ്മേളനം എല്ലാ വർഷവും നടന്നുവരുന്നു. ഈമാസം ആറുവരെ നടക്കുന്ന സമ്മേളനത്തിൽ 73 രാജ്യങ്ങളിൽനിന്നായി 50,000ത്തോളം യുവതീയുവാക്കളാണു പങ്കെടുക്കുന്നത്.
International
റോം: വിശുദ്ധ നാട്ടിലും മധ്യപൂര്‍വേഷ്യയിലും ആക്രമണങ്ങള്‍ അവസാനിപ്പിക്കാന്‍ ലെയോ പതിനാലാമന് മാര്‍പാപ്പയുടെ അഭ്യര്‍ഥന. വര്‍ധിച്ചുവരുന്ന അക്രമങ്ങളില്‍ കടുത്ത ആശങ്ക പ്രകടിപ്പിച്ച മാര്‍പാപ്പ, സൈനികനടപടികള്‍ അവസാനിപ്പിച്ച് ചര്‍ച്ചകളിലൂടെ നീതിയുക്തമായ പരിഹാരം കണ്ടെത്തണമെന്നും ആഹ്വാനം ചെയ്തു.
വേനല്‍ക്കാല വസതിയായ കസ്‌തേല്‍ ഗണ്ടോള്‍ഫോയില്‍ ഇന്നലെ ത്രിസന്ധ്യാ പ്രാര്‍ഥനയ്ക്കുശേഷം തീര്‍ഥാടകരെ അഭിസംബോധന ചെയ്യുകയായിരുന്നു മാര്‍പാപ്പ.
വിശുദ്ധ നാട്ടില്‍ തുടരുന്നതും ശക്തമാകുന്നതുമായ അക്രമങ്ങളെ താന്‍ കടുത്ത ആശങ്കയോടെ നിരീക്ഷിച്ചുകൊണ്ടിരിക്കുകയാണെന്നു പറഞ്ഞ മാര്‍പാപ്പ, ഓരോ വ്യക്തിയുടെയും തുല്യ അന്തസിലും തുല്യ അവകാശങ്ങളിലും അധിഷ്ഠിതമായ, നീതിയുക്തമായ ഒരു രാഷ്‌ട്രീയ പരിഹാരം ലക്ഷ്യമിട്ടുള്ള ചര്‍ച്ചകളിലേക്ക് മടങ്ങിയെത്തണമെന്നും ആവശ്യപ്പെട്ടു.
യുദ്ധംമൂലം ദുരിതമനുഭവിക്കുന്ന ലോകമെമ്പാടുമുള്ള എല്ലാ ജനങ്ങള്‍ക്കുമായി പ്രാര്‍ഥിക്കുന്നത് തുടരാനും മാര്‍പാപ്പ എല്ലാവരെയും ആഹ്വാനം ചെയ്തു.
“മധ്യപൂര്‍വേഷ്യയില്‍ സൈനികനടപടികള്‍ ശക്തമാക്കിയത് വീണ്ടും അക്രമവും നാശനഷ്‌ടങ്ങളും വരുത്തിവച്ചിരിക്കുകയാണ്. ഇത് എണ്ണമറ്റ സാധാരണക്കാരുടെ ജീവനെ വലിയ അപകടത്തിലാക്കുകയും കുടിവെള്ളത്തിന്‍റെയും വൈദ്യുതിയുടെയും ക്ഷാമം രൂക്ഷമാക്കുകയും ചെയ്തിരിക്കുന്നു.
ബന്ധപ്പെട്ട എല്ലാ കക്ഷികളും തങ്ങളുടെ ആക്രമണങ്ങള്‍ നിര്‍ത്തലാക്കണമെന്നും അടിയന്തരമായി ചര്‍ച്ചകളുടെയും നയതന്ത്രത്തിന്‍റെയും വഴികള്‍ വീണ്ടും തുറക്കണമെന്നും ഞാന്‍ അഭ്യര്‍ഥിക്കുന്നു.” -മാര്‍പാപ്പ പറഞ്ഞു.
International
റോം: പരിസ്ഥിതിസംരക്ഷണ രംഗത്തും സാമൂഹികക്ഷേമത്തിലും വേറിട്ട സംഭാവനകൾ നൽകുന്ന വ്യക്തികൾക്കായി ലെയോ പതിനാലാമൻ മാർപാപ്പയുടെ പേരിൽ അന്താരാഷ്‌ട്ര ബഹുമതി പ്രഖ്യാപിച്ചു.
അമേരിക്കയിലെ പെൻസിൽവാനിയയിലെ വില്ലനോവ സർവകലാശാല ഏർപ്പെടുത്തിയ "പോപ്പ് ലെയോ പതിനാലാമൻ സസ്റ്റൈനബിലിറ്റി മെഡൽ' അടുത്ത ഒക്‌ടോബറിൽ റോമിൽ നടക്കുന്ന ചടങ്ങിൽ മാർപാപ്പതന്നെ നേരിട്ട് വിജയിക്കു സമ്മാനിക്കും.
ഒക്ടോബർ 12 മുതൽ 15 വരെ റോമിലെ പാട്രിസ്റ്റിക് ഇൻസ്റ്റിറ്റ്യൂട്ട് അഗസ്റ്റീനിയാനത്തിലും മാർപാപ്പയുടെ വേനൽക്കാല വസതിയായ കസ്തേൽ ഗാണ്ടാൾഫോയിലെ ലൗദാത്തോ സീ ഉദ്യാനത്തിലുമായാണ് അന്താരാഷ്‌ട്ര പരിസ്ഥിതിസമ്മേളനം നടക്കുന്നത്. ഒക്ടോബർ 13ന് നടക്കുന്ന ചടങ്ങിൽ അവാർഡ് വിതരണം ചെയ്യും.
ലെയോ പതിനാലാമൻ മാർപാപ്പ അംഗമായ അഗസ്റ്റീനിയൻ സന്യാസസഭ 1842ൽ സ്ഥാപിച്ചതാണ് വില്ലനോവ സർവകലാശാല. ലെയോ മാർപാപ്പ പഠിച്ച ഉന്നതവിദ്യാഭ്യാസ സ്ഥാപനംകൂടിയാണിത്.
1977ൽ ഇവിടെനിന്ന് ഗണിതശാസ്ത്രത്തിൽ ബിരുദം നേടിയ അദ്ദേഹത്തിന് 2014ൽ സർവകലാശാല ഓണററി ഡോക്‌ടറേറ്റും നൽകിയിരുന്നു. സർവകലാശാലയുടെ ഈ മുൻ വിദ്യാർഥിയോടുള്ള ആദരസൂചകമായാണ് രണ്ടു വർഷത്തിലൊരിക്കൽ നൽകുന്ന പുരസ്കാരം ഏർപ്പെടുത്തിയിരിക്കുന്നത്.
ആദ്യ പുരസ്കാരജേതാവിനെ സെപ്റ്റംബറിൽ പ്രഖ്യാപിക്കും. ഏതു മേഖലയിലുള്ളവർക്കും പരിസ്ഥിതി-സാമൂഹിക സുസ്ഥിരതയ്ക്കായി നൽകിയ സംഭാവനകൾ മുൻനിർത്തി പുരസ്കാരത്തിന് അർഹതയുണ്ടായിരിക്കും.
International
വത്തിക്കാൻ സിറ്റി: ലെയോ പതിനാലാമൻ മാർപാപ്പയുടെ സമാധാനസന്ദേശങ്ങൾ ഉൾക്കൊള്ളുന്ന പുതിയ പുസ്തകം ‘ഡിസാംഡ് ആൻഡ് ഡിസാമിംഗ്: പീസ് ഈസ് എ ഗിഫ്റ്റ്’ പുറത്തിറങ്ങി.
സാർവത്രികസഭയുടെ അധ്യക്ഷനായി 2025 മേയ് എട്ടിന് തെരഞ്ഞെടുക്കപ്പെട്ടതു മുതൽ സമാധാനവുമായി ബന്ധപ്പെട്ട് മാർപാപ്പ നടത്തിയിട്ടുള്ള വിവിധ പ്രഭാഷണങ്ങളും സന്ദേശങ്ങളും അടിസ്ഥാനമാക്കി വത്തിക്കാൻ പബ്ലിഷിംഗ് ഹൗസ് പ്രസിദ്ധീകരിച്ച ഈ ഗ്രന്ഥത്തിൽ ലോകസമാധാനത്തിന് അണുവായുധങ്ങളല്ല മറിച്ച് നിരായുധീകരണമാണ് ആവശ്യമെന്ന് മാർപാപ്പ ഊന്നിപ്പറയുന്നു.
അലസാൻഡ്രോ ബാൻഫി എഡിറ്റ് ചെയ്ത ഈ പുസ്തകത്തിന്‍റെ ഇറ്റാലിയൻ പതിപ്പാണ് ഇപ്പോൾ ലഭ്യമായിട്ടുള്ളത്.
International
റോം: ലോകത്തിന്‍റെ വിവിധ ഭാഗങ്ങളിൽ തുടരുന്ന യുദ്ധങ്ങളിലും അക്രമങ്ങളിലും ആശങ്ക രേഖപ്പെടുത്തിയും ദുരിതമനുഭവിക്കുന്നവർക്കായി പ്രാർഥനകൾ ശക്തമാക്കാൻ ആഹ്വാനം ചെയ്തും ലെയോ പതിനാലാമൻ മാർപാപ്പ.
വേനൽക്കാല വസതിയായ കസ്തേൽ ഗണ്ടോർഫോ ഇന്നലെ ത്രിസന്ധ്യാ പ്രാർഥനയ്ക്കുശേഷം തീർഥാടകരെ അഭിസംബോധന ചെയ്യുകയായിരുന്നു മാർപാപ്പ.
യുദ്ധവും അക്രമവും തകർത്ത വിവിധ രാജ്യങ്ങളിലെ സംഭവവികാസങ്ങളെ അതീവ ആശങ്കയോടെയാണ് നോക്കിക്കാണുന്നതെന്ന് മാർപാപ്പ പറഞ്ഞു. “ഈ സംഘർഷങ്ങൾ കാരണം ദുരിതമനുഭവിക്കുന്നവരെയും മരിക്കുന്നവരെയും നാം മറക്കരുത്. സമാധാനത്തിനായുള്ള ആത്മാർഥമായ ശ്രമങ്ങൾക്കൊപ്പം നമ്മുടെ നിരന്തരമായ പ്രാർഥനകളും ചേർത്തുവയ്ക്കാം” - മാർപാപ്പ ഓർമിപ്പിച്ചു.
യുക്രെയ്ൻ തലസ്ഥാനമായ കീവിൽ റഷ്യ നടത്തിയ ശക്തമായ മിസൈൽ ആക്രമണത്തിൽ ആളപായവും നാശനഷ്‌ടങ്ങളും റിപ്പോർട്ട് ചെയ്തിരുന്ന തിന്‍റെയും ഇറാനിൽ യുഎസ് നടത്തിയ വ്യോമാക്രമണങ്ങളും തുടർന്ന് കുവൈറ്റിലെ യുഎസ് സൈനിക താവളങ്ങൾക്കുനേരേ ഇറാൻ നടത്തിയ മിസൈൽ-ഡ്രോൺ ആക്രമണങ്ങളും ഉൾപ്പെടെ പശ്ചിമേഷ്യയിലുണ്ടായ പുതിയ സംഘർഷാവസ്ഥയുടെയും പശ്ചാത്തലത്തിലാണു മാർപാപ്പയുടെ ആഹ്വാനം.
ക്രൈസ്തവർ പുലർത്തേണ്ട വിനയത്തെയും കാരുണ്യത്തെയും കുറിച്ച് ഓർമിപ്പിച്ച മാർപാപ്പ, ബലപ്രയോഗത്തിലൂടെയോ ആധിപത്യത്തിലൂടെയോ ആഡംബരത്തോടെയോ കടന്നുവരുന്ന ഒരു ശക്തനായ ഭരണാധികാരിയായി ദൈവത്തെ സങ്കൽപ്പിക്കരുതെന്ന് മുന്നറിയിപ്പ് നൽകി. ഈമാസം 27 വരെ മാർപാപ്പ കസ്തേൽ ഗണ്ടോൾഫോയിൽ വിശ്രമത്തിൽ തുടരും.
Leader Page
ലെയോ പതിനാലാമൻ മാർപാപ്പയുടെ ആദ്യ ചാക്രിക ലേഖനമായ "മാഞ്ഞിഫിക്ക ഹുമാനിത്താസ്' ആഗോള തലത്തിൽ വലിയ ബൗദ്ധിക-രാഷ്‌ട്രീയ ചർച്ചകൾക്ക് തിരികൊളുത്തിയിരിക്കുകയാണ്. മനുഷ്യന്‍റെ ചിന്തയെയും ഓർമയെയും തൊഴിലെന്ന ആശയത്തെയും ഭാവിയെത്തന്നെയും കീഴടക്കാൻ ഡാറ്റയും നിർമിത ബുദ്ധിയും അൽഗോരിതങ്ങളുമായി ടെക്‌നോ കാപ്പിറ്റലിസ്റ്റുകൾ ശ്രമിക്കുന്ന കാലഘട്ടത്തിലാണ് ‘മഹത്തായ മാനവികത’ എന്ന ഈ ചാക്രിക ലേഖനം പ്രസിദ്ധീകരിക്കപ്പെടുന്നത്. ഇന്ന് ലോകം നേരിടുന്ന ഏറ്റവും വലിയ രാഷ്‌ട്രീയ-സാമൂഹിക പ്രതിസന്ധികളായ നിർമിത ബുദ്ധി (എഐ) യുടെ ഉടമസ്ഥത, സാങ്കേതിക വിദ്യയുടെ കേന്ദ്രീകരണം, തൊഴിൽ നഷ്ടം, മനുഷ്യന്‍റെ അസ്തിത്വ പ്രതിസന്ധി എന്നിവയെക്കുറിച്ചുള്ള ശക്തമായ സാമൂഹിക-ആത്മീയ ഇടപെടലായി ഈ ലേഖനം ഉയർന്നു നിൽക്കുന്നു.
ഇത് കത്തോലിക്കാ സഭയുടെയോ മാർപാപ്പയുടെയോ വെറും ധാർമിക ഉപദേശം മാത്രമല്ല. ടെക്‌നോ കാപിറ്റലിസത്തിന്‍റെ പുതിയ സാമ്രാജ്യത്വത്തിനെതിരേ ഉയരുന്ന മനുഷ്യകേന്ദ്രിത പ്രഖ്യാപനമാണ് തന്‍റെ ആദ്യ ചാക്രിക ലേഖനത്തിലൂടെ മാർപാപ്പ നടത്തിയിരിക്കുന്നത്. മനുഷ്യന്‍റെ മാന്യത, തൊഴിലിന്‍റെ മഹത്വം, പൊതുനന്മ, അധികാരത്തിന്‍റെ കേന്ദ്രീകരണം എന്നിവയെക്കുറിച്ചുള്ള മാർപാപ്പയുടെ നിലപാടുകൾ ശ്രദ്ധിക്കാതെ പോകാനാവില്ല.
മാനവികത എന്നതിനെ അപ്രസക്തമാക്കി ലോകം വെട്ടിപ്പിടിക്കാൻ അധികാരത്തിന്‍റെ ഹുങ്കും സാങ്കേതിക മികവിന്‍റെ ഗർവും സമ്പത്തിന്‍റെ അഹങ്കാരവുമായി എഴുന്നള്ളുന്ന ഭരണകൂട ദുർമേദസുകൾ ലോകമെല്ലാം അസ്വസ്ഥതകൾ വിതക്കുമ്പോഴാണ് ഈ ലേഖനം പുറത്തുവരുന്നത്. “ദൈവം അതിന്‍റെ എല്ലാ മഹത്വത്തോടും കൂടി സൃഷ്ടിച്ച മാനവികത ഇന്ന് ഒരു നിർണായക തെരഞ്ഞെടുപ്പിനെ അഭിമുഖീകരിക്കുകയാണെന്നും ഒന്നുകിൽ ഒരു പുതിയ ബാബേൽ ഗോപുരം പണിയുക അല്ലെങ്കിൽ ദൈവവും മനുഷ്യരും ഒരുമിച്ച് വസിക്കുന്ന നഗരം പണിയുക” എന്നാണ് മാർപാപ്പ ആഹ്വാനം ചെയ്യുന്നത്.
വർത്തമാനകാലത്തിന്‍റെ വെല്ലുവിളികളെ അതിജീവിക്കുന്നതിനുള്ള ഊർജമായി ഈ ലേഖനം മാറുന്നു എന്നതാണ് ശ്രദ്ധേയം. ബാബേൽ ഗോപുരവും ടെക്‌നോ-കാപിറ്റലിസവും ഈ ചാക്രിക ലേഖനത്തിലെ ഏറ്റവും ശക്തമായ പ്രതീകങ്ങളാണ്. ബൈബിളിൽ ഉല്പത്തി പുസ്തകത്തിൽ ‘നമുക്ക് ആകാശത്തെത്തുന്ന ഗോപുരം പണിയാം’ എന്ന് പറയുന്നുണ്ട്. ഇത് വെറുമൊരു പുരാതന കഥയല്ല. നിയന്ത്രണമില്ലാത്ത അധികാരത്തിന്‍റെ രാഷ്‌ട്രീയ ഉപമയാണ്. ഇന്ന് ഡാറ്റയും എഐ സംവിധാനങ്ങളും ഏതാനും കമ്പനികളുടെ കൈകളിൽ കേന്ദ്രീകരിക്കപ്പെടുമ്പോൾ ‘പുതിയ ബാബേൽ ഗോപുരം’ എന്നത് ഒരു മുന്നറിയിപ്പു കൂടിയായി മാറുന്നു.
ഈ ചാക്രിക ലേഖനത്തിൽ ലെയോ പതിനാലാമൻ മാർപാപ്പ ഒപ്പുവച്ച മേയ് 15 എന്ന തീയതി പ്രത്യേകമായ ശ്രദ്ധ ആകർഷിക്കുന്നുണ്ട്. 135 വർഷങ്ങൾക്ക് മുമ്പ് 1891 മേയ് 15നാണ് ലെയോ പതിമൂന്നാമൻ മാർപാപ്പ ‘റേരും നൊവാരും’ എന്ന വിഖ്യാതമായ ചാക്രിക ലേഖനം പുറപ്പെടുവിച്ചത്. പുതിയ കാര്യങ്ങളെക്കുറിച്ച് എന്നർഥമുള്ള ആ ചാക്രികലേഖനം പറഞ്ഞതാവട്ടെ തൊഴിലാളിവർഗത്തിന്‍റെ അവസ്ഥയെക്കുറിച്ചായിരുന്നു. സ്വകാര്യസ്വത്ത് സമ്പാദനത്തോട് യോജിച്ചുകൊണ്ട് തൊഴിലാളികളെ കൊടിയ ചൂഷണത്തിന് വിധേയമാക്കുന്നത് മനുഷ്യത്വത്തിന് നിരക്കാത്തതും ലജ്ജാവഹവുമാണെന്നും ലെയോ പതിമൂന്നാമൻ പാപ്പാ പ്രഖ്യാപിച്ചു.
വ്യവസായ വിപ്ലവകാലത്ത് തൊഴിലാളിയുടെ ശരീരത്തെ യന്ത്രം കീഴടക്കിയെങ്കിൽ, ഇന്നത്തെ ഡിജിറ്റൽ വിപ്ലവത്തിന്‍റെ കാലത്ത് മനുഷ്യന്‍റെ ബുദ്ധിയെയും സ്വകാര്യതയെയും വികാരങ്ങളെയും വരെ അൽഗോരിതങ്ങൾ നിയന്ത്രിക്കാൻ തുടങ്ങുന്നതിനെയാണ് ലെയോ പതിനാലാമൻ മാർപാപ്പ തന്‍റെ ആദ്യ ചാക്രിക ലേഖനത്തിലൂടെ ചൂണ്ടിക്കാണിക്കുന്നത്. അങ്ങിനെ മാഞ്ഞിഫിക്ക ഹുമാനിത്താസ് മനുഷ്യന്‍റെ മാന്യതയ്ക്കുവേണ്ടിയുള്ള സംസാരമായി മാറുന്നു.
“സാങ്കേതികവിദ്യ മനുഷ്യത്വത്തിന് വിരുദ്ധമായ ഒരു ശക്തിയല്ല, അത് സ്വതസിദ്ധമായി തിന്മയും അല്ല’’ എന്നാണ് പാപ്പാ പറയുന്നത്. എന്നാൽ അതിന്‍റെ തുടർച്ചയായി അദ്ദേഹം നടത്തുന്ന നിരീക്ഷണമാണ് ഏറെ ശ്രദ്ധേയം. “സാങ്കേതികവിദ്യ ഒരിക്കലും നിഷ്പക്ഷമല്ല, കാരണം അത് രൂപപ്പെടുത്തുകയും ധനസഹായം നൽകുകയും നിയന്ത്രിക്കുകയും ഉപയോഗിക്കുകയും ചെയ്യുന്നവരുടെ സ്വഭാവസവിശേഷതകൾ സ്വീകരിക്കുന്നു’’ എന്ന വാക്കുകൾ ഈ കാലത്തിന്‍റെ രാഷ്‌ട്രീയ സത്യമാണ്. അതുകൊണ്ടാണ് അവരുടെ ചെയ്തികൾ സൃഷ്ടിക്കാൻ പോകുന്ന ദുരിതങ്ങളെപ്പറ്റിയുള്ള ഭയാശങ്ക ഇതിൽ നിഴലിക്കുന്നതും. അതിനാൽ, ‘പൊതുനന്മയ്ക്കായി യത്നിക്കണമെന്നും’ ‘മനുഷ്യരായി തുടരണമെന്നും’ ലെയോ പതിനാലാമൻ മാർപാപ്പ ജനങ്ങളോട് അഭ്യർഥിക്കുന്നു. അങ്ങിനെയാകുമ്പോൾ “ദൈവം വസിക്കാൻ ആഗ്രഹിക്കുന്ന സ്ഥലമായി മനുഷ്യഹൃദയത്തെ ലോകം തിരിച്ചറിയും’’ എന്നാണ് പാപ്പായുടെ പ്രത്യാശ.
ദൈവത്തിന്‍റെ സ്വരൂപത്തിലും സാദൃശ്യത്തിലും സൃഷ്ടിക്കപ്പെട്ട മനുഷ്യന്‍റെ അന്തസ് സംരക്ഷിക്കേണ്ടതിന്‍റെ അനിവാര്യതയും പാപ്പാ ചൂണ്ടിക്കാട്ടുന്നുണ്ട്. മനുഷ്യനെ “ ഉപയോഗിക്കാനും ചൂഷണം ചെയ്യാനുമുള്ള ഒരു വിഭവമായി ” കണക്കാക്കുന്നതിനോട് വിയോജിക്കുന്നു എന്ന അദ്ദേഹത്തിന്‍റെ പ്രഖ്യാപനം ഏറ്റവും വലിയ രാഷ്‌ട്രീയ നിലപാടാണ്. ഗർഭധാരണം മുതൽ സ്വാഭാവിക അവസാനം വരെ ജീവിക്കാനുള്ള അവകാശമാണ് മനുഷ്യാവകാശമെന്നും അതിനെ ലംഘിക്കുന്നത് ന്യായീകരിക്കാൻ കഴിയാത്തതാണെന്നും ഒഴുക്കൻ മട്ടിൽ പറഞ്ഞുപോകുന്നതിനപ്പുറം ഗർഭഛിദ്രം, നിരപരാധികളെ കൊല്ലൽ, ദയാവധം എന്നിവയെ സഭ ഗുരുതരമായ തെറ്റായി കണക്കാക്കുന്ന തെരഞ്ഞെടുപ്പുകൾ എന്നാണ് രേഖപ്പെടുത്തിയിരിക്കുന്നത്.
International
റോം: ലോകത്ത് നിലനിൽക്കുന്ന ദാരിദ്ര്യത്തിന്‍റെയും അനീതിയുടെയും യഥാർഥ കാരണങ്ങൾ ഇല്ലാതാക്കാൻ സമൂഹം ഒന്നടങ്കം മുന്നോട്ടു വരണമെന്ന് ലെയോ പതിനാലാമൻ മാർപാപ്പ.
റോമിനുപുറത്തുള്ള വേനൽക്കാല വസതിയായ കസ്താൽ ഗൊണ്ടോൾഫോയിലെ ലൗദാത്തോ സി ഉദ്യാനത്തിൽ ദരിദ്രർക്കായി ഒരുക്കിയ പ്രത്യേക ഉച്ചവിരുന്നിൽ പങ്കെടുത്തു സംസാരിക്കുകയായിരുന്നു അദ്ദേഹം.
യഥാർഥ ജീവകാരുണ്യത്തോടും നീതിയോടുമുള്ള വിശപ്പാണ് തനിക്കുള്ളതെന്നു വ്യക്തമാക്കിയ മാർപാപ്പ എല്ലാവർക്കുമായി വാതിലുകൾ തുറന്നിടുന്ന, എല്ലാവരെയും സ്നേഹത്തോടെ സ്വീകരിക്കുന്ന ഒരു സഭയ്ക്കായുള്ള ആഗ്രഹവും പങ്കുവച്ചു.
അവിടെ ആരും ശത്രുക്കളല്ലെന്നും സമാധാനവും പരസ്പര പൊരുത്തപ്പെടലുകളും ക്ഷമയുമാണ് ഉണ്ടാകേണ്ടതെന്നും മാർപാപ്പ ഓർമിപ്പിച്ചു. ചരിത്രപരമായി മാർപാപ്പമാരെ വിശേഷിപ്പിക്കുന്ന ‘പോന്തിഫ്’എന്ന പദത്തിന്‍റെ അർഥം ‘പാലങ്ങൾ പണിയുന്നയാൾ’ എന്നാണെന്ന് അദ്ദേഹം ചൂണ്ടിക്കാട്ടി.
‘മാർപാപ്പയോടൊപ്പം ഉച്ചഭക്ഷണം’ എന്നപേരിൽ സംഘടിപ്പിച്ച ഈ കൂട്ടായ്മയിൽ റോം രൂപതയിലെ വിവിധ സാമൂഹിക പ്രതിസന്ധികൾ നേരിടുന്ന 35 കുട്ടികൾ ഉൾപ്പെടെ ഇരുനൂറോളം പേരാണ് അതിഥികളായെത്തിയത്.
റോമിലെ ‘ഈസോള ദെല്ല പിറ്റ്സ’എന്ന റസ്റ്ററന്‍റാണ് വിവിധ സംസ്കാരങ്ങളിൽനിന്നുള്ളവർക്ക് അനുയോജ്യമായ രീതിയിലുള്ള വിഭവസമൃദ്ധമായ ഭക്ഷണം ഒരുക്കിയത്.
കഴിഞ്ഞ വർഷം ഓഗസ്റ്റ് 17ന് അൽബാനോ രൂപതയിലെ നിർധനരായ ആളുകൾക്കായും തുടർന്ന് നവംബർ 16നും മാർപാപ്പ ഇത്തരത്തിൽ ഉച്ചവിരുന്നുകൾ ഒരുക്കിയിരുന്നു. ഇതിന്‍റെ തുടർച്ചയായാണ് ഇന്നലത്തെ സൗഹൃദ കൂട്ടായ്മയും സംഘടിപ്പിച്ചത്.
International
വത്തിക്കാൻ സിറ്റി: ലെയോ പതിനാലാമൻ മാർപാപ്പ വേനൽക്കാല വിശ്രമത്തിനായി കസ്തേൽ ഗൊണ്ടോൾഫോയിലെ വസതിയിലെത്തി.
കഴിഞ്ഞ ഞായറാഴ്ച കസ്തേൽ ഗൊണ്ടോൾഫോയിലെ വേനൽക്കാല വസതിയായ വില്ല ബാർബെറിനിയിൽ എത്തിയ മാർപാപ്പ ഈ മാസം 27 വരെ അവിടെ തങ്ങും.
വിശ്രമകാലത്ത് മാർപാപ്പയുടെ പൊതുവായ കൂടിക്കാഴ്ചകൾ ഉണ്ടായിരിക്കില്ലെങ്കിലും ഞായറാഴ്ചകളിലെ ത്രിസന്ധ്യാ പ്രാർഥനയ്ക്ക് അദ്ദേഹം നേതൃത്വം നൽകും. വിശ്രമകാലത്തിനിടയിൽ അടുത്ത 11ന് റോം രൂപതയിലെ സാമ്പത്തികമായി പിന്നാക്കം നിൽക്കുന്ന 200 ഓളം പേർക്കൊപ്പം മാർപാപ്പ കസ്തേൽ ഗൊണ്ടോൾഫോയിലെ ‘ബോർഗോ ലൗദാത്തോ സി’കാമ്പസിൽ ഉച്ചഭക്ഷണം കഴിക്കും.
മുൻഗാമിയായ ഫ്രാൻസിസ് മാർപാപ്പ തന്‍റെ 12 വർഷത്തെ ഭരണകാലത്ത് റോമിലെ ചൂടുകാലത്ത് വത്തിക്കാനിലെ സാന്താ മാർത്തയിൽത്തന്നെ തുടരാനായിരുന്നു താത്പര്യപ്പെട്ടിരുന്നത്.
International
വത്തിക്കാൻ സിറ്റി: അമേരിക്കൻ സ്വാതന്ത്ര്യപ്രഖ്യാപനത്തിന്‍റെ 250-ാം വാർഷികത്തോടനുബന്ധിച്ച് വത്തിക്കാനിലെ യുഎസ് അംബാസഡറുടെ ഔദ്യോഗിക വസതി ലെയോ പതിനാലാമൻ മാർപാപ്പ സന്ദർശിച്ച് അത്താഴവിരുന്നിൽ പങ്കെടുത്തു.
ശനിയാഴ്ച ഇറ്റാലിയൻ ദ്വീപായ ലാംപെദൂസയിൽ നടത്തിയ ഹ്രസ്വ സന്ദർശനത്തിനുശേഷം വത്തിക്കാനിൽ തിരിച്ചെത്തിയാണ് വൈകുന്നേരത്തെ വിരുന്നിനായി മാർപാപ്പ അംബാസഡർ ബ്രയാൻ ബർച്ചിന്‍റെ റോമിലെ ജാനിക്കുളും കുന്നിൽ സ്ഥിതിചെയ്യുന്ന വസതിയിലേക്കു പോയത്. അദ്ദേഹവും കുടുംബാംഗങ്ങളും അമേരിക്കൻ നയതന്ത്രപ്രതിനിധികളും ചേർന്ന് മാർപാപ്പയെ വരവേറ്റു.
ഒരു സഹഅമേരിക്കക്കാരനായ മാർപാപ്പയോടൊപ്പം ഈ പ്രത്യേക ദിവസം ആഘോഷിക്കാൻ കഴിഞ്ഞതിൽ താൻ അതീവ ബഹുമാനിതനാണെന്ന് സന്ദർശനത്തിനുശേഷം അംബാസഡർ ബ്രയാൻ ബർച്ച് പ്രതികരിച്ചു.
ഒന്പത് കുട്ടികളുടെ പിതാവായ ബ്രയാൻ ബർച്ച് കത്തോലിക്കാവിശ്വാസിയാണ്. അമേരിക്കയിലെ കത്തോലിക്കാവിശ്വാസികളെ പൊതുജീവിതത്തിലും സാമൂഹിക ഇടപെടലുകളിലും സജീവമാക്കാൻ ലക്ഷ്യമിട്ടു പ്രവർത്തിക്കുന്ന ‘കാത്തലിക് വോട്ട്’ എന്ന സംഘടനയുടെ സഹസ്ഥാപകൻകൂടിയാണ് അദ്ദേഹം.
2025 സെപ്റ്റംബറിലാണ് ബർച്ച് വത്തിക്കാനിലെ യുഎസ് അംബാസഡറായി ചുമതലയേറ്റത്.
പ്രോട്ടോക്കോളുകൾ മറന്ന് മാർപാപ്പ യുഎസ് അംബാസഡറുടെ വസതി സന്ദർശിച്ചത് അമേരിക്കയിൽ വലിയ ചർച്ചയായിട്ടുണ്ട്.
International
വത്തിക്കാൻ സിറ്റി: അമേരിക്കൻ ഐക്യനാടുകൾ സ്വാതന്ത്ര്യപ്രഖ്യാപനത്തിൽ ഒപ്പു വച്ചതിന്‍റെ 250-ാം വാർഷികം ആഘോഷിക്കുന്ന വേളയിൽ അമേരിക്കൻ ജനതയ്ക്ക് ആശംസകൾ നേർന്ന് ലെയോ പതിനാലാമൻ മാർപാപ്പ.
സ്വാതന്ത്ര്യം, സമത്വം, സന്തോഷം തേടാനുള്ള അവകാശം, നീതി, ജനാധിപത്യസംരക്ഷണം എന്നീ ആദർശങ്ങൾക്കു ശാശ്വതമായ ശബ്‌ദം നൽകിയ ദിനമായിരുന്നു 1776 ജൂലൈ നാലെന്ന് മാർപാപ്പ അനുസ്മരിച്ചു.
കഴിഞ്ഞ രണ്ടര നൂറ്റാണ്ടായി അമേരിക്കൻ ജനതയുടെ തലമുറകൾ ത്യാഗത്തിലൂടെയും സേവനത്തിലൂടെയും നവീകരണത്തിലൂടെയും പൗരബോധത്തോടെയുള്ള പങ്കാളിത്തത്തിലൂടെയും ഈ തത്വങ്ങളെ മുന്നോട്ട് കൊണ്ടുപോകാൻ ഒരുമിച്ച് പ്രവർത്തിച്ചു. അതിനാൽ ഈ വാർഷിക അവസരം ജനങ്ങൾ തമ്മിലും വരുംതലമുറയോടും പുലർത്തേണ്ട ഉത്തരവാദിത്വങ്ങളെക്കുറിച്ച് ചിന്തിക്കാനുള്ള അവസരംകൂടിയാണ്.
മനുഷ്യജീവനെ സംരക്ഷിക്കുക എന്നതിൽ കുടിയേറ്റക്കാരെ സ്വീകരിക്കുന്നതും സഹായിക്കുന്നതും ഉൾപ്പെടുന്നു. അവരുടെ പ്രത്യാശകളും ത്യാഗങ്ങളും ഈ രാജ്യത്തിന്‍റെ ചരിത്രത്തിന്‍റെ ഭാഗമാണ്. സ്വാതന്ത്ര്യവും അവസരങ്ങളും തേടി എത്തിയവർ ഓരോ തലമുറയിലും രാജ്യത്തിന്‍റെ സ്വഭാവം രൂപപ്പെടുത്തുന്നതിൽ സഹായിച്ചിട്ടുണ്ട്. അവരെ ഉദാരമനസ്കതയോടെ സ്വീകരിക്കുന്നത് ഒരു പുണ്യപ്രവൃത്തി മാത്രമല്ല, ഓരോ മനുഷ്യന്‍റെയും അന്തസിനെ അംഗീകരിക്കൽ കൂടിയാണ്-മാർപാപ്പ പറഞ്ഞു.
മനഃസാക്ഷിക്കനുസരിച്ച് ആരാധിക്കാനും ഭയമോ നിർബന്ധമോ കൂടാതെ സ്വന്തം വിശ്വാസം പരസ്യമായി ആചരിക്കാനുമുള്ള ഓരോ വ്യക്തിയുടെയും അവകാശമായ മതസ്വാതന്ത്ര്യം അമേരിക്ക കാത്തുസൂക്ഷിക്കുന്നു. അതു വലിയ കാര്യമാണ്. ദൈനംദിന ജീവിതസാഹചര്യങ്ങളിൽ സുവിശേഷം ജീവിച്ചുകൊണ്ട് രാജ്യത്തെ കത്തോലിക്കർ രാജ്യത്തിന്‍റെ വികസനത്തിന് വലിയ സംഭാവനകൾ നൽകിയിട്ടുണ്ട്. വിദ്യാഭ്യാസമേഖലയിലെ സേവനങ്ങൾ, ദരിദ്രരോടുള്ള പ്രത്യേക പരിഗണന, ആരോഗ്യസംരക്ഷണം, അടിസ്ഥാന സാമൂഹിക സേവനങ്ങൾ എന്നിവ ഇതിൽ പ്രധാനപ്പെട്ടതാണ്. വിശ്വാസം പൗരധർമത്തിനു വിരുദ്ധമല്ല. മറിച്ച് നീതിക്കും സമാധാനത്തിനും പൊതുനന്മയ്ക്കും വേണ്ടിയുള്ള പോരാട്ടത്തിന് ഊർജം പകരുന്നു-മാർപാപ്പ പറഞ്ഞു.
Kerala
തിരുവനന്തപുരം: ലെയോ പതിനാലാമൻ മാർപാപ്പയുടെ പ്രഥമ ചാക്രിക ലേഖനമായ ‘മാഞ്ഞിഫിക്ക ഹുമാനിത്താസി’ന്‍റെ മലയാള പരിഭാഷ ‘മാനവമഹത്വം’ പ്രകാശനം ചെയ്തു.
തിരുവനന്തപുരം ലൂർദ് ഫൊറോന പള്ളിയിൽ നടന്ന ചടങ്ങിൽ സീറോമലബാർ സഭ മേജർ ആർച്ച്ബിഷപ് മാർ റാഫേൽ തട്ടിൽ, കെസിബിസി പ്രസിഡന്‍റ് ആർച്ച്ബിഷപ് ഡോ. വർഗീസ് ചക്കാലയ്ക്കലിന് ആദ്യപതിപ്പ് നൽകി പ്രകാശനകർമം നിർവഹിച്ചു.
ചങ്ങനാശേരി ആർച്ച്ബിഷപ് മാർ തോമസ് തറയിൽ, കാഞ്ഞിരപ്പള്ളി ബിഷപ് മാർ ജോസ് പുളിക്കൽ, പരിഭാഷകനും കാർമൽ പബ്ലിഷിംഗ് ഹൗസ് ഡയറക്‌ടറുമായ ഫാ. ജയിംസ് ആലക്കുഴിയിൽ ഒസിഡി, ചങ്ങനാശേരി അതിരൂപത വികാരി ജനറാൾ ഫാ. ഡോ. ജോൺ തെക്കേക്കര, പിഒസി ഡയറക്‌ടർ ഫാ. തോമസ് തറയിൽ, ഫാ. തോമസ് കുരിശിങ്കൽ ഒസിഡി, സിസ്റ്റർ ഫ്ലവർലെറ്റ് സിഎംസി എന്നിവർ സന്നിഹിതരായിരുന്നു. ചാക്രിക ലേഖനത്തിന്‍റെ മലയാളം പതിപ്പ് പ്രമുഖ കത്തോലിക്ക പബ്ലിഷിംഗ് സെന്‍ററുകളിലും ചർച്ച് ബുക്ക് സ്റ്റാളുകളിലും ഓൺലൈനിലും ലഭ്യമാണ്.
International
വത്തിക്കാൻ സിറ്റി: പട്ടിണിയും പോഷകാഹാരക്കുറവും നേരിടുന്നതിനൊപ്പം അവയുടെ അടിസ്ഥാന കാരണങ്ങൾ കണ്ടെത്താനും പരിഹരിക്കാനും ലോകരാജ്യങ്ങൾ ഒന്നിക്കണമെന്ന് ലെയോ പതിനാലാമൻ മാർപാപ്പ.
മനുഷ്യന്‍റെ അന്തസ് ഉയർത്തിപ്പിടിക്കാനും അയൽക്കാരനെ സ്നേഹിക്കാനുമുള്ള സുവിശേഷസന്ദേശം സഭയുടെയും ലോക ഭക്ഷ്യപദ്ധതിയുടെയും ദൗത്യങ്ങളിൽ ഒരുപോലെ പ്രതിഫലിക്കുന്നുണ്ടെന്നും മാർപാപ്പ പറഞ്ഞു.
റോമിലെ ആസ്ഥാനത്തു നടന്ന ഐക്യരാഷ്‌ട്രസഭ ലോക ഭക്ഷ്യപദ്ധതിയുടെ വാർഷികയോഗത്തെ അഭിസംബോധന ചെയ്യുകയായിരുന്നു മാർപാപ്പ. സംഘർഷങ്ങൾക്കിടയിലും പ്രകൃതിദുരന്തങ്ങൾക്കിടയിലും ജീവന് സംരക്ഷണമൊരുക്കുവാൻ ഐക്യരാഷ്‌ട്രസഭയുടെ കീഴിൽ പ്രവർത്തിക്കുന്ന ഭക്ഷ്യ-കാർഷിക സംഘടന നടത്തുന്ന പ്രവർത്തനങ്ങളെ മാർപാപ്പ പ്രശംസിച്ചു.
രാജ്യങ്ങൾ തമ്മിലുള്ള അവിശ്വാസം വർധിക്കുന്നതും സൈനിക ചെലവുകൾക്കായി വിഭവങ്ങൾ വകമാറ്റുന്നതും ദാരിദ്ര്യ വിരുദ്ധ പോരാട്ടത്തെ ദുർബലപ്പെടുത്തുന്നു. ലോകത്ത് ഭക്ഷണത്തേക്കാൾ വേഗത്തിൽ ആയുധങ്ങൾ അതിർത്തികൾ കടന്നെത്തുന്നു എന്നത് വേദനാജനകമായ ഒരു വൈരുദ്ധ്യമാണ്. രാഷ്‌ട്രീയവും സാമ്പത്തികവുമായ താത്പര്യങ്ങൾക്കുപരിയായി മാനുഷിക മൂല്യങ്ങൾക്ക് മുൻഗണന നൽകാൻ ആഗോള സമൂഹം തയാറാകണം.
ഭക്ഷണം, വെള്ളം, ആരോഗ്യം എന്നിവ വിപണിയിലെ കച്ചവടച്ചരക്കുകളല്ല, മറിച്ച് ഓരോ മനുഷ്യന്‍റെയും മൗലികാവകാശമാണ് -മാർപാപ്പ പറഞ്ഞു. സർക്കാരുകൾക്കും അന്താരാഷ്‌ട്ര ഏജൻസികൾക്കും കടന്നുചെല്ലാൻ ബുദ്ധിമുട്ടുള്ള മേഖലകളിൽ കത്തോലിക്കാസഭയുടെ കീഴിലുള്ള ഇടവകകളും കാരിത്താസ് പോലുള്ള സന്നദ്ധ സംഘടനകളും നടത്തുന്ന സേവനങ്ങളെ മാർപാപ്പ പ്രത്യേകം പരാമർശിച്ചു.
ഇത്തരം പ്രാദേശിക പങ്കാളികളുമായി സഹകരിക്കുന്നത് സഹായങ്ങൾ അർഹരായവരിലേക്ക് നേരിട്ടെത്തിക്കാൻ സഹായിക്കും. പട്ടിണി നിർമാർജനം ചെയ്യുന്നത് കേവലം ഒരു കാരുണ്യപ്രവർത്തനമല്ല, മറിച്ച് ലോകത്തിന്‍റെ സുരക്ഷയ്ക്കും സമാധാനത്തിനും അത്യന്താപേക്ഷിതമായ കാര്യമാണെന്നും മാർപാപ്പ കൂട്ടിച്ചേർത്തു.
International
റോം: വേദപാരംഗതനായ വിശുദ്ധ അഗസ്റ്റിന്‍റെ തിരുശേഷിപ്പുകള്‍ സൂക്ഷിച്ചിരിക്കുന്ന വടക്കൻ ഇറ്റലിയിലെ പാവിയയിലുള്ള സെന്‍റ് പീറ്റർ ബസിലിക്കയില്‍ ലെയോ പതിനാലാമൻ മാർപാപ്പ സന്ദർശനം നടത്തി.
722 മുതൽ വിശുദ്ധ അഗസ്റ്റിന്‍റെ ഭൗതികദേഹം സൂക്ഷിച്ചിരിക്കുന്ന പള്ളിയാണിത്. 504ൽ അൾജീരിയയിലെ ഹിപ്പോയിൽനിന്ന് ഇറ്റലിയിലെ സാർഡീനിയയിലെ കാലിയാരിയിലേക്കു കൊണ്ടുവന്ന ഭൗതികദേഹം പിന്നീട് പാവിയ ബസിലിക്കയിൽ അടക്കം ചെയ്യുകയായിരുന്നു.
ബസിലിക്കയിലെത്തിയ മാർപാപ്പയെ അഗസ്റ്റീനിയൻ സന്യാസസമൂഹം പ്രിയോർ ജനറൽ ഫാ. ജോസഫ് എൽ. ഫാരെൽ, പ്രൊവിൻഷ്യൽ ഫാ. ഗബ്രിയേൽ പെദിചിനോ എന്നിവർ സ്വീകരിച്ചു. വത്തിക്കാനിൽനിന്നു ഹെലികോപ്റ്ററിലെത്തിയ മാർപാപ്പ ആദ്യം ഇവിടത്തെ കാൻസർ ആശുപത്രിയിൽ രോഗികളെ സന്ദർശിച്ചശേഷമാണു ബസിലിക്കയിലെത്തിയത്.
വിശുദ്ധ അഗസ്റ്റിന്‍റെ കബറിടത്തിനുമുന്നിൽ പ്രാർഥിച്ച മാർപാപ്പ തുടർന്ന് പള്ളിക്കുള്ളിൽ ബിഷപ്പുമാർ, അഗസ്റ്റീനിയൻ സന്യാസിമാർ, വൈദികർ, വൈദികവിദ്യാർഥികൾ, വിശ്വാസികളുടെ പ്രതിനിധികൾ എന്നിവരുമായി കൂടിക്കാഴ്ച നടത്തി. സാന്‍റ് ആഞ്ചെലോ ലൊജിജിയാനോയിലെ സെന്‍റ് ആന്‍റണി ആബട്ട് ആൻഡ് സെന്‍റ് ഫ്രഞ്ചെസ്ക കാബ്രിനി ഇടവകപ്പള്ളിയും മാർപാപ്പ സന്ദർശിച്ചു.
അഗസ്റ്റീനിയൻ സന്യാസ സമൂഹത്തിന്‍റെ പ്രിയോർ ജനറൽ എന്നനിലയിൽ പാവിയ ബസിലിക്ക സന്ദർശിച്ചിട്ടുണ്ടെങ്കിലും സാർവത്രികസഭയുടെ അധ്യക്ഷന്‍ എന്നനിലയില്‍ നടത്തുന്ന ആദ്യ സന്ദര്‍ശനമാണിത്.
International
വത്തിക്കാൻ സിറ്റി: യുഎസും ഇറാനും തമ്മിലുള്ള സമാധാന കരാറിനെ ലെയോ പതിനാലാമൻ മാർപാപ്പ സ്വാഗതം ചെയ്തു.
പശ്ചിമേഷ്യയിൽ സമാധാനം പുലരുമെന്നു പ്രത്യാശ പ്രകടിപ്പിച്ച മാർപാപ്പ, യുക്രെയ്നിലെ യുദ്ധം അവസാനിപ്പിക്കാനും ഇതിനായി പ്രാർഥിക്കാനും ആഹ്വാനം ചെയ്തു.
ഇറാനും യുഎസും ചർച്ചകളുടെയും സഹകരണത്തിന്‍റെയും പാതയിൽ തുടരണമെന്നും ഇന്നലെ നടന്ന പ്രതിവാര പൊതുസദസിൽ സംസാരിക്കവേ മാർപാപ്പ അഭ്യർഥിച്ചു.
“ക്ഷമയോടെയുള്ള ചർച്ചകളുടെയും നയതന്ത്രനീക്കങ്ങളുടെയും ഫലമായി ഇറാനും യുഎസും തമ്മിൽ വെള്ളിയാഴ്ച ഒപ്പുവയ്ക്കാനിരിക്കുന്ന കരാറിലെത്തിയതിനെ ഞാൻ സംതൃപ്തിയോടെ സ്വാഗതം ചെയ്യുന്നു.
ഈ കരാർ പരസ്പരവിശ്വാസവും സുരക്ഷയും പശ്ചിമേഷ്യയിലെ സ്ഥിരതയും ശക്തിപ്പെടുത്താൻ സഹായിക്കുമെന്നും ജനങ്ങൾക്കിടയിൽ ചർച്ചകളുടെയും സഹകരണത്തിന്‍റെയും വഴികൾ പ്രോത്സാഹിപ്പിക്കുമെന്നും ഞാൻ പ്രത്യാശിക്കുന്നു’’മാർപാപ്പ പറഞ്ഞു.
സമാധാനചർച്ചകൾക്കായി മധ്യസ്ഥത വഹിക്കുകയും സൗകര്യമൊരുക്കാൻ പ്രയത്നിക്കുകയും ചെയ്ത മൂന്നാം കക്ഷി രാജ്യങ്ങൾക്ക് മാർപാപ്പ നന്ദി അറിയിച്ചു.
International
വത്തിക്കാൻ സിറ്റി: പരിസ്ഥിതിസംരക്ഷണത്തിന് വിശ്വാസവും പ്രത്യാശയും സ്നേഹവും പ്രധാനപ്പെട്ട ഘടകങ്ങളാണെന്നു ലെയോ പതിനാലാമൻ മാർപാപ്പ. ഈ പ്രതിസന്ധി സാമൂഹികവും നൈതികവും സാമ്പത്തികവുമായ തലങ്ങളെ സ്പർശിക്കുന്ന ഒന്നാണെന്നും പരിസ്ഥിതിയെ സംബന്ധിച്ചു വിയന്നയിൽ നടക്കുന്ന പത്താമത് ഓസ്ട്രിയൻ ലോക ഉച്ചകോടിയിൽ പങ്കെടുക്കുന്നവരെ അഭിസംബോധന ചെയ്ത് അയച്ച വീഡിയോ സന്ദേശത്തിൽ മാർപാപ്പ വ്യക്തമാക്കി.
പാരിസ്ഥിതികവിഷയം ധാർമികമായ ഒരു വിഷയമാണെന്ന് സഭ എപ്പോഴും ഉയർത്തിക്കാട്ടിയിട്ടുണ്ടെന്ന് മാർപാപ്പ ചൂണ്ടിക്കാട്ടി. പാരിസ്ഥിതിക പ്രതിസന്ധി ഒരു ഒറ്റപ്പെട്ട പ്രശ്നമല്ല; മറിച്ച്, സമകാലിക സാമൂഹിക-സാമ്പത്തിക പ്രതിസന്ധിയുടെ പാരിസ്ഥിതികവശമാണ്. ചിലരെ സംബന്ധിച്ചിടത്തോളം കാലാവസ്ഥാ വ്യതിയാനത്തിന്‍റെയും പരിസ്ഥിതി സംരക്ഷണത്തിന്‍റെയും ചോദ്യങ്ങളിൽ വിശ്വാസത്തിനു കാര്യമായ സംഭാവനകൾ ഇല്ലെന്നു തോന്നുമെങ്കിലും ഈ പ്രശ്നത്തെ അഭിമുഖീകരിക്കുവാൻ മതങ്ങൾ ഏറെ പ്രധാനപ്പെട്ടതാണ് മാർപാപ്പ പറഞ്ഞു
ലോകം ദൈവം സൃഷ്‌ടിച്ചതാണെന്ന് വിശ്വസിക്കുന്നവർ സൃഷ്‌ടിയെ പരിപാലിക്കാനുള്ള ഉത്തരവാദിത്വവും ഏറ്റെടുക്കുന്നു. ഇത് വിശ്വാസത്തിന്‍റെ ഒരു ആവശ്യകതയാണ്. പല പാരമ്പര്യങ്ങളിലെയും വിശ്വാസികൾ ‘സൃഷ്‌ടി’ ഒരു ദൈവികദാനമായി മനസിലാക്കുന്നതും അതുപോലെ ജീവിതം പവിത്രമാണെന്നും അതിനാൽ ബഹുമാനിക്കപ്പെടേണ്ടതാണെന്നു പഠിപ്പിക്കുന്നതും പരിസ്ഥിതിസംരക്ഷണത്തിന് വിശ്വാസത്തിന്‍റെ പ്രാധാന്യം ഓർമപ്പെടുത്തുന്നു- മാർപാപ്പ പറഞ്ഞു.
ഇന്നത്തെ ആഗോള പ്രതിസന്ധികൾ മനുഷ്യകുലത്തെ ആശങ്കയിലാഴ്ത്തിയിട്ടുണ്ട്. സൃഷ്‌ടിയോടുള്ള ബഹുമാനമില്ലായ്മ, പ്രകൃതിവിഭവങ്ങൾ കൊള്ളയടിക്കുന്നത്, കാലാവസ്ഥാ വ്യതിയാനം എന്നിവ സമാധാനത്തിന് ഭീഷണി ഉയർത്തിയിട്ടുണ്ട്.
ഈ വെല്ലുവിളികൾക്കു ഫലപ്രദമായ പരിഹാരങ്ങൾ കണ്ടെത്തുന്നതിന് അന്താരാഷ്‌ട്ര സഹകരണം ആവശ്യമാണെന്നും മാർപാപ്പ എടുത്തുപറഞ്ഞു.
International
റോം: യുഎൻ വേൾഡ് ഫുഡ് പ്രോഗ്രാമിന്‍റെ റോമിലെ ആസ്ഥാനം ഈമാസം 22ന് ലെയോ പതിനാലാമൻ മാർപാപ്പ സന്ദർശിക്കും.
സംഘടനയുടെ എക്സിക്യൂട്ടീവ് ഡയറക്‌ടറുടെ ക്ഷണപ്രകാരമാണു സന്ദർശനം.
സന്ദർശനവേളയിൽ എക്സിക്യൂട്ടീവ് ബോർഡിന്‍റെ വാർഷിക സമ്മേളനത്തിൽ പങ്കെടുക്കുന്നവരുമായും സംഘടനയിലെ ജീവനക്കാരുമായും അവരുടെ കുടുംബാംഗങ്ങളുമായും മാർപാപ്പ കൂടിക്കാഴ്ച നടത്തും.
International
വത്തിക്കാൻ സിറ്റി: സീറോമലങ്കര കത്തോലിക്കാ മേജർ ആർക്കിഎപ്പിസ്കോപ്പൽ സഭയുടെ യൂറോപ്പ്, യുകെ കണ്‍വൻഷനിൽ സംബന്ധിക്കുവാൻ റോമിൽ എത്തിച്ചേർന്ന സഭാ പ്രതിനിധികളും സഭയുടെ തലവനായ കർദിനാൾ മാർ ബസേലിയോസ് ക്ലീമിസ് കാതോലിക്കാ ബാവയും മറ്റു സഭാധ്യക്ഷന്മാരുമായി ലെയോ പതിനാലാമൻ മാർപാപ്പ ഇന്നലെ കൂടിക്കാഴ്ച നടത്തി.
സഭയുടെ പാരന്പര്യത്തെയും ആരാധനക്രമ സന്പന്നതയെയും എടുത്തു പറഞ്ഞുകൊണ്ട് മാർപാപ്പ സന്ദേശം പങ്കുവച്ചു.ഇന്നലെ 67-ാം പിറന്നാൾ ആഘോഷിച്ച കർദിനാളിനു മാർപാപ്പ ആശംസകൾ നേർന്നു. ഒപ്പം മെത്രാഭിഷേകത്തിന്‍റെ 25 വർഷങ്ങൾ പൂർത്തിയാക്കുന്നതിന്‍റെ ആശംസകളും നേർന്നു.
യൂറോപ്പിൽ താമസിക്കുന്ന സീറോ മലങ്കര വിശ്വാസികളുടെ അജപാലന പ്രവർത്തനങ്ങൾക്കായി അടുത്തിടെ നിയമിതനായ അപ്പസ്തോലിക വിസിറ്റേറ്റർ കുര്യാക്കോസ് മാർ ഒസ്താത്തിയോസിനും മാർപാപ്പാ ആശംസകൾ അർപ്പിച്ചു.
1932 ജൂണ്‍ 11 ന് പതിനൊന്നാം പീയൂസ് മാർപാപ്പാ സീറോ മലങ്കര സഭാ ഹയരാർക്കി സ്ഥാപിച്ചുകൊണ്ടു പ്രസിദ്ധീകരിച്ച ’ക്രിസ്തോ പാസ്തോറും’ എന്ന അപ്പസ്തോലിക രേഖ ആരംഭിക്കുന്നത്, ക്രിസ്തുവിനോടുള്ള നന്ദി പ്രകാശനത്തോടെയാണെന്നത് മാർപാപ്പ ചൂണ്ടിക്കാട്ടി.
അതിനാൽ സഭാ കൂട്ടായ്മയിലേക്ക് വീണ്ടും കടന്നുവരുവാൻ നിരവധി വൈദികരെയും സന്യസ്തരെയും വിശ്വാസികളെയും പ്രത്യേകമായി ബഥനി സന്യാസസഭയെയും നയിച്ച ധന്യൻ മാർ ഈവാനിയോസ്, മാർ തെയോഫിലസ് എന്നിവരെയോർത്തു ദൈവത്തിനു നന്ദിയർപ്പിക്കാമെന്നും മാർപാപ്പാ പറഞ്ഞു.
International
വത്തിക്കാൻ സിറ്റി: ലെയോ പതിനാലാമൻ മാർപാപ്പ സെപ്റ്റംബർ 25 മുതൽ 28 വരെ ഫ്രാൻസ് സന്ദർശിക്കും.
25ന് പാരീസിലെത്തുന്ന മാർപാപ്പ അന്നു വൈകുന്നേരം നൊത്ര് ദാം കത്തീഡ്രലിൽ നടക്കുന്ന സായാഹ്‌നപ്രാർഥനയ്ക്ക് നേതൃത്വം നൽകും. തുടർന്ന് യുവാക്കളുമായും വൈദികരുമായും കൂടിക്കാഴ്ച നടത്തും.
26ന് പാരീസിലെ തുറന്ന വേദിയിൽ വിശുദ്ധ കുർബാന അർപ്പിക്കും. തുടർന്ന് പാരീസിലെ യുനെസ്കോ ആസ്ഥാനം സന്ദർശിക്കുന്ന മാർപാപ്പ യുഎൻ സാംസ്കാരിക ഏജൻസി ഉദ്യോഗസ്ഥരെ അഭിസംബോധന ചെയ്യും.
27ന് മരിയൻ തീർഥാടനകേന്ദ്രമായ ലൂർദിൽ എത്തുന്ന മാർപാപ്പ അവിടെ വിശുദ്ധ കുർബാന അർപ്പിക്കും. 28ന് തെക്കുകിഴക്കൻ നഗരമായ മെറ്റ്സ് സന്ദർശിക്കുന്ന മാർപാപ്പ അവിടത്തെ കത്തീഡ്രലിൽ വിശുദ്ധ കുർബാന അർപ്പിക്കുകയും വിവിധ പരിപാടികളിൽ പങ്കെടുക്കുകയും ചെയ്യും.
പ്രസിഡന്‍റ് എമ്മാനുവൽ മക്രോണിന്‍റെ ആവർത്തിച്ചുള്ള ക്ഷണപ്രകാരമാണ് മാർപാപ്പയുടെ ഫ്രാൻസ് സന്ദർശനം.
International
മാഡ്രിസ്:ഒരു മനുഷ്യനും ഒറ്റപ്പെട്ട ദ്വീപല്ലെന്നും ക്രിസ്തീയജീവിതം എന്നത് മറ്റുള്ളവരിലേക്കും ദൈവത്തിലേക്കുമുള്ള നിരന്തരമായ ഒരു പ്രയാണമാണെന്നും ലെയോ പതിനാലാമൻ മാർപാപ്പ. ഏഴു ദിവസം നീണ്ട സ്പെയിൻ സന്ദർശനത്തിനു സമാപനം കുറിച്ച് കാനറി ദ്വീപിലെ മാഡ്രിസ് ടെനറിഫ് നഗരത്തിലുള്ള സാന്താക്രൂസ് ഡി ടെനറിഫ് തുറമുഖത്ത് വിശുദ്ധ കുർബാനയർപ്പിച്ചു വചനസന്ദേശം നൽകുകയായിരുന്നു മാർപാപ്പ.
ക്രിസ്തുവിന്‍റെ ഹൃദയത്തിലെ സ്നേഹക്കടൽ കണ്ടെത്താൻ മറ്റുള്ളവരെ സഹായിക്കണം. എല്ലാവരുടെയും സന്തോഷങ്ങളും പ്രത്യാശകളും സങ്കടങ്ങളും ആശങ്കകളും പ്രതിധ്വനിക്കുന്ന ഒരിടമാണു യേശുവിന്‍റെ തിരുഹൃദയം. അവിടേക്കു നോക്കാൻ നമുക്കാകണം.
ഭൗതികവാദം, ലാഭക്കൊതി എന്നിവയാൽ വിഴുങ്ങപ്പെട്ട ഒരു സമൂഹത്തിന്‍റെ കെണികളെക്കുറിച്ച് മാർപാപ്പ മുന്നറിയിപ്പ് നൽകി. ഇവ വ്യക്തികളെ ഫലശൂന്യമായ ഒരു ചലനാത്മകതയിൽ തളച്ചിടാൻ ഇടയാക്കുമെന്നും അദ്ദേഹം ഓർമിപ്പിച്ചു. കേവലം കച്ചവടത്തിനപ്പുറം ലാളിത്യവും മനുഷ്യബന്ധങ്ങളുടെ മൂല്യവും വീണ്ടെടുക്കാൻ ടൂറിസംകേന്ദ്രംകൂടിയായ പ്രദേശത്തെ ജനങ്ങളോടും സന്ദർശകരോടും മാർപാപ്പ അഭ്യർഥിച്ചു.
അറ്റ്‌ലാന്‍റിക് സമുദ്രം മുറിച്ചുകടന്നെത്തുന്ന കുടിയേറ്റക്കാരുടെയും അഭയാർഥികളുടെയും ഒരു പ്രധാന ഇടത്താവളമാണു കാനറി ദ്വീപുകൾ എന്ന കാര്യം ഓർമിപ്പിച്ച മാർപാപ്പ, മനുഷ്യക്കടത്തുകാരുടെ ചൂഷണം ഉൾപ്പെടെ കുടിയേറ്റക്കാർ നേരിടുന്ന ദുരിതങ്ങൾ ചൂണ്ടിക്കാട്ടി. അവർക്കു ഭൗതികസഹായം മാത്രമല്ല യഥാർഥ സാഹോദര്യംകൂടിയാണു നൽകേണ്ടത്.
കാനറി ദ്വീപുകളിലെ ജനങ്ങൾ നൽകിയ സ്വീകരണത്തിനും സ്നേഹത്തിനും നന്ദി പറഞ്ഞ മാർപാപ്പ, എല്ലാവരെയും ഒരുപോലെ പരിഗണിക്കാൻ സഭാവിശ്വാസികളോട് അഭ്യർഥിച്ചു. സ്പെയിനിലെ വലിയ കത്തോലിക്കാസമൂഹം ചൊരിഞ്ഞ സ്നേഹവായ്പിനാലും സഭയോടുള്ള ഈ സമൂഹത്തിന്‍റെ സ്നേഹത്തിന്‍റെയും വിശ്വാസത്തിന്‍റെയും സാക്ഷ്യങ്ങളാലും ഏറെ നന്ദിയോടെയാണു താൻ റോമിലേക്കു മടങ്ങുന്നതെന്നും മാർപാപ്പ കൂട്ടിച്ചേർത്തു.
നേരത്തേ ടെനറിഫിലുള്ള ‘ലാസ് റൈസസ്’സെന്‍ററിലെ കുടിയേറ്റക്കാരുമായി മാർപാപ്പ കൂടിക്കാഴ്ച നടത്തി. കുടിയേറ്റക്കാരെ താൻ ഹൃദയത്തിൽ വഹിക്കുന്നുണ്ടെന്നും തന്‍റെ പ്രാർഥനകളിൽ അവരെ ഓർക്കുമെന്നും മാർപാപ്പ പറഞ്ഞു. ഏഴുദിവസത്തെ സ്പെയിൻ സന്ദർശനം പൂർത്തിയാക്കി ഇന്നലെ വൈകുന്നേരം ആറോടെ മാർപാപ്പ റോമിലേക്കു മടങ്ങി.
International
ബാഴ്സലോണ: അഭയാര്‍ഥികളുടെ ദുരിതങ്ങള്‍ക്കുനേരേ ലോകം കണ്ണടയ്ക്കരുതെന്ന് ലെയോ പതിനാലാമന് മാര്‍പാപ്പ. മനുഷ്യന്‍റെ അന്തസിന് പാസ്പോര്‍ട്ടില്ലെന്നും അതിര്‍ത്തികള്‍ കടക്കുമ്പോള്‍ അതിന്‍റെ മൂല്യം നഷ്‌ടപ്പെടുന്നില്ലെന്നും അദ്ദേഹം ഓര്‍മിപ്പിച്ചു.
യൂറോപ്പിലെ കുടിയേറ്റത്തിന്‍റെ ഏറ്റവും ഹൃദയഭേദകമായ പ്രതീകങ്ങളിലൊന്നായി മാറിയ സ്പെയിനിലെ ഗ്രാന്‍ഡ് കാനറി ദ്വീപുകളുടെ തെക്കന്‍ തീരത്തുള്ള ആര്‍ഗ്വിനെഗ്വിന്‍ തുറമുഖത്ത് അഭയാര്‍ഥികളുമായും അവരെ രക്ഷപ്പെടുത്തുകയും സഹായിക്കുകയും ചെയ്യുന്ന സംഘടനാപ്രവര്‍ത്തകരുമായും നടത്തിയ കൂടിക്കാഴ്ചയില്‍ സംസാരിക്കുകയായിരുന്നു മാര്‍പാപ്പ.
നിയമപരവും സുരക്ഷിതവുമായ കുടിയേറ്റ പാതകള്‍ വേണമെന്ന് ആവശ്യപ്പെട്ട മാര്‍പാപ്പ, മനുഷ്യക്കടത്തിനെയും ചൂഷണത്തെയും അപലപിച്ചു.
കുടിയേറ്റ നയം മനുഷ്യന്‍റെ അന്തസിനോടുള്ള ആദരവില്‍ അധിഷ്ഠിതമായിരിക്കണം. നിയമപരവും സുരക്ഷിതവുമായ പാതകള്‍ വേണം. മനുഷ്യക്കടത്തിന് ഇരയായവര്‍ക്ക് ഫലപ്രദമായ സംരക്ഷണം നല്‍കണം. കള്ളക്കടത്തുകാര്‍ക്കെതിരേ അന്താരാഷ്‌ട്രതലത്തില്‍ സഹകരണം ഉറപ്പാക്കണം. അഭയാര്‍ഥികളെ സ്വീകരിക്കുന്നതിനും സമൂഹത്തില്‍ ഉള്‍ക്കൊള്ളുന്നതിനും അര്‍ഥവത്തായ നടപടികള്‍ ഉണ്ടാകണം- മാര്‍പാപ്പ ആവശ്യപ്പെട്ടു.
അഭയം തേടി കടലിലൂടെ സഞ്ചരിക്കുന്നതിനിടെ മരിച്ചവരുടെ സ്മരണയ്ക്കായി പുഷ്പാര്‍ച്ചനയും ഒരു മിനിറ്റ് മൗനാചരണവും നടത്തിക്കൊണ്ടാണ് ചടങ്ങ് സമാപിച്ചത്.
കോവിഡ് മഹാമാരി പടര്‍ന്നുപിടിച്ച 2020ല് ദിവസങ്ങള്‍ക്കുള്ളില്‍ ആയിരക്കണക്കിന് അഭയാര്‍ഥികള്‍ വന്നെത്തിയതിനെത്തുടര്‍ന്ന് ‘നാണക്കേടിന്‍റെ തുറമുഖം’ എന്നു വിളിക്കപ്പെട്ട സ്ഥലത്താണ് കൂടിക്കാഴ്ച നടന്നത്. പടിഞ്ഞാറന്‍ ആഫ്രിക്കയിലെ ദാരിദ്ര്യം, സംഘര്‍ഷങ്ങള്‍, ചൂഷണം എന്നിവയില്‍നിന്നു രക്ഷതേടി പലായനം ചെയ്യുന്ന പലര്‍ക്കും കാനറി ദ്വീപുകളാണ് യൂറോപ്പിലേക്കുള്ള ഏറ്റവും അടുത്തുള്ള പ്രവേശന കവാടം.
ഗ്രാന്‍ഡ് കാനറി ദ്വീപുകളുടെ തലസ്ഥാനമായ ലാസ് പാല്‍മാസ് ഡി ഗ്രാന്‍ കാനറിയിലെ സെന്‍റ് ആന്‍സ് കത്തീഡ്രലില്‍ മെത്രാന്മാര്‍, വൈദികര്‍, സന്യസ്തര്‍, വൈദിക വിദ്യാര്‍ഥികള്‍ എന്നിവരുമായും മാര്‍പാപ്പ കൂടിക്കാഴ്ച നടത്തി. ഏഴു ദിവസത്തെ സ്‌പെയിന്‍ സന്ദര്‍ശനത്തിനുശേഷം മാര്‍പാപ്പ ഇന്ന് വത്തിക്കാനിലേക്ക് മടങ്ങും.
International
ബാഴ്സലോണ: ക്രിസ്തുവിന്‍റെ നാമം ഏറ്റുപറഞ്ഞ് യുദ്ധം ചെയ്യാൻ കഴിയില്ലെന്ന് ലെയോ പതിനാലാമൻ മാർപാപ്പ. യേശുക്രിസ്തുവിലുള്ള യഥാർഥ വിശ്വാസം അക്രമവുമായി ഒരിക്കലും ഇണങ്ങില്ലെന്നും മാർപാപ്പ പറഞ്ഞു.
ലോകത്തിലെ ഏറ്റവും ഉയരം കൂടിയ ദേവാലയഗോപുരമായ ബാഴ്സലോണ നഗരത്തിലെ ഈശോയുടെ ഗോപുരം ആശീർവദിച്ച് സഗ്രാദാ ഫമിലിയ (തിരുക്കുടുംബം) ബസിലിക്കയിൽ അർപ്പിച്ച വിശുദ്ധ കുർബാനമധ്യേ നൽകിയ സന്ദേശത്തിലാണ് മാർപാപ്പ യുദ്ധത്തിനെതിരേ ശക്തമായ പ്രതികരണം നടത്തിയത്.
സമാധാനത്തിന്‍റെ രാജകുമാരനെ അനുഗമിക്കുന്നു എന്ന് അവകാശപ്പെട്ട് നിരപരാധികളെ കൊല്ലാൻ കഴിയില്ല. ദൈവകരുണ ചോദിക്കുന്ന വായകൊണ്ടും സ്വന്തം കൈകൊണ്ടും സ്വന്തം ഉദാസീനതകൊണ്ടും ദുഃഖിക്കുന്നവരെ തള്ളിക്കളയാൻ കഴിയില്ല. ക്രൂരതയെ തടയാത്ത വിശ്വാസം വിശ്വാസമല്ല, അത് വ‍്യാജമാണെന്നും പാപ്പാ പറഞ്ഞു.
ശിലകൾക്ക് ആകൃതി നൽകുന്നതും ഒരുമിച്ച് നാം വസിക്കുന്ന ഈ ഗൃഹത്തിന് അർഥം നൽകുന്നതും വിശ്വാസം തന്നെയാണ്. സഗ്രാദാ ഫമിലിയ മനുഷ്യന്‍റെ ബുദ്ധിശക്തിയുടെ സ്മാരകമല്ല. തലമുറകളിലൂടെ, പരാജയങ്ങളിലൂടെ, ഒരു നൂറ്റാണ്ടിന്‍റെ അപൂർണതകളിലൂടെ ദൈവത്തിൽ വിശ്വസിച്ചുകൊണ്ടിരുന്നതിന്‍റെ സ്മാരകമാണ്.
ഈ ദേവാലയം ഒരു വാസ്തുശില്പ മഹാദ്ഭുതമാണ്. എന്നാൽ അതിലുമേറെ ശിലകളാലും വർണങ്ങളാലും പ്രകാശത്താലും നിർമിതമായ ഒരു ഹൃദ്യമായ വിശ്വാസ പ്രബോധനമാണ്. നാമൊക്കെ ഈ ദേവാലയത്തിന്‍റെ ജീവനുള്ള ശിലകളാണ്.
ദേവാലയം അപൂർണമാണ്; നാമും അപൂർണരാണ്. ഭിത്തികൾക്ക് ഇടയിൽ ചോദ്യങ്ങൾ ഇനിയും ബാക്കിയാണ്; ഹൃദയങ്ങൾ ഇനിയും തുറക്കാൻ കഴിയാത്ത ഭാഗങ്ങൾ ഉണ്ട്. നാമൊക്കെ ഒരു നിർമാണ പ്രക്രിയയിലാണ്, അത് നൈരാശ്യത്തിന്‍റെ അടയാളമല്ല, പ്രത്യാശയുടെ ലക്ഷണമാണെന്നും മാർപാപ്പ ഉദ്ബോധിപ്പിച്ചു.
സ്പെയിൻ രാജാവ് ഫിലിപ്പ് ആറാമൻ, രാജ്ഞി ലെറ്റിഷ്യ, പ്രധാനമന്ത്രി പെദ്രോ സാഞ്ചസ് എന്നിവർ ബലിപീഠത്തിന് മുൻപിൽ ഉണ്ടായിരുന്നു. സീറോമലബാർ സഭയിൽനിന്ന് ഉജ്ജയിൻ ആർച്ച്ബിഷപ് മാർ സെബസ്റ്റ്യൻ വടക്കേൽ, പാലാ ബിഷപ് മാർ ജോസഫ് കല്ലറങ്ങാട്ട്, ഗ്രേറ്റ് ബ്രിട്ടൺ ബിഷപ് മാർ ജോസഫ് സ്രാമ്പിക്കൽ എന്നിവർ തിരുക്കർമങ്ങളിൽ പങ്കാളികളായി. എംഎസ്ടി സമൂഹാംഗമായ മലയാളി വൈദികൻ ഫാ. ജോബി സെബാസ്റ്റ‍്യൻ കാപ്പിപ്പറമ്പിൽ സഗ്രാദാ ഫമിലിയ ബസിലിക്കയിൽ അസിസ്റ്റന്‍റ് വികാരിയാണ്.
Leader Page
മനുഷ്യൻ സംവദിക്കുന്ന ഭാഷയ്ക്ക് അവന്‍റെ പുരോഗതിയിൽ വലിയ പങ്കുണ്ട്. ഇന്ന് ലോകം മനുഷ്യനെക്കുറിച്ചു സംസാരിക്കുന്നത് പ്രധാനമായും ഒരുതരം സാമ്പത്തിക ഭാഷയിലാണ്. ഉത്പാദനവും കൈമാറ്റവും ലാഭവും നഷ്ടവും ഒക്കെയാണ് മനുഷ്യനെയും സമൂഹങ്ങളെയും രാഷ്‌ട്രങ്ങളെയുംകുറിച്ചുള്ള സംഭാഷണത്തിന്‍റെ ഭാഷാശൈലി. പൊതുനന്മയ്ക്കുവേണ്ടി പ്രവർത്തിക്കാൻ സുവിശേഷപരമായ ഭാഷ ആവശ്യമാണെന്ന് പാപ്പാ ഓർമിപ്പിക്കുന്നു.
സുവിശേഷാത്മകമായ ഭാഷ എന്നത് മനുഷ്യന്‍റെ ആന്തരിക മഹത്വത്തെ മുഖവിലയ്ക്കെടുക്കുന്ന ഭാഷയാണ്. ദൈവ മഹത്വം, മനുഷ്യ വ്യക്തിയുടെ അന്തഃസ്, സമ്പത്തിന്‍റെ മേലുള്ള പൊതു അവകാശം, ദരിദ്രർക്കുള്ള പ്രത്യേക പരിഗണന, നമ്മുടെ പൊതുഭവനമായ ഭൂമിയുടെ സംരക്ഷണം, സമാധാനം, വിശുദ്ധി, ആധ്യാത്മികത തുടങ്ങിയ അടിസ്ഥാന ദർശനങ്ങളുടെ ചൈതന്യമുൾക്കൊള്ളുന്ന ഒരു ഭാഷ മനുഷ്യവംശത്തിന്‍റെ കൂട്ടായ്മയ്ക്കും നിലനിൽപ്പിനും ആവശ്യമുണ്ട്. മറ്റുള്ളവരെ അപമാനിക്കുന്നതോ ശത്രുത വളർത്തുന്നതോ ആയ വാക്കുകൾ ഒഴിവാക്കുന്നതും സുവിശേഷാത്മക ഭാഷയുടെ ഭാഗമാണ്.
◄ മനുഷ്യന്‍റെ മഹത്വം എവിടെനിന്ന്?
മനുഷ്യന്‍റെ മഹത്വം എന്തിലാണ് അടങ്ങിയിരിക്കുന്നത് എന്നത് ഒരു വലിയ ചോദ്യമാണ്. ഒരാൾ ആർജിച്ചെടുക്കുന്ന സമ്പത്തും സ്ഥാനമാനങ്ങളുമാണ് അയാളുടെ മഹത്വത്തിന്‍റെ ആധാരം എന്നൊരു ചിന്ത എക്കാലത്തും പ്രബലമാണ്. തത്ഫലമായി ഒരാൾ തന്‍റെ മൂല്യമോ മഹത്വമോ സ്വയം സമ്പാദിക്കുകയോ തെളിയിക്കുകയോ വേണം എന്ന സ്ഥിതിയുണ്ടാകുന്നത് വളരെ അപകടകരമാണ്. ഇതുവഴി കാര്യക്ഷമതയുള്ളവർക്കു കൂടുതൽ മൂല്യം കൽപിക്കപ്പെടുന്നു. തത്ഫലമായി വ്യക്തികൾ ലക്ഷ്യം നേടാനുള്ള ഉപകരണങ്ങളായി ചുരുങ്ങുകയും സ്വന്തം നിലയിൽ ആദരിക്കപ്പെടേണ്ട വ്യക്തികളെന്ന നില നഷ്ടപ്പെടുകയും ചെയ്യുന്നു. എന്നാൽ, മനുഷ്യന്‍റെ മൂല്യം അവൻ നേടുന്നതിലോ ഉത്പാദിപ്പിക്കുന്നതിലോ അല്ല; മനുഷ്യനാണെന്ന കാരണത്താൽ തന്നെയാണെന്ന് പാപ്പാ പഠിപ്പിക്കുന്നു.
അതായത്, മനുഷ്യന്‍റെ മഹത്വം "അസ്തിത്വപരമായ (ontological dignity) മഹത്വ' മാണ്. “അത് അവൻ "മനുഷ്യൻ ആയിരിക്കുന്നു' എന്നതുകൊണ്ടും അവൻ ദൈവത്താൽ സൃഷ്ടിക്കപ്പെട്ടവനാണ് എന്നതുകൊണ്ടും ദൈവം അവനെ സ്നേഹിക്കുന്നു എന്നുള്ളതുകൊണ്ടുമുള്ള മഹത്വമാണ്. ഒരു പാപത്തിനും പരാജയത്തിനും അപമാനത്തിനുംപോലും ഈ അടിസ്ഥാന മഹത്വം ഇല്ലാതാക്കാനാവില്ല” എന്ന മാർപാപ്പയുടെ വീക്ഷണം എത്ര ശ്രേഷ്ഠമാണ്!
◄ മനുഷ്യാവകാശങ്ങളുടെ പരമമായ മൂല്യം
മനുഷ്യന്‍റെ ലംഘിക്കാനാകാത്ത മഹത്വത്തോടു ചേർന്നു നിൽക്കുന്നതാണ് അവന്‍റെ അവകാശങ്ങൾ. മനുഷ്യാവകാശങ്ങളെക്കുറിച്ചുള്ള ആധുനിക കാലഘട്ടത്തിലെ തിരിച്ചറിവും മനുഷ്യാവകാശ പ്രഖ്യാപനങ്ങളും സഭ അംഗീകരിക്കുകയും നന്ദിയോടെ അനുസ്മരിക്കുകയും ചെയ്യുന്നു. 1948 ഡിസംബർ 10ന് ഐക്യരാഷ്‌ട്രസഭ പ്രഖ്യാപിച്ച മനുഷ്യാവകാശങ്ങളുടെ സാർവദേശീയ പ്രഖ്യാപനം നമ്മുടെ കാലഘട്ടത്തിലെ മനുഷ്യ മനഃസാക്ഷിയുടെ മഹത്തായ പ്രകടനങ്ങളിലൊന്നാണെന്ന് വിശുദ്ധ ജോൺ പോൾ രണ്ടാമൻ അഭിപ്രായപ്പെട്ടത് ലെയോ പാപ്പാ ആവർത്തിക്കുന്നു.
ക്രൈസ്തവ വീക്ഷണത്തിൽ മനുഷ്യാവകാശങ്ങൾ മനുഷ്യ മഹത്വത്തിന്‍റെ അന്തർലീന പ്രകടനങ്ങളാണ്, അവ പുറത്തുനിന്ന് നൽകപ്പെടുന്നവയല്ല. മനുഷ്യാവകാശങ്ങൾ ലംഘിക്കപ്പെടാനാവാത്തവയും അന്യാധീനപ്പെടുത്താൻ കഴിയാത്തവയുമാണ്. ഇവയിൽ ഏറ്റവും അടിസ്ഥാനപരമായത് ജീവിക്കാനുള്ള അവകാശമാണ് - ഗർഭധാരണ നിമിഷം മുതൽ സ്വാഭാവിക മരണംവരെ. ഈ അവകാശമില്ലാതെ മറ്റൊരു അവകാശവും പ്രാവർത്തികമാക്കാനാവില്ല. അതുകൊണ്ടാണ് ഗർഭച്ഛിദ്രം, നിരപരാധികളുടെ കൊലപാതകം, ദയാവധം എന്നിവ സഭ ഗുരുതരമായ തെറ്റുകളായി കണക്കാക്കുന്നത്.
◄ സാമൂഹിക പ്രബോധനത്തിന്‍റെ അടിസ്ഥാന തത്വങ്ങൾ
സഭയുടെ സാമൂഹിക പ്രബോധനങ്ങൾ അഞ്ച് അടിസ്ഥാന തത്വങ്ങളുടെ മേലാണ് നിലനിൽക്കുന്നത് എന്ന് പാപ്പാ ഓർമിപ്പിക്കുന്നു. ഈ അടിസ്ഥാന തത്വങ്ങളെക്കുറിച്ചുള്ള അവബോധം ധാർമികമായി നിലനിൽക്കാൻ പരിശ്രമിക്കുന്ന ഏതൊരു സമൂഹത്തിനും അത്യാവശ്യമാണ്. അവയിൽ ഒന്നാമത്തേത് സമൂഹത്തിന്‍റെ പൊതുനന്മ എന്ന തത്വമാണ്. ഓരോ വ്യക്തിയുടെയും മഹത്വത്തെ സാമൂഹിക തലത്തിൽ അംഗീകരിക്കുന്നതാണ് പൊതുനന്മ.
ഒരു ക്രൈസ്തവനെ സംബന്ധിച്ചിടത്തോളം, സ്വന്തം താത്പര്യങ്ങളുടെ പരിമിതികളെ അതിജീവിച്ചു പൊതുനന്മയ്ക്കായി പ്രവർത്തിക്കുക എന്നത് ഒരു അടിസ്ഥാന മൂല്യമാണ്. ഓരോരുത്തരും വളരുമ്പോൾ പൊതുനന്മയുണ്ടാകുന്നു എന്നതൊരു മിഥ്യാധാരണയാണ് എന്ന് മാർപാപ്പ അഭിപ്രായപ്പെടുന്നു. പരസ്പര ആശ്രയത്വത്തിൽനിന്നാണ് പൊതുനന്മ രൂപപ്പെടുന്നത്. ഓരോ വ്യക്തികളുടെയും നന്മകൾ കൂട്ടിച്ചേർക്കുമ്പോൾ ഉണ്ടാകുന്നതിനേക്കാൾ ഒരു അധിക മൂല്യം പൊതുനന്മയിൽ ഉൾച്ചേരുന്നുണ്ട് എന്ന് പാപ്പാ കരുതുന്നു.
സൃഷ്ടവസ്തുക്കൾ എല്ലാവരുടേതുമാണെന്നതാണ് സാമൂഹിക പ്രബോധനങ്ങളുടെ രണ്ടാമത്തെ തത്വം. ഭൂമി, വെള്ളം, വായു, പ്രകൃതിവിഭവങ്ങൾ എന്നിവ മനുഷ്യവംശത്തിനു മുഴുവനായി ദൈവം നൽകിയ ദാനങ്ങളാണ്. ഓരോ വ്യക്തിക്കും ഇപ്പോഴും ഭാവിയിലും ഈ വിഭവങ്ങൾ ഉപയോഗിക്കാനുള്ള അവകാശമുണ്ട്. സ്വകാര്യ സ്വത്തവകാശം അംഗീകരിക്കുമ്പോഴും ആ അവകാശം എപ്പോഴും സ്രഷ്ടവസ്തുക്കൾ പൊതുഉപയോഗത്തിനുള്ളതാണ് എന്ന കാഴ്ചപ്പാടിനു കീഴിലുള്ളതായിരിക്കണമെന്ന് സഭ പഠിപ്പിക്കുന്നു. ഇന്നത്തെ ലോകത്ത് ഈ തത്വം ഭൗതികസമ്പത്തുകൾക്കു മാത്രമല്ല, അറിവ്, പേറ്റന്‍റുകൾ, അൽഗോരിതങ്ങൾ, ഡിജിറ്റൽ പ്ലാറ്റ്ഫോമുകൾ, ഡാറ്റ തുടങ്ങിയ പുതിയ സ്വത്തുക്കൾക്കും ബാധകമാണ്. ഇവ കുറച്ചുപേരുടെ കൈകളിൽ കേന്ദ്രീകരിക്കുമ്പോൾ പുതിയ അസമത്വങ്ങൾ സൃഷ്ടിക്കപ്പെടുന്നു. അതിനാൽ സാങ്കേതികവിദ്യയും പ്രകൃതിവിഭവങ്ങളും പരിസ്ഥിതിയെയും ഭാവിതലമുറകളെയും മാനിച്ചുകൊണ്ടു പൊതുലക്ഷ്യങ്ങൾക്കായി ഉപയോഗിക്കപ്പെടണം.
അധികാര ക്രമം പാലിക്കപ്പെടണം എന്നതാണ് മൂന്നാമത്തേത്. വ്യക്തികൾ, കുടുംബങ്ങൾ, പ്രാദേശിക സമൂഹങ്ങൾ, ഇടനില സംഘടനകൾ എന്നിവയുടെ ഉത്തരവാദിത്വങ്ങൾ രാഷ്‌ട്രവും ഗവൺമെന്‍റുംപോലെയുള്ള ഉയർന്ന അധികാരസ്ഥാപനങ്ങൾ ഏറ്റെടുക്കരുത്. മറിച്ച് അവയുടെ സ്വാതന്ത്ര്യവും സൃഷ്ടിപരതയും സംരക്ഷിക്കുകയും ഏകോപിപ്പിക്കുകയും വേണം എന്നതാണ് ഈ വീക്ഷണം. വ്യക്തിയും കുടുംബവും രാഷ്‌ട്രത്തിൽ ലയിച്ചുപോകരുത് എന്നതാണ് എക്കാലവും സഭ പഠിപ്പിക്കുന്നത്.
രാഷ്‌ട്രം പൊതുനന്മ സംരക്ഷിക്കണം, എന്നാൽ കുടുംബങ്ങളുടെയും സംഘടനകളുടെയും ഉത്തരവാദിത്വങ്ങൾ സ്ഥിരമായി ഏറ്റെടുക്കരുത്. ഈ തത്വം യഥാർഥത്തിൽ ഉത്തരവാദിത്വങ്ങൾ പങ്കിടുന്ന ഒരു സംസ്കാരത്തെ പ്രോത്സാഹിപ്പിക്കുകയാണ്. ഡിജിറ്റൽ വിപ്ലവത്തിന്‍റെ പശ്ചാത്തലത്തിൽ ഈ ധാർമിക തത്വത്തിനു വലിയ പ്രാധാന്യമുണ്ട്. ഇന്ന് ചില വൻ കമ്പനികൾ ഡാറ്റയും അൽഗോരിതങ്ങളും നിയന്ത്രിച്ച് അനിയന്ത്രിതമായ അധികാരം കൈയാളുന്നു. ഇവിടെയെല്ലാം സുതാര്യത, ഉത്തരവാദിത്വം, പൊതുപങ്കാളിത്തം എന്നിവ ഉറപ്പാക്കപ്പെടേണ്ടതുണ്ട്.
ഐക്യദാർഢ്യത്തിന്‍റെ തത്വമാണ് നാലാമത്തേത്. ഓരോ മനുഷ്യനും ദൈവത്തിന്‍റെ പ്രതിച്ഛായയിൽ സൃഷ്ടിക്കപ്പെട്ടവനും മറ്റുള്ളവരുമായി ബന്ധിക്കപ്പെട്ടവനുമാണ്. അതിനാൽ “ആരും ഒറ്റയ്ക്ക് രക്ഷിക്കപ്പെടുന്നില്ല.” ആഗോളവത്കരണവും ഡിജിറ്റൽ ശൃംഖലകളും നമ്മെ കൂടുതൽ പരസ്പരബന്ധമുള്ളവരാക്കിയിട്ടുണ്ട് എന്നത് വാസ്തവമാണ്. എന്നാൽ യഥാർഥ ഐക്യം ഈ ബന്ധങ്ങളെ പങ്കുവയ്ക്കലിന്‍റെയും സഹകരണത്തിന്‍റെയും മാർഗങ്ങളാക്കി മാറ്റുമ്പോൾ ഉണ്ടാകുന്നതാണ്. ഐക്യദാർഢ്യം ഒരു സാമൂഹിക തത്വത്തെക്കാൾ ഒരു പുണ്യമാണ്. ദരിദ്രരെയും ഭാവിതലമുറകളെയും പരിഗണിച്ച് പൊതുനന്മയ്ക്കായി സ്ഥിരതയോടെ പ്രവർത്തിക്കാനുള്ള മനോഭാവമാണത്.
സാമൂഹിക നീതി എന്ന തത്വമാണ് അഞ്ചാമത്തേത്. അനീതികൾ വ്യക്തികളുടെ തിന്മകളിൽനിന്നു മാത്രമല്ല ഉദ്ഭവിക്കുന്നത്. അസമത്വം സൃഷ്ടിക്കുന്ന സാമൂഹിക, സാമ്പത്തിക, സാംസ്കാരിക ഘടനകളിൽനിന്ന് അനീതി ഉത്ഭവിക്കും. വിശുദ്ധ ജോൺ പോൾ രണ്ടാമൻ പാപ്പായാണ് ഇതിനെ "പാപത്തിന്‍റെ ഘടനകൾ' എന്നു വിളിച്ചത്. യുദ്ധങ്ങൾ, കൊളോണിയലിസം, വംശീയവും ലിംഗപരവുമായ വിവേചനം, ചൂഷണം തുടങ്ങിയവ മൂലം തകർന്ന ബന്ധങ്ങളെ പുനഃസ്ഥാപിക്കുകയും പുറന്തള്ളപ്പെട്ടവരെ സമൂഹത്തിലേക്കു തിരിച്ചുകൊണ്ടുവരികയും ചെയ്യുകയാണ് സാമൂഹിക നീതിയുടെ ലക്ഷ്യം.
◄ സ്നേഹം പരമ ലക്ഷ്യം
സഭയുടെ സാമൂഹിക പ്രബോധനങ്ങൾ കത്തോലിക്കാ വിശ്വാസത്തിന്‍റെ ഹൃദയഭാഗത്തേക്കു നമ്മെ നയിക്കുന്നു എന്ന പാപ്പാ പ്രഖ്യാപിക്കുന്നു. ദൈവം ത്രിത്വമാണെന്ന ദൈവിക രഹസ്യംതന്നെയാണ് സാമൂഹിക പ്രബോധനങ്ങളുടെ അടിത്തറ. ത്രിത്വൈക ദൈവം കൂട്ടായ്മയുടെ ദൈവമാണ്. അതുകൊണ്ടുതന്നെ തന്‍റെ ഛായയിൽ ദൈവം സൃഷ്ടിച്ച മനുഷ്യന്‍റെ യഥാർഥ ഛായയും സാദൃശ്യവും കൂട്ടായ്മയുടെതാണ്. ദൈവത്തോടും മനുഷ്യനോടുള്ള കൂട്ടായ്മയെക്കുറിച്ചാണ് സഭയുടെ സാമൂഹിക പ്രബോധനങ്ങൾ സംസാരിക്കുന്നത്.
ദൈവം സ്നേഹമാണ് എന്നതാണല്ലോ ത്രിത്വത്തിന്‍റെ ആന്തരിക രഹസ്യം. സ്നേഹം ആത്മസമർപ്പണത്തിലും പങ്കുവയ്ക്കലിലുമാണു പ്രകടമാകുന്നത്. ദൈവത്തോടും മനുഷ്യനോടും ബന്ധത്തിലായിരിക്കുന്നതിനാണ് ദൈവം മനുഷ്യനെ സൃഷ്ടിച്ചത്. സൃഷ്ടിച്ച ദൈവത്തോടും മറ്റുള്ളവരോടും സൃഷ്ടപ്രപഞ്ചത്തോടും കൂട്ടായ്മയിൽ നിലനിൽക്കേണ്ട വിധത്തിലാണ് ദൈവം മനുഷ്യ വ്യക്തിയെതന്നെ സംവിധാനം ചെയ്തിരിക്കുന്നത്.
സ്നേഹത്തിൽ അധിഷ്ഠിതമായ കൂട്ടായ്മയിലാണ് മനുഷ്യന്‍റെ മഹത്വം പ്രകടമാകുന്നത്. അത് ഒരാളുടെ കഴിവുകളിലോ സമ്പത്തിലോ സാമൂഹികസ്ഥാനത്തിലോ അല്ല സ്ഥിതിചെയ്യുന്നത്. ദൈവത്തിന്‍റെ അചഞ്ചലമായ സ്നേഹത്തിന്റെ ദാനമാണത്. ഈ സ്നേഹം മനുഷ്യരൂപം പ്രാപിച്ചിരിക്കുന്നത് മിശിഹായിലാണ്. അതുകൊണ്ടുതന്നെ സഭയുടെ സാമൂഹിക പ്രബോധനങ്ങളുടെ അടിത്തറ ദൈവപുത്രനായ മിശിഹാ തന്നെയാണ്.
(തുടരും)
International
ബാഴ്സലോണ: ഭിന്നിച്ചുനില്‍ക്കുന്ന ലോകത്ത് ഐക്യത്തിന്‍റെ സാക്ഷികളും പ്രവാചകരുമാകാന്‍ കത്തോലിക്കാ വിശ്വാസികളോട് ലെയോ പതിനാലാമന് മാര്‍പാപ്പയുടെ ആഹ്വാനം.
സ്‌പെയിനില്‍ തുടരുന്ന സന്ദര്‍ശനത്തിന്‍റെ ഭാഗമായി തലസ്ഥാനനഗരമായ മാഡ്രിഡില്‍ മൂന്നര ദിവസത്തെ സന്ദര്‍ശനത്തിനുശേഷം ഇന്നലെ ഉച്ചയ്ക്ക് ബാഴ്സലോണ നഗരത്തിലെത്തിയ മാര്‍പാപ്പ ഇവിടുത്തെ ഹോളിക്രോസ് ആന്‍ഡ് സെന്‍റ് യുവാലിയ കത്തീഡ്രലില്‍ മധ്യാഹ്നപ്രാര്‍ഥനയ്ക്കു നേതൃത്വം നല്‍കി വചനസന്ദേശം നല്‍കുകയായിരുന്നു.
ദൈവത്താല്‍ സ്‌നേഹിക്കപ്പെടാന്‍ സ്വയം അനുവദിക്കുന്നവര്‍ക്കു മാത്രമേ മറ്റുള്ളവരുമായി ചേര്‍ന്ന് സ്നേഹത്തിന്റെ പ്രവൃത്തികള്‍ കെട്ടിപ്പടുക്കാന്‍ കഴിയൂ. വൈവിധ്യങ്ങള്‍ക്കിടയിലും ഐക്യത്തിന് മുന്‍ഗണന നല്‍കാന്‍ തയാറാകണം- മാര്‍പാപ്പ പറഞ്ഞു.
രാത്രിയില്‍ നഗരത്തിലെ ഒളിമ്പിക്സ്‌റ്റേഡിയത്തില്‍ നടന്ന നിശാജാഗരണ പ്രാര്‍ഥനയിലും മാര്‍പാപ്പ പങ്കെടുത്തു. യുവാക്കളുള്‍പ്പെടെ ഒരു ലക്ഷത്തിലേറെ പേര് പ്രാര്‍ഥനയില്‍ പങ്കെടുത്തു.
International
മാഡ്രിഡ്: ഒരു രാജ്യത്തെ സംബന്ധിച്ചിടത്തോളം അതിന്‍റെ അടിത്തറയാണു കുടുംബങ്ങളെന്നും രാജ്യത്തിന്‍റെ ഭാവി തീരുമാനിക്കുന്നതിൽ കുടുംബങ്ങൾക്കു പ്രത്യേക പങ്കുണ്ടെന്നും കുടുംബങ്ങളെ പിന്തുണയ്ക്കുന്നതുവഴി രാജ്യങ്ങൾ ശക്തിപ്പെടുന്നുവെന്നും ലെയോ പതിനാലാമൻ മാർപാപ്പ.
മാഡ്രിഡിൽ സ്പെയിൻ പാർലമെന്‍റിനെ അഭിസംബോധന ചെയ്യുകയായിരുന്നു മാർപാപ്പ. കുടുംബമെന്നത് ഒരു രാജ്യത്തിന്‍റെ സ്വാഭാവിക അടിത്തറയാണ്. ഗർഭധാരണം മുതൽ സ്വാഭാവിക അന്ത്യം വരെ ജീവിതം സംരക്ഷിക്കപ്പെടണം. ഓരോ യുദ്ധവും വേദനാജനകമായ പരാജയമാണ്.
അതു തിരിച്ചറിയാൻ ലോകനേതാക്കൾക്കാകണം. പുതിയ സാങ്കേതികവിദ്യകൾക്കും നിർമിതബുദ്ധിക്കും കർശനമായ ധാർമിക മേൽനോട്ടം ആവശ്യമാണ്. ഏതൊരു യഥാർഥ ജനാധിപത്യസമൂഹവും ചിന്താസ്വാതന്ത്ര്യം, മനഃസാക്ഷി സ്വാതന്ത്ര്യം, മതസ്വാതന്ത്ര്യം എന്നിവ പ്രോത്സാഹിപ്പിക്കണം.
കുടിയേറ്റക്കാരോട് മനുഷ്യത്വപൂർണമായ സമീപനം വേണം. അവരുടെ അവകാശങ്ങൾ സംരക്ഷിക്കണം. ഒരു രാജ്യത്തിന്‍റെ ധാർമികമഹത്വം പ്രകടമാകുന്നത് ദുർബലരായ ജനങ്ങളെ ചേർത്തുനിർത്തുന്പോഴും അവരെ സംരക്ഷിക്കുന്പോഴുമാണ് -മാർപാപ്പ പറഞ്ഞു. ഇതാദ്യമായാണ് ഒരു മാർപാപ്പ സ്പെയിൻ പാർലമെന്‍റിനെ അഭിസംബോധന ചെയ്യുന്നത്. പാർലമെന്‍റംഗങ്ങൾ ഏഴു മിനിറ്റ് എഴുന്നേറ്റുനിന്നാണ് മാർപാപ്പയോടുള്ള ആദരവ് പ്രകടിപ്പിച്ചത്.
മൂന്നു ദിവസത്തെ മാഡ്രിഡ് സന്ദർശനം പൂർത്തിയാക്കി മാർപാപ്പ ഇന്ന് ബാഴ്സലോണയിലേക്കു യാത്രയാകും. ഉച്ചയ്ക്ക് 12.25ന് ബാഴ്സലോണയിൽ എത്തുന്ന മാർപാപ്പ ഉച്ചയ്ക്ക് ഒന്നിന് ബാഴ്സലോണ കത്തീഡ്രലിൽ മധ്യാഹ്‌നപ്രാർഥനയിൽ പങ്കെടുക്കും.
International
വാഷിംഗ്‌ടൺ ഡിസി: ഇറാന്‍റെ ആണവ നിലപാടിനെക്കുറിച്ച് ലെയോ പതിനാലാമൻ മാർപാപ്പയ്ക്കു ധാരണയില്ലെന്നും ഇറാന്‍റെ കൈവശം ആണവായുധം ഉണ്ടാകാൻ പാടില്ലെന്ന കാര്യം ആരെങ്കിലും അദ്ദേഹത്തെ ബോധ്യപ്പെടുത്തണമെന്നും യുഎസ് പ്രസിഡന്‍റ് ഡോണൾഡ് ട്രംപ്.
ഡെമോക്രാറ്റ് നേതാവുകൂടിയായ ഷിക്കാഗോ മേയർ ബ്രാൻഡൻ ജോൺസൺ വെള്ളിയാഴ്ച വത്തിക്കാനിലെത്തി മാർപാപ്പയുമായി കൂടിക്കാഴ്ച നടത്തിയതിനെയും ട്രംപ് സമൂഹമാധ്യമത്തിലൂടെ വിമർശിച്ചു.
ഷിക്കാഗോ മേയർ നിർഗുണനായ വ്യക്തിയാണെന്ന കാര്യം ഷിക്കാഗോയിൽ ജനിച്ച കത്തോലിക്കാസഭയുടെ പരമാധ്യക്ഷൻ അറിഞ്ഞിരിക്കണമെന്നും അതല്ലെങ്കിൽ വത്തിക്കാൻ ഉദ്യോഗസ്ഥർ അദ്ദേഹത്തെ ഇക്കാര്യം അറിയിക്കണമെന്നുമായിരുന്നു ട്രംപിന്‍റെ വിമർശനം.
ഇറാൻ സംഘർഷവും അമേരിക്കയിലെ കുടിയേറ്റ പ്രശ്നങ്ങളും മാർപാപ്പയുമായി ചർച്ച ചെയ്തുവെന്ന് കൂടിക്കാഴ്ചയ്ക്കുശേഷം ഷിക്കാഗോ മേയർ പറഞ്ഞിരുന്നു. ഇതാണ് ട്രംപിനെ ചൊടിപ്പിച്ചത്.
International
വത്തിക്കാൻ സിറ്റി: ലോകസമാധാനത്തിനായി നമ്മൾ പ്രാർഥന തുടരേണ്ടതുണ്ടെന്നും ലോകത്തിന്‍റെ വിവിധ ഭാഗങ്ങളിൽ യുദ്ധക്കെടുതിയിലൂടെ കടന്നുപോകുന്ന ജനങ്ങളുടെ നിലവിളി കേൾക്കാനാകണമെന്നും ലെയോ പതിനാലാമൻ മാർപാപ്പ.
പരിശുദ്ധ ദൈവമാതാവിന്‍റെ വണക്കമാസ സമാപനത്തോടനുബന്ധിച്ച് ശനിയാഴ്ച രാത്രിയിൽ വത്തിക്കാൻ ഗാർഡനിലെ ലൂർദ് മാതാവിന്‍റെ ഗ്രോട്ടോയ്ക്കുമുന്നിൽ ലോകസമാധാനത്തിനായി നടത്തിയ ജപമാലപ്രാർഥനയിൽ സന്ദേശം നൽകുകയായിരുന്നു മാർപാപ്പ.
സമാധാനം എന്നത് ഒരു പരീക്ഷണശാലയിൽ പരീക്ഷിക്കേണ്ട സിദ്ധാന്തമോ കേവലമൊരു മിഥ്യയോ സ്വാർഥതാത്പര്യത്താൽ പിന്തുടരേണ്ട ഒരു കാര്യമോ അല്ല. മറിച്ച്, അത് ആത്മാർഥമായ ഹൃദയത്തോടെ അന്വേഷിക്കണം. അതു ദൈനംദിന പ്രതിബദ്ധതയാകണം.
നീതിയിൽനിന്നും സ്നേഹത്തിൽനിന്നുമാണ് സമാധാനം ഉണ്ടാകുന്നത്. കുടുംബങ്ങളെയും ജനങ്ങളെയും സമൂഹങ്ങളെയും രാഷ്‌ട്രങ്ങളെയും ഒരുമിച്ച് കൊണ്ടുവരുന്ന ഐക്യമാണത്. സമാധാനം നിഷേധിക്കപ്പെട്ടവരുടെ നിലവിളി കേൾക്കാൻ നാം തീരുമാനിക്കുമ്പോൾ അതു സാധ്യമാകും. -മാർപാപ്പ പറഞ്ഞു.
ജപമാലയുടെ ഓരോ രഹസ്യത്തിലും യുദ്ധക്കെടുതികൾ നേരിടുന്നവരെ സമർപ്പിച്ചു പ്രാർഥിച്ചു. ഒന്നാമത്തെ രഹസ്യത്തിൽ യുദ്ധത്തിന്‍റെ ഇരകൾക്കുവേണ്ടിയായിരുന്നു പ്രാർഥന. രണ്ടാം രഹസ്യത്തിൽ യുദ്ധമേഖലകളിൽ പ്രതീക്ഷയുടെ കിരണം തെളിക്കുന്നവരെ സ്മരിച്ചു.
മൂന്നാം രഹസ്യത്തിൽ യുദ്ധമേഖലയിൽ പ്രവർത്തിക്കുന്ന ആരോഗ്യ, സന്നദ്ധ പ്രവർത്തകർക്കുവേണ്ടിയും നാലാം രഹസ്യത്തിൽ യുദ്ധത്തടവുകാർക്കും ഇതര സഹനങ്ങൾ നേരിടുന്നവർക്കും വേണ്ടിയും പ്രാർഥിച്ചു. അഞ്ചാം രഹസ്യത്തിൽ യുദ്ധങ്ങളെല്ലാം അവസാനിച്ച് ദീർഘകാല സമാധാനം പുലരാനായിരുന്നു പ്രാർഥന.
ജപമാലയിൽ ആത്മീയമായി പങ്കുചേരാൻ ലോകമെമ്പാടുമുള്ള വിശ്വാസികളോടും വിവിധ തീർഥാടനകേന്ദ്രങ്ങളോടും വത്തിക്കാൻ അഭ്യർഥിച്ചിരുന്നു. ഇതുപ്രകാരം പോർച്ചുഗലിലെ ഫാത്തിമ, ഫ്രാൻസിലെ ലൂർദ്, യുക്രെയ്നിലെ സർവാനിറ്റ്സിയ, ഫിലിപ്പീൻസിലെ ആന്‍റിപോളോ, ബോസ്നിയയിലെ മെജുഗോറെ, ഇറ്റലിയിലെ ലൊറേറ്റോ തുടങ്ങിയ ലോകപ്രശസ്ത മരിയൻ തീർഥാടനകേന്ദ്രങ്ങളിലും പ്രത്യേക ജപമാലപ്രാർഥന സംഘടിപ്പിച്ചിരുന്നു.
International
വത്തിക്കാൻ സിറ്റി: തന്നെ കാണാനായി മണിക്കൂറുകൾ കാത്തുനിന്ന പുരോഹിതൻ ചൂടു മൂലം കുഴഞ്ഞുവീണപ്പോൾ സഹായിക്കാൻ ഓടിയെത്തി ലെയോ പതിനാലാമൻ മാർപാപ്പ. ബുധനാഴ്ച മാർപാപ്പയുടെ പ്രതിവാര പൊതുദർശന പരിപാടിക്കിടെയായിരുന്നു സംഭവം.
തെക്കൻ ഇറ്റലിയിലെ മാർട്ടീന ഫ്രാങ്ക സ്വദേശിയായ ഫാ. ഡിയേഗോ സെമറാറോ ആണ് കുഴഞ്ഞുവീണത്. 81 വയസുള്ള അദ്ദേഹം സഹോദരനും വൈദികനുമായ ഫാ. ഫ്രാങ്കോ സെമറാറോയ്ക്കൊപ്പമാണ് വത്തിക്കാൻ സന്ദർശിച്ചത്.
പ്രതിവാര പൊതുദർന പരിപാടിയുടെ സമാപനത്തിൽ മാർപാപ്പയ്ക്കു ഹസ്തദാനം ചെയ്യാൻ സമീപക്കവേയാണ് കുഴഞ്ഞുവീണത്.
മൂന്നു മണിക്കൂറോളം അദ്ദേഹം കാത്തുനിന്നിരുന്നു. വത്തിക്കാനിലും റോമിലും സമീപ ദിവസങ്ങളിൽ കനത്ത ചൂടാണ് റിപ്പോർട്ട് ചെയ്യുന്നത്.
കുഴഞ്ഞുവീണ വൈദികന്‍റെ സമീപം ആദ്യമെത്തിയത് മാർപാപ്പയായിരുന്നു. തന്‍റെ മുന്നിൽ കുനിഞ്ഞുനിൽക്കുന്ന മാർപാപ്പയെ തിരിച്ചറിഞ്ഞ പുരോഹിതൻ “പരിശുദ്ധ പിതാവേ, ഇത് അങ്ങു തന്നെയാണോ” എന്ന് ആശ്ചര്യപ്പെടുകയുമുണ്ടായി.
വത്തിക്കാനിൽ വൈദ്യസഹായം ലഭിച്ച സഹോദരന് ദൈവകാരുണ്യത്താൽ ആരോഗ്യപ്രശ്നങ്ങളില്ലെന്ന് ഫാ. ഫ്രാങ്കോ സെമറാറോ അറിയിച്ചു.
International
വത്തിക്കാൻ സിറ്റി: കാലാവസ്ഥാ വ്യതിയാനത്തെക്കുറിച്ച് ഫ്രാൻസിസ് മാർപാപ്പ 2015ൽ എഴുതിയ "ലൗദാത്തോ സി’ എന്ന ചാക്രികലേഖനത്തിനുശേഷം ലോകരാഷ്‌ട്രീയത്തെ സ്വാധീനിക്കാനൊരുങ്ങി ലെയോ പതിനാലാമൻ മാർപാപ്പയുടെ ചാക്രിക ലേഖനമായ "മാഞ്ഞിഫിക്ക ഹുമാനിത്താസ്’. നിർമിതബുദ്ധിയെ ആസ്പദമാക്കിയുള്ള ഈ ചാക്രികലേഖനത്തെക്കുറിച്ചുള്ള വാർത്ത രാജ്യാന്തര മാധ്യമങ്ങളെല്ലാം അതീവപ്രാധാന്യത്തോടെയാണു പ്രസിദ്ധീകരിച്ചത്.
നിർമിതബുദ്ധിയുടെ കാലത്ത് ചാക്രികലേഖനത്തിലൂടെ മാർപാപ്പ നൽകുന്ന ഉദ്ബോധനം തീർച്ചയായും ലോകം ചർച്ച ചെയ്യേണ്ട കാര്യങ്ങളാണെന്നാണ് അന്താരാഷ്‌ട്ര നിരീക്ഷകർ വിലയിരുത്തുന്നത്. സാങ്കേതികവിദ്യ മനുഷ്യന്‍റെ നന്മയ്ക്കായിരിക്കണമെന്നും അല്ലാതെ മനുഷ്യനെ യന്ത്രങ്ങളുടെ അടിമകളാക്കാനോ യുദ്ധക്കളത്തിലെ ഇരകളാക്കാനോ പാടില്ലെന്നുമാണ് തന്‍റെ ചാക്രികലേഖനത്തിലൂടെ മാർപാപ്പ ഓർമിപ്പിക്കുന്നത്.
അൽഗോരിതങ്ങളുടെയും ഡിജിറ്റൽ വിപ്ലവത്തിന്‍റെയും അമിത ആവേശം മാനുഷികമൂല്യങ്ങളെ ഇല്ലാതാക്കാതിരിക്കാൻ ആഗോളതലത്തിൽ ശക്തമായ നിയമപരമായ മേൽനോട്ടം അത്യന്താപേക്ഷിതമാണെന്നും ലെയോ മാർപാപ്പ ഓർമിപ്പിക്കുന്നു. നിർമിതബുദ്ധി മേഖലയിൽ പ്രവർത്തിക്കുന്ന കന്പനികൾ മനുഷ്യനന്മയെ കരുതി മത്സരത്തിൽനിന്ന് ഒഴിവാകണമെന്നും മാർപാപ്പ തന്‍റെ ചാക്രികലേഖനത്തിൽ അഭ്യർഥിക്കുന്നു.
നിർമിതബുദ്ധിയുടെ കാലത്ത് മനുഷ്യവ്യക്തിത്വം സംരക്ഷിക്കേണ്ടതുണ്ടെന്ന ആമുഖത്തോടെയാണു ചാക്രികലേഖനം ആരംഭിക്കുന്നത്. അഞ്ച് അധ്യായങ്ങളുള്ള ചാക്രികലേഖനത്തിൽ സാങ്കേതികവിദ്യ വ്യക്തിയുമായി ബന്ധപ്പെട്ട ഒരു വിരുദ്ധ ശക്തിയല്ലെ ന്നു മാർപാപ്പ ഓര്‍മിപ്പിക്കുന്നു. സഭയുടെ സാമൂഹിക സിദ്ധാന്തങ്ങളെക്കുറിച്ചുള്ള വിവരണമാണ് ആദ്യ അധ്യായത്തിൽ മാർപാപ്പ നൽകുന്നത്.
രണ്ടാം അധ്യായത്തിൽ ദൈവത്തിന്‍റെ പ്രതിച്ഛായയിലും സാദൃശ്യത്തിലും സൃഷ്ടിക്കപ്പെട്ട വ്യക്തിയുടെ അന്തസിനെയും ഗർഭധാരണം മുതൽ സ്വാഭാവിക മരണം വരെ ജീവിക്കാനുള്ള അവകാശം ഉൾപ്പെടെയുള്ള മനുഷ്യാവകാശം, ന്യൂനപക്ഷങ്ങളുടെ അവകാശങ്ങളുടെ അംഗീകാരം, സ്ത്രീകളുടെ സാമൂഹിക സ്ഥാനം എന്നിങ്ങനെ വിവിധ സാമൂഹിക വിഷയങ്ങൾ പ്രതിപാദിക്കുന്നു. മൂന്നാം അധ്യായത്തില്‍ നിർമിതബുദ്ധിയിൽ ധാർമികതയുടെ ആവശ്യമാണ് മാർപാപ്പ മുന്നോട്ടുവയ്ക്കുന്നത്. സാമൂഹിക പരിവർത്തനത്തിൽ മനുഷ്യന്‍റെ അന്തസ് കാത്തുസൂക്ഷിക്കുവാനുള്ള ഓര്‍മപ്പെടുത്തലാണ് നാലാം അധ്യായം.
അഞ്ചാം അധ്യായത്തില്‍ ആയുധ വ്യവസായത്തിന്‍റെ വളർച്ച, ആണവായുധ മത്സരം, പുതിയ സായുധ സംഘങ്ങളുടെ ആവിർഭാവം എന്നിവയെ മാർപാപ്പ അപലപിക്കുന്നു. ലെയോ പതിമൂന്നാമൻ മാർപാപ്പയുടെ "റേരും നൊവാരും'എന്ന ചാക്രികലേഖനത്തിന്‍റെ 135ാം വാർഷികദിനമായ കഴിഞ്ഞ 15ന് ലെയോ പതിനാലാമൻ മാർപാപ്പ ചാക്രികലേഖനത്തിൽ ഒപ്പുവച്ചിരുന്നു.
ഇന്നലെയാണ് ചാക്രികലേഖനം ഔദ്യോഗികമായി പ്രസിദ്ധീകരിച്ചത്. എഐ ഗവേഷണസ്ഥാപനമായ ആന്ത്രോപിക് (യുഎസ്എ) സഹസ്ഥാപകനും കൃത്രിമബുദ്ധിയുടെ വ്യാഖ്യാനത്തെക്കുറിച്ചുള്ള ഗവേഷണമേധാവിയുമായ ക്രിസ്റ്റഫർ ഓലയടക്കം ലോകത്തിന്‍റെ വിവിധ ഭാഗങ്ങളിൽനിന്നുള്ള പ്രമുഖരുടെ സാന്നിധ്യത്തിലാണ് ഇന്നലെ വത്തിക്കാനിലെ സിനഡ് ഹാളിൽ നടന്ന ചടങ്ങിൽ ചാക്രിക ലേഖനം ഔദ്യോഗികമായി പുറത്തിറക്കിയത്.
International
വത്തിക്കാൻ സിറ്റി: ലെയോ പതിനാലാമൻ മാർപാപ്പയുടെ ആദ്യ ചാക്രികലേഖനം ‘മാഞ്ഞിഫിക്ക ഹുമാനിത്താസ് ’ 25ന് പ്രസിദ്ധീകരിക്കും. മലയാളത്തിൽ ‘മഹത്തായ മനുഷ്യരാശി’ എന്നർഥം വരുന്ന ഈ ചാക്രിക ലേഖനം, കൃത്രിമബുദ്ധി (എഐ)യുടെ യുഗത്തിൽ മനുഷ്യവ്യക്തിയുടെ സംരക്ഷണത്തെ ആസ്പദമാക്കിയുള്ളതാണ്.
പ്രാദേശികസമയം രാവിലെ 11.30ന് വത്തിക്കാനിലെ സിനഡ് ഹാളിൽ നടക്കുന്ന പ്രകാശനച്ചടങ്ങിൽ മാർപാപ്പയും സന്നിഹിതനായിരിക്കും.
വത്തിക്കാൻ സ്റ്റേറ്റ് സെക്രട്ടറി കർദിനാൾ പിയെത്രോ പരോളിൻ, വിശ്വാസസത്യങ്ങൾക്കായുള്ള വത്തിക്കാൻ കാര്യാലയത്തിന്‍റെ തലവൻ കർദിനാൾ വിക്‌ടർ മാനുവൽ ഫെർണാണ്ടസ്, സമഗ്ര മാനവിക വികസനം പ്രോത്സാഹിപ്പിക്കുന്നതിനുള്ള വത്തിക്കാൻ കാര്യാലയത്തിന്‍റെ തലവൻ കർദിനാൾ മൈക്കിൾ സെർനി എസ്ജെ, ദൈവശാസ്ത്രജ്ഞനും യുകെയിലെ ദുർഹാം യൂണിവേഴ്സിറ്റി പ്രഫസറുമായ ഡോ. അന്നാ റോളാൻഡ്സ്, എഐ ഗവേഷണസ്ഥാപനമായ ആന്ത്രോപിക് (യുഎസ്എ) സഹസ്ഥാപകനും കൃത്രിമബുദ്ധിയുടെ വ്യാഖ്യാനത്തെക്കുറിച്ചുള്ള ഗവേഷണമേധാവിയുമായ ക്രിസ്റ്റഫർ ഓല, കലിഫോർണിയ സാന്താ ക്ലാര യൂണിവേഴ്സിറ്റിയിലെ പൊളിറ്റിക്കൽ തിയോളജി പ്രഫസർ ലിയോകാഡി ലുഷൊംബൊ തുടങ്ങിയവരും ചടങ്ങിൽ പങ്കെടുക്കും. തുടർന്ന് ചടങ്ങിനെ അഭിസംബോധന ചെയ്തശേഷം മാർപാപ്പ സമാപന ആശീർവാദം നൽകും.
ലെയോ പതിമൂന്നാമൻ മാർപാപ്പ രചിച്ച ‘റേരും നൊവാരും’ എന്ന സാമൂഹിക ചാക്രിക ലേഖനത്തിന്‍റെ 135-ാം വാർഷികദിനമായിരുന്ന കഴിഞ്ഞ 15നാണ് ലെയോ പതിനാലാമൻ മാർപാപ്പ തന്‍റെ ആദ്യ ചാക്രികലേഖനത്തിൽ ഒപ്പുവച്ചത്.
1891 മേയ് 15നാണ് ‘റേരും നൊവാരും’ പ്രസിദ്ധീകരിച്ചത്. സഭയുടെ സാമൂഹ്യ സിദ്ധാന്തങ്ങൾക്ക് അടിത്തറ നൽകിയ ഒരു രേഖകൂടിയാണിത്. തൊഴിൽ, ശമ്പളം, സ്വകാര്യസ്വത്തുക്കൾ, പുതിയ പ്രത്യയശാസ്ത്രങ്ങൾ, തൊഴിലാളികളുടെ അവകാശങ്ങൾ, കുടുംബങ്ങളുടെ അവകാശങ്ങൾ എന്നിങ്ങനെയുള്ള വിവിധങ്ങളായ കാര്യങ്ങൾ വിശകലനം ചെയ്തുകൊണ്ട് സാമൂഹ്യ-സാമ്പത്തിക മേഖലകളിൽ നീതി ഉറപ്പുവരുത്താൻ സഭയ്ക്കുള്ള ഉത്തരവാദിത്വത്തെ എടുത്തുകാണിച്ചുകൊണ്ടുള്ളതായിരുന്നു ഈ ചാക്രികലേഖനം.
ലെയോ പതിമൂന്നാമൻ മാർപാപ്പ തുടക്കം കുറിച്ച വിപ്ലവാത്മകമായ ഈ ആശയങ്ങളെ തുടർന്നും സഭയെ നയിച്ച വിവിധ മാർപാപ്പമാർ പിന്തുടർന്നിട്ടുണ്ട്.
International
വത്തിക്കാൻ സിറ്റി: ലെയോ പതിനാലാമൻ മാർപാപ്പ സെപ്റ്റംബർ 25 മുതൽ 28 വരെ ഫ്രാൻസ് സന്ദർശിക്കും.
ഫ്രഞ്ച് പ്രസിഡന്‍റ് എമ്മാനുവൽ മക്രോണിന്‍റെയും അവിടുത്തെ സഭാ നേതൃത്വത്തിന്‍റെയും യുനെസ്കോ ഡയറക്‌ടർ ജനറലിന്‍റെയും ക്ഷണം സ്വീകരിച്ചാണു സന്ദർശനമെന്ന് വത്തിക്കാൻ പ്രസ് ഓഫീസ് അറിയിച്ചു. പാരീസിലെ യുനെസ്കോ ആസ്ഥാനവും മാർപാപ്പ സന്ദർശിക്കും.
2008ൽ ബനഡിക്‌ട് പതിനാറാമൻ മാർപാപ്പ ഫ്രാൻസിൽ സന്ദർശനം നടത്തിയിരുന്നു. പാരീസിലും ലൂർദിലുമായിരുന്നു അദ്ദേഹത്തിന്‍റെ സന്ദർശനം.
International
വത്തിക്കാൻ സിറ്റി: വിശ്വാസവും ശാസ്ത്രവും തമ്മിലുള്ള വിഭാഗീയത ഇന്നും തുടരുന്നുവെന്നത് സത്യമാണെന്നും ഇതു വസ്തുനിഷ്ഠമായ സത്യത്തിന്‍റെ അസ്തിത്വത്തെ നിഷേധിക്കുന്നതാണെന്നും ലെയോ പതിനാലാമൻ മാർപാപ്പ. വത്തിക്കാൻ ജ്യോതിശാസ്ത്ര നിലയ ഫൗണ്ടേഷന്‍റെ ബോർഡംഗങ്ങളെ അഭിസംബോധന ചെയ്യുകയായിരുന്നു മാർപാപ്പ.
പരിശുദ്ധ സിംഹാസനത്തിന്‍റെയും ആഗോളസഭയുടെയും സേവനത്തിനായി വത്തിക്കാൻ ജ്യോതിശാസ്ത്ര നിലയം വഹിക്കുന്ന പ്രധാനപ്പെട്ട പങ്ക് എടുത്തുപറഞ്ഞ മാർപാപ്പ, വിശ്വാസവും ശാസ്ത്രവും ശത്രുക്കളാണെന്ന വർധിച്ചുവരുന്ന ധാരണയെ ചെറുക്കേണ്ടതിന്‍റെ അടിയന്തര ആവശ്യമുണ്ടെന്ന് സഭയ്ക്കു തോന്നിയതിനാലാണു വത്തിക്കാനിൽ ജ്യോതിശാസ്ത്ര നിലയം ആരംഭിച്ചതെന്നു വ്യക്തമാക്കി.
ശാസ്ത്രവും സഭയും വ്യക്തമായി പഠിപ്പിക്കുന്ന കാര്യങ്ങൾ അംഗീകരിക്കാൻ പലരും വിസമ്മതിക്കുന്നുവെന്നത് യാഥാർഥ്യമാണ്. ഇത് നാം വസിക്കുന്ന ഗ്രഹത്തിന്‍റെ ചൂഷണത്തിനു കാരണമാകുന്നു. അതുകൊണ്ടാണ് ശാസ്ത്രസത്യങ്ങളെ സഭ ചേർത്തുനിർത്തുന്നത്- മാർപാപ്പ പറഞ്ഞു.
സൂര്യനെയും ചന്ദ്രനെയും നക്ഷത്രങ്ങളെയും അദ്ഭുതത്തോടെ നോക്കാനുള്ള കഴിവ് യാതൊരു വിഭജനങ്ങളും കൂടാതെ എല്ലാ മനുഷ്യർക്കും നൽകപ്പെട്ടിരിക്കുന്ന ഒരു ദാനമാണ്. ഇത് നമ്മുടെ ഭയങ്ങളെയും വീഴ്ചകളെയും ദൈവത്തിന്‍റെ വിശാലതയുടെ അടിസ്ഥാനത്തിൽ കാണുന്നതിനും ആശ്വാസം തേടുന്നതിനും നമ്മെ സഹായിക്കുന്നു.
എന്നാൽ, ദൈവം ഉരുവാക്കിയ ഈ പ്രകാശം ഇന്ന് മനുഷ്യനിർമിത വെളിച്ചംകൊണ്ട് നമ്മെ അന്ധരാക്കിയിരിക്കുന്നുവെന്നതാണ് യാഥാർഥ്യം-മാർപാപ്പ പറഞ്ഞു.
വത്തിക്കാനിലെ ശാസ്ത്രജ്ഞരെ പൊതുജനങ്ങളുമായും ആഗോള ശാസ്ത്രസമൂഹവുമായും അർഥവത്തായ രീതിയിൽ ഇടപഴകാൻ പ്രാപ്തരാക്കുന്ന ഫൗണ്ടേഷന്‍റെ പ്രവർത്തനങ്ങൾക്ക് മാർപാപ്പ നന്ദിയർപ്പിച്ചു.
ദൈവത്തിന്‍റെ സൃഷ്‌ടികർമം എല്ലാറ്റിനെയും അതിശയിപ്പിക്കുന്നതിനാൽ പ്രപഞ്ചത്തിന്‍റെ ഉദ്ഭവവും പ്രവർത്തനങ്ങളും പര്യവേക്ഷണം ചെയ്യാൻ ആഴത്തിൽ വിശ്വാസമുള്ള ആളുകൾ ആകർഷിക്കപ്പെടുന്നതിൽ അതിശയിക്കാനില്ലെന്നും മാർപാപ്പ പറഞ്ഞു.
International
വത്തിക്കാൻ സിറ്റി: സാർവത്രിക സഭാധ്യക്ഷനായി തെരഞ്ഞെടുക്കപ്പെട്ടതിന്‍റെ ഒന്നാം വാർഷികദിനം ഇറ്റലിയിലെ മരിയൻ തീർഥാടനകേന്ദ്രത്തിലെത്തി പ്രാർഥിച്ചും ഭിന്നശേഷിക്കാർക്കുള്ള പരിപാലനകേന്ദ്രം സന്ദർശിച്ചും ലെയോ പതിനാലാമൻ മാർപാപ്പ.
നേപ്പിൾസിനടുത്തുള്ള പുരാതന നഗരമായ പോംപെയിൽ ഇന്നലെ രാവിലെ 11.30ഓടെ ഹെലികോപ്റ്ററിലെത്തിയ മാർപാപ്പ പരിശുദ്ധ കന്യാമറിയത്തിന്‍റെ ബസിലിക്കയിൽ, ഇതിന്‍റെ സ്ഥാപകനായ വിശുദ്ധ ബർത്തോലോ ലോംഗോയുടെ കബറിടത്തിനു മുന്നിൽ പ്രാർഥിച്ചശേഷം പ്രശസ്തമായ ജപമാലരാജ്ഞിയുടെ തിരുസ്വരൂപത്തിനുമുന്നിൽ പൂക്കളർപ്പിച്ചു പ്രാർഥിക്കുകയും ചെയ്തു.
തുടർന്ന് ബസിലിക്കയോടു ചേർന്ന ബാർത്തോലോ ലോംഗോ ചത്വരത്തിൽ വിശുദ്ധ കുർബാന അർപ്പിച്ചു. വിശുദ്ധ കുർബാനയിൽ ആയിരങ്ങൾ പങ്കെടുത്തു.
പോംപെ മാതാവിന്‍റെ തിരുനാൾ ദിനത്തിൽ ഈ മരിയൻ തീർഥാടനകേന്ദ്രത്തിൽ എത്താനായത് അനുഗൃഹീതനിമിഷമാണെന്ന് വിശുദ്ധ കുർബാന മധ്യേ നൽകിയ വചനസന്ദേശത്തിൽ മാർപാപ്പ പറഞ്ഞു. നമ്മുടെ അമ്മയായ മറിയം എപ്പോഴും നമ്മോടു ചേർന്ന് നടക്കാനും നമ്മോട് അടുത്തിരിക്കാനും അവളുടെ മാധ്യസ്ഥ്യത്തിലും സ്നേഹത്തിലും നമ്മെ സഹായിക്കാനും ആഗ്രഹിക്കുന്നുവെന്നും മാർപാപ്പ പറഞ്ഞു. സഭയ്ക്കു മുഴുവനും വേണ്ടിയും ലോകസമാധാനത്തിനുവേണ്ടിയും നമ്മുടെ അമ്മയായ പരിശുദ്ധ കന്യാമറിയത്തിന്‍റെ മധ്യസ്ഥസഹായം തേടി പ്രാർഥിക്കാമെന്നും മാർപാപ്പ പറഞ്ഞു.
തുടർന്ന് ബസിലിക്കയോടു ചേർന്ന് ടെന്പിൾ ഓഫ് ചാരിറ്റി ജീവകാരുണ്യകേന്ദ്രം സന്ദർശിച്ച മാര്‍പാപ്പ അന്തേവാസികളായ ഭിന്നശേഷിക്കാരുമായി സംസാരിച്ചു. ബസിലിക്കയിൽ രോഗികൾ, ഭിന്നശേഷിക്കാർ, പ്രായമായവർ എന്നിവരുമായും കൂടിക്കാഴ്ച നടത്തി.
ഉച്ചകഴിഞ്ഞു നേപ്പിൾസ് നഗരത്തിലെത്തിയ മാർപാപ്പ ഇവിടത്തെ കത്തീഡ്രലിൽ വൈദികരുമായി കൂടിക്കാഴ്ച നടത്തി. തുടർന്ന് കത്തീഡ്രലിനോടു ചേർന്ന ദെൽ പ്ലെബിസിറ്റോ ചത്വരത്തിൽ വിശുദ്ധ കുർബാന അർപ്പിച്ചു.
International
എതൻസ്: ഗ്രീസിലെ മെഡിറ്ററേനിയൻ ദ്വീപായ ക്രീറ്റിലെ പർവതമേഖലയിൽ കണ്ടെത്തിയ പുതിയയിനം നിശാശലഭത്തിന് ലെയോ പതിനാലാമൻ മാർപാപ്പയുടെ പേരു നൽകി ശാസ്ത്രജ്ഞർ. ലത്തീൻ ഭാഷയിൽ പിരാലിസ് പാപ്പാലെയോനി (Pyralis papaleonei) എന്നാണ് ഈ ശലഭം അറിയപ്പെടുക.
ക്രീറ്റിലെ ജൈവവൈവിധ്യത്തെക്കുറിച്ച് പഠനം നടത്തുന്നതിനിടയിലാണ് രണ്ടു സെന്‍റിമീറ്റർ നീളമുള്ള ചിറകുകളും സ്വർണ പാടുകളും വെളുത്ത വരകളുമുള്ള ഇടത്തരം വലുപ്പമുള്ള നിശാശലഭത്തെ കണ്ടെത്തിയതെന്ന് ഇതുസംബന്ധിച്ച് നോട്ട ലെപിഡോപ്റ്റെറോളജിക്ക എന്ന ശാസ്ത്രമാസികയിൽ പ്രസിദ്ധീകരിച്ച ലേഖനത്തിൽ ഗവേഷണം നടത്തിയ ഷഡ്പദ ശാസ്ത്രജ്ഞരായ പീറ്റർ ഹ്യുമെർ, ലൗരി കെയ്‌ലെ, ആൻഡ്രൂസ് എച്ച്. സെഗെരെർ എന്നിവർ അറിയിച്ചു.
കാലാവസ്ഥാ സംരക്ഷണത്തിനും പരിസ്ഥിതി സംരക്ഷണത്തിനു വേണ്ടി ശക്തമായി വാദിക്കുന്നയാളാണു മാർപാപ്പയെന്നും അതിനാൽ ജൈവവൈവിധ്യ സംരക്ഷണത്തെക്കുറിച്ച് ബോധവത്കരണം നടത്തുകയെന്ന ലക്ഷ്യത്തോടെയാണ് അദ്ദേഹത്തിന്‍റെ പേര് പുതിയ നിശാശലഭത്തിന് ഇടാൻ തീരുമാനിച്ചതെന്നും ഗവേഷകർ അറിയിച്ചു.
മാർപാപ്പയുടെ ശബ്‌ദം മാനവരാശിക്ക് മാതൃകയാകട്ടെയെന്നു തങ്ങൾ പ്രത്യാശിക്കുന്നുവെന്നും അവർ വ്യക്തമാക്കി.
International
വത്തിക്കാൻ സിറ്റി: യുഎസ് സ്റ്റേറ്റ് സെക്രട്ടറി മാർക്കോ റൂബിയോ വത്തിക്കാനിലെത്തി ലെയോ പതിനാലാമൻ മാർപാപ്പയുമായി കൂടിക്കാഴ്ച നടത്തി. ഇന്നലെ രാവിലെ പ്രാദേശികസമയം 11.30ന് അപ്പസ്തോലിക് കൊട്ടാരത്തിലായിരുന്നു 45 മിനിറ്റ് നീണ്ടുനിന്ന കൂടിക്കാഴ്ച.
കൂടിക്കാഴ്ചയിൽ വത്തിക്കാനും യുഎസും തമ്മിൽ ഊഷ്മളമായ ഉഭയകക്ഷി ബന്ധം വളർത്തിയെടുക്കുന്നതിനുള്ള പ്രതിബദ്ധത പുതുക്കിയതായും യുദ്ധം, രാഷ്‌ട്രീയ സംഘർഷങ്ങൾ, ദുഷ്‌കരമായ മാനുഷിക സാഹചര്യങ്ങൾ എന്നിവ അനുഭവിക്കുന്ന രാജ്യങ്ങൾക്കു പ്രത്യേക ശ്രദ്ധ നൽകിക്കൊണ്ട് സമാധാനത്തിനായി അക്ഷീണം പ്രവർത്തിക്കേണ്ടതിന്‍റെ ആവശ്യകത ചർച്ച ചെയ്തതായും വത്തിക്കാൻ പ്രസ് ഓഫീസ് അറിയിച്ചു.
ഇരുവരും പശ്ചിമേഷ്യയിലെ സ്ഥിതിഗതികളും ലോകത്തിന്‍റെ ഇതരഭാഗങ്ങളിലെ പരസ്പരതാത്പര്യമുള്ള വിഷയങ്ങളും ചർച്ച ചെയ്തതായി യുഎസ് സ്റ്റേറ്റ് ഡിപ്പാർട്ട്മെന്‍റ് പത്രക്കുറിപ്പിൽ അറിയിച്ചു.
മാർപാപ്പയുമായുള്ള കൂടിക്കാഴ്ചയ്ക്കുശേഷം വത്തിക്കാൻ സ്റ്റേറ്റ് സെക്രട്ടറി കർദിനാൾ പിയെത്രോ പരോളിനുമായും വത്തിക്കാനിലെ മറ്റ് പ്രമുഖരുമായും റൂബിയോ കൂടിക്കാഴ്ച നടത്തി.
അതേസമയം, ഇറാന് ആണവായുധങ്ങൾ ഉണ്ടാകാൻ പാടില്ല എന്ന സന്ദേശവും മാർക്കോ റൂബിയോ മാർപാപ്പയെ അറിയിക്കുമെന്ന് വാഷിംഗ്ടണിൽ കത്തോലിക്കാമാധ്യമമായ ഇഡബ്ലുടിഎന്നിനു നൽകിയ അഭിമുഖത്തിൽ യുഎസ് പ്രസിഡന്‍റ് ഡോണൾഡ് ട്രംപ് വ്യക്തമാക്കിയിരുന്നു.
National
ന്യൂഡൽഹി: അടുത്ത മാസം നടത്തുന്ന യൂറോപ്യൻ സന്ദർശനത്തിനിടെ പ്രധാനമന്ത്രി നരേന്ദ്ര മോദി വത്തിക്കാനിലെത്തി ലെയോ പതിനാലാമൻ മാർപാപ്പയുമായി കൂടിക്കാഴ്ച നടത്തിയേക്കുമെന്ന് റിപ്പോർട്ട്.
നോർവേയിലെ ഓസ്‌ലോയിൽ നടക്കുന്ന ഇന്ത്യ-നോർഡിക് ഉച്ചകോടിയിൽ പങ്കെടുക്കാനാണ് പ്രധാനമന്ത്രി അടുത്ത മാസം പകുതിയോടെ യൂറോപ്പിലേക്ക് തിരിക്കുന്നത്.
നോർവേയ്ക്കു പുറമെ വത്തിക്കാനും നെതർലാൻഡ്സും സന്ദർശനത്തിന്‍റെ വേദികളായേക്കുമെന്ന് ദേശീയ മാധ്യമമാണു റിപ്പോർട്ട് ചെയ്തത്.
International
ലുവാണ്ട: ആഫ്രിക്കൻ രാജ്യമായ അങ്കോളയിലെ സന്ദർശനം പൂർത്തിയാക്കി ലെയോ പതിനാലാമൻ മാർപാപ്പ ഇന്ന് ഇക്വറ്റോറിയൽ ഗിനിയയിലേക്കു യാത്ര തിരിക്കും. 11 ദിവസത്തെ ആഫ്രിക്കൻ സന്ദർശനത്തിന്‍റെ ഭാഗമായി മാർപാപ്പ സന്ദർശിക്കുന്ന നാലാമത്തെ രാജ്യമാണിത്.
ഇന്ന് ഉച്ചയ്ക്ക് മുൻ തലസ്ഥാനനഗരമായ മലാബൊയിൽ എത്തിച്ചേരുന്ന മാർപാപ്പയെ പ്രസിഡന്‍റ് തിയോഡൊറോ ഒബിയാംഗ് ഗുമാ എംബാസൊഗോയുടെ നേതൃത്വത്തിൽ സ്വീകരിക്കും. തുടർന്ന് പ്രസിഡൻഷ്യൽ കൊട്ടാരത്തിൽ പ്രസിഡന്‍റുമായും സർക്കാരിലെ ഉന്നതരുമായും കൂടിക്കാഴ്ച നടത്തും. തുടർന്ന് മലാബൊയിലെ ജീൻ പിയെറെ ഒലി മാനസികാരോഗ്യ ആശുപത്രി സന്ദർശിക്കുന്ന മാർപാപ്പ രോഗികളുമായും ജീവനക്കാരുമായും കൂടിക്കാഴ്ച നടത്തും.
23 വരെ നീളുന്ന സന്ദർശനത്തിൽ മൊൻഗൊമൊയിലെ അമലോത്ഭവമാതാ ബസിലിക്കയിൽ വിശുദ്ധ കുർബാന, തുറമുഖനഗരമായ ബാറ്റയിൽ വിശുദ്ധ കുർബാന, സ്മാരകകേന്ദ്രം സന്ദർശനം, ബിഷപ്പുമാരുമായുള്ള കൂടിക്കാഴ്ച, നാഷണൽ യൂണിവേഴ്സിറ്റി സന്ദർശനം, ബാറ്റ സ്റ്റേഡിയത്തിൽ യുവാക്കളുമായുള്ള കൂടിക്കാഴ്ച എന്നിവയുൾപ്പെടുന്നു. വ്യാഴാഴ്ച മാലാബൊ സ്റ്റേഡിയത്തിൽ വിശുദ്ധ കുർബാന അർപ്പിച്ചശേഷം മാർപാപ്പ വത്തിക്കാനിലേക്കു മടങ്ങും.
അങ്കോളൻ സന്ദർശനത്തിന്‍റെ മൂന്നാംദിനമായ ഇന്നലെ സൗറിമോയിൽ മാർപാപ്പ വിശുദ്ധ കുർബാന അർപ്പിച്ചു.
ഇവിടെയെത്തിയ മാർപാപ്പ ആദ്യം സന്ദർശിച്ചത് സർക്കാർ ഉടമസ്ഥതയിലുള്ള വയോജനകേന്ദ്രമാണ്. പാട്ടു പാടിയും നൃത്തം ചെയ്തും അന്തേവാസികൾ മാർപാപ്പയെ വരവേറ്റു. മടങ്ങുന്നതിനിടെ സൗറിമോ അതിരൂപതയുടെ കത്തീഡ്രൽ പള്ളിയും സന്ദർശിച്ചു.
തുടർന്നായിരുന്നു പ്രത്യേകം സജ്ജമാക്കിയ വേദിയിൽ വിശുദ്ധ കുർബാന അർപ്പിച്ചത്. കുർബാനയിൽ ഒരു ലക്ഷത്തിലേറെ വിശ്വാസികൾ പങ്കെടുത്തു.
മാർപാപ്പയുടെ സന്ദർശനം ആഫ്രിക്കൻ വിശ്വാസികൾക്കിടയിൽ വലിയ ഉത്തേജനം പകർന്നിട്ടുണ്ടെന്നാണ് രാജ്യാന്തര മാധ്യമങ്ങൾ റിപ്പോർട്ട് ചെയ്യുന്നത്.
Leader Page
നിങ്ങൾക്ക് ഞാൻ ആശീർവാദം നൽകുന്നതിനു മുന്പായി നിങ്ങൾ എനിക്കുവേണ്ടി പ്രാർഥിക്കണമെന്ന പാപ്പായുടെ വാക്കുകൾ അദ്ദേഹത്തിന്‍റെ എളിമയുടെയും വിനയത്തിന്‍റെയും ഉത്തമദൃഷ്ടാന്തമായിരുന്നു.
പുരോഹിതൻ എന്ന വാക്കിന് ലത്തീൻ ഭാഷയിൽ ഉപയോഗിക്കുന്ന പദം "Pontifex ' എന്നതാണ്. ഈ വാക്കിന് പാലം പണിയുന്നവൻ എന്നാണ് അർഥം. മനുഷ്യർക്കിടയിലും മനുഷ്യനും ദൈവത്തിനുമിടയിലും പാലം പണിയുന്നവനാണ് പുരോഹിതൻ. ദൈവത്താൽ തെരഞ്ഞെടുക്കപ്പെടുന്ന ഒരു പുരോഹിതൻ തന്‍റെ ജീവിതം ദൈവത്തിനായും തന്നെ ഭരമേൽപ്പിക്കുന്ന ദൈവജനത്തിനായുമാണ് ജീവിക്കുന്നത്.
മാർപാപ്പയെ"Pontifex Maximus 'എന്നാണ് വിളിക്കുന്നത്. ക്രിസ്തുവിന്‍റെ വികാരിയെന്ന നിലയിൽ ലോകം മുഴുവനും വേണ്ടി തന്‍റെ ജീവിതം സമർപ്പിച്ച ജീവിതം-ഫ്രാൻസിസ് മാർപാപ്പ. ആടുകളുടെ മണമുള്ള നല്ല ഇടയനായി സ്വർഗത്തിനും ഭൂമിക്കും മധ്യേയും യുദ്ധവും കലാപങ്ങളും അതിർത്തി പണിത മനുഷ്യസമൂഹങ്ങൾക്കിടയിലും അദ്ദേഹം കൃപയുടെയും അനുരഞ്ജനത്തിന്‍റെയും പാലം പണിതു. കരുണയുടെയും ഉപവിയുടെയും ആർദ്രമായ പാഠങ്ങൾ ഹൃദയപൂർവം പങ്കുവച്ച് അദ്ദേഹം വിഭജനത്തിന്‍റെ മതിലുകൾ ആത്മീയതയുടെ ശക്തിയാൽ പൊളിക്കുകയും വിശുദ്ധിയുടെയും സ്നേഹത്തിന്‍റെയും പാലം പണിയുകയും ചെയ്തു.
പാവങ്ങളോടുള്ള തന്‍റെ കരുതലാലും കാരുണ്യത്താലും അവർക്ക് സ്വർഗത്തിന്‍റെ അനുഭവം പകർന്ന പിതാവ് അതിരുകളിലും പാർശ്വങ്ങളിലും അവഗണിക്കപ്പെട്ടവരെ സഭയുടെയും സമൂഹത്തിന്‍റെയും പ്രധാനശ്രദ്ധയിലേക്ക് കൈപിടിച്ചുകൊണ്ടുവന്നു. മരണത്തിന്‍റെ ഒന്നാം വാർഷികത്തിൽ നന്ദിയോടെയും കൂപ്പുകൈകളോടെയും പാപ്പായെ നാമെല്ലാം ഓർക്കുന്നു.
►അതിരുകളിൽനിന്ന് അതിരുകളിലേക്ക്
ഫ്രാൻസിസ് മാർപാപ്പയുടെ പ്രധാനാചാര്യ കാലഘട്ടം പലതരത്തിലുള്ള പ്രത്യേകതകൾ നിറഞ്ഞതായിരുന്നു. തിരുസഭയുടെ ചരിത്രത്തിൽ ആദ്യമായി തെക്കേ അമേരിക്കയിൽനിന്ന് പത്രോസിന്‍റെ സിംഹാസനത്തിലേക്കു കടന്നുവന്ന മാർപാപ്പയാണ് ഫ്രാൻസിസ് പാപ്പാ. ലോകത്തിന്‍റെ അതിർത്തികളിൽനിന്നു കടന്നുവന്ന പാപ്പായെന്നാണ് അദ്ദേഹത്തെ വിശേഷിപ്പിക്കുന്നത്. അതിനാൽതന്നെ അതിരുവത്കരിക്കപ്പെട്ടവരോട് ആർദ്രതനിറഞ്ഞ അനുകമ്പ അദ്ദേഹത്തിന്‍റെ ജീവിതമുദ്രയായിരുന്നു.പാപ്പാമാരുടെ ചരിത്രത്തിൽ ആദ്യമായി അസീസിയിലെ വിശുദ്ധ ഫ്രാൻസിസിന്‍റെ നാമം സ്വീകരിച്ച വ്യക്തിയാണ് കർദിനാൾ ഹോർഹെ ബെർഗോളിയോ. രണ്ടാം ക്രിസ്തുവെന്ന് പുകൾപെറ്റ അസീസിയിലെ സ്നേഹഗായകന്‍റെ പേരു മാത്രമല്ല, അദ്ദേഹത്തിന്‍റെ പ്രകൃതിസ്നേഹവും ദാരിദ്ര്യാരൂപിയും സഭാനവീകരണവും ഫ്രാൻസിസ് പാപ്പാ തന്‍റെ ജീവിതത്തിൽ പകർത്തി.
കർദിനാൾമാരുടെ കോൺക്ലേവ് കൂടി മാർപാപ്പയെ തെരഞ്ഞെടുത്തുകഴിയുമ്പോൾ പത്രോസിന്‍റെ ചത്വരത്തിൽ തിങ്ങിനിറഞ്ഞിരിക്കുന്ന വിശ്വാസിഗണത്തിന് ആശീർവാദം നല്കാൻ ബസിലിക്കയുടെ മുകളിലാണ് മാർപാപ്പമാർ ആദ്യം പ്രത്യക്ഷപ്പെടുക. ഇത്തരം അവസരങ്ങളിൽ മാർപാപ്പമാർ ലോകത്തിന്‍റെ വിവിധ ഭാഗങ്ങളിൽനിന്ന് റോമിൽ എത്തിച്ചേർന്നിട്ടുള്ള സകലർക്കും ആശീർവാദം നൽകാറുണ്ട്.
എന്നാൽ, ഫ്രാൻസിസ് മാർപാപ്പ തന്‍റെ തെരഞ്ഞെടുപ്പിനുശേഷം ആദ്യമായി പ്രത്യക്ഷപ്പെടുന്ന അവസരത്തിൽ ചെയ്തത് പ്രാർഥന ചോദിക്കുകയാണ്. നിങ്ങൾക്ക് ഞാൻ ആശീർവാദം നല്കുന്നതിനുമുൻപായി നിങ്ങൾ എനിക്കുവേണ്ടി പ്രാർഥിക്കണമെന്ന പാപ്പായുടെ വാക്കുകൾ അദ്ദേഹത്തിന്‍റെ എളിമയുടെയും വിനയത്തിന്‍റെയും ഉത്തമദൃഷ്ടാന്തമായിരുന്നു.
►കരുണയുള്ള ഇടയൻ
പുതിയനിയമ പൗരോഹിത്യത്തെപ്പറ്റി ഹെബ്രായലേഖകന്‍റെ വാക്കുകൾ ഇങ്ങനെയാണ്. ""ജനങ്ങളുടെ പാപങ്ങൾക്ക് പരിഹാരം ചെയ്യുന്നതിനുവേണ്ടി ദൈവികകാര്യങ്ങളിൽ വിശ്വസ്തനും കരുണയുള്ളവനുമായ പ്രധാനപുരോഹിതനാകാൻ അവൻ എല്ലാ കാര്യങ്ങളിലും തന്‍റെ സഹോദരരോടു സദൃശനാകേണ്ടിയിരുന്നു’’ (ഹെബ്രാ 2, 17). ദൈവികകാര്യങ്ങളിൽ വിശ്വസ്തനാകുന്നതോടൊപ്പം കരുണയുടെ മനുഷ്യരൂപമാകാൻ കഴിവുള്ളവിധമെല്ലാം അദ്ദേഹം പരിശ്രമിച്ചു. രോഗികളോടും വൃദ്ധരോടും അഭയാർഥികളോടും പാപികളോടും അശരണരോടും അഗതികളോടും അദ്ദേഹം അളവില്ലാത്ത കരുണ പ്രകാശിപ്പിച്ചു. അന്ദ്രേയ തോർണിയെല്ലി എന്ന മാധ്യമപ്രവർത്തകന് പാപ്പാ നൽകിയ അഭിമുഖത്തിനുശേഷം പുറത്തിറക്കിയ പുസ്തകരൂപത്തിനു നൽകിയ തലക്കെട്ട് "ദൈവത്തിന്‍റെ പേര് കരുണയെന്നാണ് ’എന്നതായിരുന്നു. കരുണ അദ്ദേഹത്തിന്‍റെ വാക്കുകളിൽ മാത്രമായിരുന്നില്ല, ഓരോ ദിവസവും തന്നെ കണ്ടുമുട്ടുന്ന ആവശ്യക്കാരോട് അദ്ദേഹത്തിന് കരുണയുണ്ടായിരുന്നു. അദ്ദേഹത്തിന്‍റെ അപ്പസ്തോലിക യാത്രകൾ സംഘടിപ്പിക്കുന്ന അവസരങ്ങളിൽ തൊട്ടടുത്തുനിന്ന് ദർശിച്ച ഒരായിരം അനുഭവകഥകൾ ഇതോടു ചേർത്തുവച്ചുപറയാൻ എനിക്ക് സാധിക്കും.
2016ൽ കരുണയുടെ അസാധാരണ ജൂബിലി വർഷം പ്രഖ്യാപിച്ച അദ്ദേഹം ലോകമെമ്പാടും "കരുണയുടെ വാതിൽ’ തുറക്കുകയും കരുണയുടെ പ്രവാചകനാവുകയും ചെയ്തു.
ജൂബിലി വർഷത്തിന്‍റെ പ്രഖ്യാപനത്തിൽ അദ്ദേഹം പുറത്തിറക്കിയ തിരുവെഴുത്തിന്‍റെ പേര് "കരുണയുടെ മുഖം’ എന്നതായിരുന്നു. ദൈവപിതാവിന്‍റെ മുഖം കരുണയാണ് എന്ന കേന്ദ്രാശയത്തിൽ വിരചിതമായ ഈ തിരുവെഴുത്തിന്‍റെ പിന്നിൽ കരുണ നിറഞ്ഞ മാനുഷികമുഖത്തോടുകൂടിയ ഫ്രാൻസിസ് പാപ്പാ ആയിരുന്നു. അവസാന കാലങ്ങളിൽ രോഗങ്ങളാൽ ക്ലേശിച്ച അവസരത്തിൽപോലും കണ്ണുകളിൽ തിളങ്ങിയിരുന്നത് കരുണയുടെ ഭാവമായിരുന്നു.
►ഫ്രാൻസിസ് പാപ്പായുടെ അജപാലനശൈലി
പാപ്പായുടെ ജീവിതത്തിന്‍റെയും പ്രവർത്തനത്തിന്‍റെയും അടിസ്ഥാനശൈലി ലാളിത്യമായിരുന്നു. അപ്പസ്തോലിക യാത്രയ്ക്കിടയിൽ ഒരു സാധാരണക്കാരനെപ്പോലെ ചായക്കടയിൽ പോയി ചായകുടിച്ചശേഷം സ്വന്തം പോക്കറ്റിൽനിന്നു പണം നൽകി മടങ്ങിവന്നതും കണ്ണട നന്നാക്കുവാൻ സ്വയം കടയിൽപോയതും തുടങ്ങി അനേകം ഉദാഹരണങ്ങൾ എടുത്തുകാണിക്കാൻ സാധിക്കും.
അപ്പസ്തോലിക യാത്രകളിൽ സ്വന്തം സൗകര്യങ്ങളെക്കാളും ആവശ്യങ്ങളെക്കാളും കൂടെ യാത്ര ചെയ്യുന്നവരുടെ ആവശ്യങ്ങളും അവർക്കായുള്ള ക്രമീകരണങ്ങളും അന്വേഷിച്ചറിയുകയും അവർക്ക് കൂടുതൽ പ്രാധാന്യം നൽകുകയും ചെയ്യുന്നത്ര ലളിതമായ ജീവിതമായിരുന്നു അദ്ദേഹത്തിന്‍റേത്.പ്രകൃതിയോടുള്ള ഉത്തരവാദിത്വത്തിൽ അദ്ദേഹം പ്രകടിപ്പിച്ച നേതൃത്വം പ്രത്യേകം എടുത്തുപറയേണ്ടതാണ്.
"ലൗദാത്തോ സി' എന്ന ചാക്രികലേഖനത്തിലൂടെ നാം അധിവസിക്കുന്ന പ്രകൃതിയെക്കുറിച്ചുള്ള അവബോധത്തിലേക്കും അതേപോലെ പ്രകൃതിക്ഷോഭങ്ങളുടെ തിരിച്ചടികൾ ഏറ്റവുമധികം അനുഭവിക്കുന്നത് ദരിദ്രരിൽ ദരിദ്രരായവരാണെന്നുള്ള തിരിച്ചറിവിലേക്കും പാപ്പാ നമ്മെ നയിച്ചു. മനുഷ്യർക്കിടയിലെ പാരസ്പര്യവും സാഹോദര്യവും "ഫ്രത്തെല്ലി തൂത്തി' എന്ന ചാക്രികലേഖനത്തിലൂടെ നമ്മെ ഓർമിപ്പിച്ചു.
"ലുമെൻ ഫിദെയി' എന്ന തിരുവെഴുത്തുവഴി നമ്മെ വിശ്വാസവെളിച്ചത്തിൽ വളർത്തുകയും അവസാനചാക്രികലേഖനമായ"ദിലെക്സിത് നോസ് ' വഴിയായി തിരുഹൃദയഭക്തി പ്രോത്സാഹിപ്പിക്കുകയും ചെയ്തു.സഭയെ കാലോചിതമായി നവീകരിക്കാനും എന്നാൽ പാരമ്പര്യമൂല്യങ്ങൾ കൈമോശം വരാതിരിക്കാനും സിനഡാലിറ്റിയെക്കുറിച്ചുള്ള സിനഡ് പ്രേരകമായി. സഭയുടെ ചരിത്രത്തിലെ ഒരു നിർണായക ഏടായിരുന്നു വിവിധ ശുശ്രൂഷാമേഖലകളിലുള്ളവരുടെ സഹകരണവും പങ്കാളിത്തവും ഉറപ്പാക്കുന്ന ഈ സിനഡ്.
അടിത്തട്ടുമുതലുള്ള നിർദേശങ്ങളും ചർച്ചകളും പ്രയോഗികസമീപനങ്ങളും ഒന്നുചേർത്ത ഈ സിനഡ് സഭാസംവിധാനത്തെ മുഴുവനും പുതുജീവനാൽ നിറയ്ക്കാൻ ഉപയുക്തമായി.
സമൂഹത്തിന്‍റെ വിവിധ തുറകളിലുള്ളവരെ ഹൃദയം തുറന്ന് ശ്രവിക്കാനും വിവിധ വിശ്വാസങ്ങളിലും സംസ്കാരങ്ങളിലും പെടുന്നവരെ മുൻവിധികളില്ലാതെ കേൾക്കാനും അവരോട് ഹൃദ്യമായി സംസാരിക്കാനും അദ്ദേഹത്തിന് സാധിച്ചു. സംഭാഷണത്തിന്‍റെ പ്രവാചകനായിരുന്നു അദ്ദേഹം. എഴുതി തയാറാക്കിയ പ്രസംഗങ്ങളിൽ ഒതുങ്ങിപ്പോകാതെ ഹൃദയത്തിൽനിന്നു പുറമേക്ക് ഒഴുകുന്ന ആശയധോരണിയായിരുന്നു അദ്ദേഹത്തിന്‍റെ പ്രഭാഷണങ്ങൾ.
കാണുന്നവർക്കും സംസാരിക്കുന്നവർക്കും കൂടെ യാത്ര ചെയ്യുന്നവർക്കുമെല്ലാം സംലഭ്യനാവുകയും സമീപസ്ഥനാവുകയും ചെയ്ത പിതൃതുല്യനായ ഒരു പാപ്പാ. പാപ്പാ എന്ന സംബോധന അപ്പാ/ പിതാവേ എന്നാണല്ലോ. സ്നേഹംകൊണ്ടും പ്രാർഥനകൊണ്ടും യഥാർഥത്തിൽ അപ്പൻ/വല്യപ്പൻ ആയി മാറിയ ഒരാളായിരുന്നു ഫ്രാൻസിസ് പാപ്പാ. മറ്റുള്ളവർക്ക് അപ്രതീക്ഷിത സമ്മാനങ്ങൾ നൽകുന്നതിൽ പിതാവ് ഏറെ സന്തോഷിച്ചിരുന്നു.
തന്‍റെ കൂടെയുള്ളവർക്ക് സമ്മാനങ്ങളായും തന്‍റെ സാന്നിധ്യമായുമൊക്കെ അദ്ദേഹം ഇടയ്ക്കൊക്കെ അദ്ഭുതപ്പെടുത്തിയിട്ടുണ്ട്. കർദിനാൾ പദവി എനിക്ക് വ്യക്തിപരമായും ഭാരതസഭയ്ക്കും അദ്ഭുതത്തിന്‍റെ നിമിഷമായിരുന്നു. ആശുപത്രിക്കിടക്കയിൽ എല്ലാവരും അദ്ദേഹം മരിച്ചു എന്ന് കരുതിയപ്പോൾ വീണ്ടും സാന്താ മാർത്തയിലേക്ക് കടന്നുവന്ന് അദ്ദേഹം ലോകം മുഴുവനെയും അദ്ഭുതപ്പെടുത്തുകയും ഉത്ഥാനത്തിരുനാളിന്‍റെ പിറ്റേന്ന്, 2025 ഏപ്രിൽ 21 തിങ്കളാഴ്ച തന്‍റെ സ്വർഗയാത്ര വിസ്മയംപരത്തി ആരംഭിക്കുകയും ചെയ്തു.
►വിലയേറിയ ജീവിതമാതൃക
ചില മനുഷ്യരുടെ ജീവിതം സുഗന്ധം നിറഞ്ഞ എണ്ണയിൽ തിരിയിട്ട് കൊളുത്തിയതുപോലെയാണ്. അവർ പ്രകാശം പരത്തുകയും, അതുപോലെ അവരുടെ സാമീപ്യത്തിൽ സുഗന്ധം നിറയുകയും ചെയ്യും. സഹപ്രവർത്തകർക്കും കണ്ടുമുട്ടുന്നവർക്കും അനിതരസാധാരണമായ ഊർജവും പ്രകാശവും സുഗന്ധവും പരത്തിയ പിതാവ് കഴിഞ്ഞ വർഷം തിരുവുത്ഥാനത്തിന്‍റെ പിറ്റേന്ന് സ്വർഗയാത്രയാരംഭിച്ചു.
മിശിഹായുടെ ഉത്ഥാനം നമ്മുടെ ഉയിർപ്പിന്‍റെ അടിസ്ഥാനമാണ്. ഉയിർപ്പിന്‍റെ തൊട്ടു പിറ്റേന്നുള്ള പാപ്പായുടെ സ്വർഗയാത്ര ചിന്തനീയമാണ്. പാപ്പായുടെ യാത്രകൾ ഒരുക്കിയിരുന്ന എനിക്കും മടക്കമില്ലാത്ത ഈ അന്ത്യയാത്ര മനോവിഷമം ഉണ്ടാക്കിയെങ്കിലും ഉയിർപ്പിന്‍റെ പ്രത്യാശ നമ്മെ ഉത്തേജിപ്പിക്കുന്നു.
പാപ്പായുടെ സ്വർഗയാത്രയുടെ ആദ്യ വാർഷികം അനുസ്മരിക്കുമ്പോൾ അദ്ദേഹത്തിന്‍റെ പിൻഗാമിയോടൊപ്പം ആഫ്രിക്കയിൽ അപ്പസ്തോലിക സന്ദർശനയാത്രാമധ്യേയാണ് ഈ കുറിപ്പ് തയാറാക്കുന്നത്. ഫ്രാൻസിസ് മാർപാപ്പ നമുക്ക് പകർന്ന വിലയേറിയ ജീവിതമാതൃക ഔദാര്യത്തിന്‍റെയും കാരുണ്യത്തിന്‍റെയും ലാളിത്യത്തിന്‍റെയും വിശുദ്ധിയുടെയും പാഠങ്ങൾ നമ്മുടെ ജീവിതത്തിൽ പകർത്താൻ പരിശ്രമിക്കാം.
ADVERTISEMENT
ADVERTISEMENT
SPACE FOR ADVERTISEMENT
Copyright © 2026, Rashtra Deepika Ltd. All Rights Reserved.
Design and Development 
Corehub Solutions
Contact Numbers :
+91 481 2566706, 2566707, 2566708
About Us Feedback Privacy Policy Terms and Conditions for Online Payment
E-paper LOGIN
LOGIN